ការប្រកួតកីឡាសិស្សបឋមសិក្សា ឆ្នាំ២០២៤ បើកជាផ្លូវការ និងបញ្ចប់នៅថ្ងៃទី៨ ខែមេសា

2024-04-01 05:19:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាសម្រាប់សិស្សបឋមសិក្សា នៅឆ្នាំ២០២៤ នេះបានបើកការប្រកួតជាផ្លូវការហើយកាលពីរសៀលម្សិលមិញនេះនៅក្នុងវិមានពហុកីឡដ្ឋានជាតិ ក្រោមអធិបតីភាពឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា។

ឯកឧត្ដម វ៉ាត់ ចំរើន (រូបភាពអគ្គនាយកដ្ឋានកីឡា)

ថ្លែងក្នុងពិធីបើកឯកឧត្ដម វ៉ាត់ ចំរើន បានឲ្យដឹងថា ព្រឹត្តិការណ៍នេះធ្វើឡើងជំរុញឲ្យមានសកម្មភាពលេងកីឡាតាមបណ្ដាសាលា និងបណ្ដុះស្មារតីសិស្សថ្នាលឲ្យស្រឡាញ់ចូលចិត្តលេង ឬចាប់យកកីឡាណាមួយដែលខ្លួនចង់ហ្វឹកហាត់។ ជាឱកាសតម្រង់ទិសដល់អ្នកមាននិស័យជាមួយផ្នែកកីឡាបន្តដំណើរហ្វឹកហាត់ដើម្បីសម្រេចបំណងនៅថ្ងៃអនាគត។

(រូបភាពអគ្គនាយកដ្ឋានកីឡា)

ថ្នាក់ដឹកនាំជំនាញផ្នែកកីឡាខាងលើ សូមឲ្យប្រតិភូ លោកគ្រូ អ្នកគ្រូ ទាំងអស់ដឹកនាំគោរពនូវបទបញ្ជានៃការប្រកួតឲ្យបានល្អត្រឹមត្រូវ និងពិនិត្យមើលគ្រប់គ្រងកីឡាករ កីឡាការិនីឲ្យបានល្អដើម្បីធានាឲ្យបាននូវការចូលរួមសុខសុវត្ថិភាព។

(រូបភាពអគ្គនាយកដ្ឋានកីឡា)

បញ្ជាក់ដែរថា ការប្រកួតសិស្សបឋមសិក្សា ឆ្នាំ២០២៤ នេះចាប់ពីថ្ងៃទី៣០ ខែមីនា ដល់ទី៨ ខែមេសា ឆ្នាំ២០២៤ នៅរាជធានីភ្នំពេញ។ ការប្រកួតនេះគឺមាន ១២ប្រភេទកីឡា បាល់ទាត់ បាល់ទះ បាល់បោះ ហែលទឹក អត្តពលកម្ម វាយសី វាយកូនឃ្លីលើតុ គុនដាវ ល្បុក្កតោ ប៉េតង់ តេក្វាន់ដូ ITF តេក្វាន់ដូ WT សរុបប្រតិភូ គ្រូបង្វឹក កីឡាករ កីឡាការិនី ២៩៦០នាក់៕