វគ្គ Semi Final របស់ Europa League ឆ្នាំនេះ សុទ្ធតែគីឡូធ្ងន់

2024-04-19 12:05:41
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីប្រកួតយ៉ាងស្វិតស្វាញក្នុងវគ្គ ៨ ក្រុមចុងក្រោយនៃកម្មវិធី Europa League កាលពីសប្ដាហ៍នេះ ក្លឹបចំនួនបួន ធ្វើបានសម្រេចក្នុងការកក់កៅអីឈានទៅវគ្គពាក់កណ្ដាលផ្ដាច់ព្រ័ត្រកម្មវិធី Europa League រដូវកាល ២០២៣/២០២៤ នេះ។ ក្លឹបទាំងបួននោះ រួមមាន ក្លឹបបារាំង Olympique de Marseille ក្លឹបអ៊ីតាលី Atlanta ក្លឹបអាល្លឺម៉ង់ Bayer Leverkusen និងក្លឹបអ៊ីតាលី AS Roma។

ក្នុងវគ្គ Semi Final របស់ Europa League ក្លឹប Marseille ត្រូវប្រកួតជាមួយ Atlanta ឯ ក្លឹប Bayer Leverkusen ត្រូវប៉ះជាមួយក្លឹប AS Roma។

ខុសពីកម្មវិធី Champions League ការប្រកួតវគ្គពាក់កណ្ដាលផ្ដាច់ព្រ័ត្ររបស់កម្មវិធី Europa League ទាំងពីរគូខាងលើ ត្រូវធ្វើឡើងនៅថ្ងៃជាមួយគ្នា។ ពោលគឺជំនួបជើងទី ១ ប្រព្រឹត្តទៅនៅថ្ងៃសុក្រ ទី៣ ខែឧសភាឆ្នាំ ២០២៤ វេលាម៉ោង ២ ព្រឹក (ម៉ោងនៅកម្ពុជា)។ ចំណែកឯប្រកួតជើងទី ២ វិញ នឹងកើតឡើងនៅថ្ងៃសុក្រ ទី ១០ ខែឧសភា វេលាម៉ោង ២ ព្រឹក (ម៉ោងនៅកម្ពុជា)។

ក្នុងប្រកួតជើងទី ១ Marseille នឹងត្រូវធ្វើជាក្រុមម្ចាស់ផ្ទះក្នុងការស្វាគមន៍ក្រុមភ្ញៀវ Atlanta នៅកីឡដ្ឋាន Orange Velodrome ប្រទេសបារាំង។ រីឯប្រកួតជើងទី ២ វិញ Atlanta ក្នុងនាមជាក្រុមម្ចាស់ផ្ទះ ទទួលស្វាគមន៍ក្រុមភ្ញៀវ Marseille វិញម្ដងនៅកីឡដ្ឋាន Gewiss Stadium អ៊ីតាលី។

ដោយឡែក គូវគ្គ Semi Final មួយទៀត គឺរវាង Bayer Leverkusen និង Roma។ ក្នុងប្រកួតជើងដំបូង Roma បើកទ្វារកីឡដ្ឋាន Stadio Olimpico របស់ខ្លួន ក្នុងការទទួលក្រុមភ្ញៀវ Leverkusen។ ក្នុងជើងបន្ទាប់ Leverkusen ត្រូវប៉ះជាមួយ Roma ក្នុងផ្ទះរបស់ខ្លួនវិញនៅ BayArena។

សូមបញ្ជាក់ថា ក្លឹបទាំងបួនខាងលើ សុទ្ធសឹងតែស្ថិតក្នុងចំណោមក្លឹបដែលកំពុងមានទម្រង់លេងយ៉ាងល្អ។ តួយ៉ាងក្លឹប Bayer Leverkusen កំពុងមានទម្រង់លេងយ៉ាងអស្ចារ្យ ទើបតែឈ្នះលីគកំពូលអាល្លឺម៉ង់ ហើយជាក្លឹបអឺរ៉ុបតែមួយគត់មិនដែលស្គាល់ពាក្យចាញ់ក្នុងរដូវកាលនេះ។ Roma បានបំបាក់ AC Milan ដែលជាក្លឹបខ្លាំងនៅអ៊ីតាលី។ Atlanta វិញ យកឈ្នះ Liverpool ដែលជាក្លឹបខ្លាំងដែលកំពុងប្រជែងលីគកំពូលអង់គ្លេស។ ចំណែកឯ Marseille បានទម្លាក់ Benfica ដែលក្លឹបដ៏ធំនៅព័រទុយហ្គាល់ដើម្បីឡើងវគ្គ Semi Final កម្មវិធី Europa League។

ក្លឹបពីរដែលឈ្នះវគ្គពាក់កណ្ដាលផ្ដាច់ព្រ័ត្រនេះ នឹងត្រូវប៉ះគ្នាក្នុងជំនួបវគ្គ Final កម្មវិធី Europa League នៅថ្ងៃព្រហស្បត្តិ៍ ទី ២៣ ខែឧសភា ឆ្នាំ ២០២៤ វេលាម៉ោង ២ ព្រឹក (ម៉ោងនៅកម្ពុជា) នៅកីឡដ្ឋាន Dublin Arena សាធារណរដ្ឋអៀរឡង់៕

ប្រភព៖ UEFA អត្ថបទ៖ សេរី មង្គល