ខណៈដែលវីដេអូ Make up ឥណ្ឌា Asoka កំពុងមាន trending ខ្លាំងក្នុងកម្មវិធី Tik Tok ដោយមានជាតិសាសន៍ជាច្រើនបាននាំគ្នាផលិតវីដេអូនេះបន្តបន្ទាប់ ដែលក្នុងនោះក៏មាន Content Creator និងសិល្បករខ្មែរមួយចំនួនដែលនិយមធ្វើវីដេអូតាម trend ផងដែរ។

គួរឱ្យចាប់អារម្មណ៍ជាខ្លាំង Content Creator និងជា Influencer ល្បីឈ្មោះនៅកម្ពុជា ជា ស្រីនា ស្រាប់តែចាប់ផ្តើមគៀងគរប្រមូល creator ក្នុងស្រុក ក្នុងបំណងផលិតវីដេអូ Apsara Make Up Trend ដើម្បីបង្ហាញពីសិល្បៈវប្បធម៌ដ៏ផូរផង់របស់ខ្មែរបង្ហាញទៅកាន់ពិភពលោក។

តាមរយៈការបង្ហោះលើទំព័រហ្វេសប៊ុកផ្លូវការ ស្រីនា រៀបរាប់ថា « creator គ្រប់គ្នាមិនមែនមិនចង់ធ្វេីទេ ម្នាក់ៗនឹងធ្វេីដោយមិនស្ទាក់ស្ទេីរឱ្យតែមានធនធាននិងកម្លាំងគ្រប់គ្រាន់ ការគាំទ្រ និងការយោគយល់ពីម្នាក់ៗអាចធ្វេីឱ្យវប្បធម៌យេីងពង្រាយកាន់តែធំ»។

អ្នកប្រើប្រាស់បណ្តាញសង្គមយ៉ាងច្រើនសន្ធឹកបានចេញមកគាំទ្រគំនិតផ្តួចផ្តើមរបស់ ស្រីនា យ៉ាងពេញទំហឹង ថែមទាំងបាននាំគ្នាចែកចាយនូវអ្វីដែល Content Creator រូបនេះបានកំពុងរៀបចំបង្កើតឡើងទៀតផង។

ទន្ទឹមគ្នានោះផងដែរ នៅព្រឹកថ្ងៃទី២៤ ខែមេសានេះ នាដការីរបាំបុរាណ Kon Ant ក៏បានប្រកាសថា នាងនឹងផលិតវីដេអូបែបខ្មែរ និងចម្រៀងខ្មែរតាមការស្នើរសុំរបស់អ្នកគាំទ្រ ដែលគ្រោងការរបស់ Kon Ant ស្របគ្នានឹងអ្វីដែល ស្រីនា កំពុងគៀងគរបង្កើតឡើងតែម្តង៕