សម្ដេចតេជោចូលរួមដឹកនាំផ្ទាល់ការប្រកួតបាល់ទាត់សប្បុរសធម៌

2024-05-01 12:37:24
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញចូលរួមដោយផ្ទាល់ក្នុងកម្មវិធីប្រកួតសប្បុរសធម៌ក្រោមមូលបទ «រួមគ្នាដើម្បីសប្បុរសធម៌និងប្រយុទ្ធប្រឆាំងគ្រឿងញៀន» រវាងក្រុមបាល់ទាត់តារាកម្ពុជា និងក្រុមគុនខ្មែរ ដែលកំពុងប្រព្រឹត្តទៅពហុកីឡដ្ឋានជាតិអូឡាំពិក។ គេហទំព័រ Facebook របស់សម្តេចផ្ទាល់ កំពុងផ្សាយបន្តផ្ទាល់ការប្រកួតមួយនេះ។

សម្តេចតេជោបានចូលរួមកម្មវិធីក្នុងនាមជាគ្រូបង្វឹកកិត្តិយសរបស់ក្រុមបាល់ទាត់តារាកម្ពុជា ហើយបានអញ្ជើញចូលរួមដឹកនាំក្រុមដោយផ្ទាល់នៅទីកន្លែងគ្រូបង្វឹកនៅលើទីលានការប្រកួតនៅកីឡដ្ឋាន។ មុនការប្រកួត សម្តេចតេជោបានធ្វើការសំណេះសំណាលជាមួយក្រុមទាំងពីរ។

សូមបញ្ជាក់ផងដែរថា នាវេលាថ្ងៃនេះ ចាប់ពីពេលរសៀលមក មានការរៀបចំកម្មវិធីប្រកួតបាល់ទាត់សប្បុរសធម៌ក្រោមមូលបទ «រួមគ្នាដើម្បីសប្បុរសធម៌និងប្រយុទ្ធប្រឆាំងគ្រឿងញៀន» ក្នុងគោលបំណងសំខាន់ក្នុងការប្រមូលថវិកាជួយដល់មន្ទីរពេទ្យគន្ធបុប្ផា។ កម្មវិធីនេះ មានការប្រកួតចំនួនពីរ គឺប្រកួតរវាងក្រុមអ្នកផលិតមាតិកា និងក្រុមបាល់ទះ ហើយមួយប្រកួតទៀតគឺ ក្រុមតារាកម្ពុជា និងក្រុមគុនខ្មែរ។

យោងតាមគេហទំព័រផ្លូវការ Facebook របស់សម្តេចតេជោ គិតត្រឹមថ្ងៃទី ២៨ មេសា ឆ្នាំ ២០២៤ ចំនួនទឹកប្រាក់ដែលសប្បុរសជនចូលរួមក្នុងកម្មវិធីមួយនេះ តាមរយៈសម្ដេចគឺ ៤,៨ លានដុល្លារសហរដ្ឋអាមេរិក៕