វគ្គសាមគ្គីអូឡាំពិក ស្ដីពី គ្រូបង្វឹកកីឡាតេក្វាន់ដូ WT ជាឱកាសល្អជួយពង្រឹងសមត្ថភាពឆ្ពោះទៅរកភាពជោគជ័យ

2024-05-28 04:30:45
ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) វគ្គសាមគ្គីអូឡាំពិក ស្ដីពី គ្រូបង្វឹកកីឡាតេក្វាន់ដូ WT ដែលបញ្ចប់ទៅនេះនឹងធ្វើឲ្យសិក្ខាកាមចូលរួមបានពង្រឹងសមត្ថភាពរបស់ខ្លួនឈានទៅរកភាពជោគជ័យនៅថ្ងៃអនាគតបន្ថែម។

ឯកឧត្ដម វ៉ាត់ ចំរើន

ឯកឧត្ដម វ៉ាត់ ចំរើន អគ្គលេខាធិការ NOCC បានឲ្យដឹងថា នេះជាឱកាសដ៏ល្អមួយសម្រាប់សហព័ន្ធតេក្វាន់ដូ WT ដែលទទួលបាននូវវគ្គបណ្ដុះបណ្ដាលរបស់ Olympic Solidarity ដែលមានគ្រូកូរ៉េពោរពេញដោយបទពិសោធលើឆាកអន្តរជាតិក្នុងការបង្ហាត់បង្រៀនដល់សិក្ខាកាម។

តំណាង NOCC ខាងលើជឿជាក់ថាក្រោយបញ្ចប់វគ្គនេះទៅសិក្ខាកាមនឹងរឹតតែមានសមត្ថភាពបន្ថែមទៀតតាមរយៈចំណេះដឹងដែលទទួលបាន និងឈានទៅការផ្លាស់ប្ដូរនូវទំលាប់ចាស់ ពង្រឹងនូវចំណុចខ្វះខាតដែលខ្លួនធ្លាប់មានដើម្បីក្លាយជាធនធានថ្មីជួយអភិវឌ្ឍន៍វិស័យកីឡាតេក្វាន់ដូនេះឆ្ពោះទៅរកភាពជោគជ័យលើឆាកអន្តរជាតិជាដើម។

ទិដ្ឋភាពបិទវគ្គ

បញ្ជាក់ដែរថា វគ្គសាមគ្គីអូឡាំពិក ស្ដីពី គ្រូបង្វឹកកីឡាតេក្វាន់ដូ WT នេះធ្វើឡើងចាប់ពីថ្ងៃទី២១ ដល់ ២៧ ខែឧសភា ឆ្នាំ២០២៤។ សិក្ខាកាមចូលរួមសរុប ២៥នាក់ (ស្រី៨នាក់) មកពីខេត្តសៀមរាប បាត់ដំបង បន្ទាយមានជ័យ រាជធានីភ្នំពេញ។ គ្រូឧបទេសលោកស្រី Kim Byung hee។ ពិធីបិទវគ្គនេះធ្វើឡើងនៅ NOCC កាលពីព្រឹកម្សិលមិញដោយចូលរួមពីឯកឧត្ដម វ៉ាត់ ចំរើន និងគ្រូៗរបស់សហព័ន្ធតេក្វាន់ដូ WT ជាច្រើនរូប៕