អាហ្សង់ទីនកាក់កបយ៉ាងខ្លាំងរយៈពេល ៣ ឆ្នាំចុងក្រោយ

2024-07-15 14:58:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិអាហ្សង់ទីនទើបយកឈ្នះកូឡុំប៊ីក្នុងលទ្ធផល ១ ទល់នឹង ០ នៅវគ្គផ្ដាច់ព្រ័ត្រកម្មវិធី Copa America ឆ្នាំ ២០២៤។ ជ័យជំនះនេះ ធ្វើឲ្យអាហ្សង់ទីនឈ្នះពានធំៗដល់ទៅ ៤ ក្នុងរយៈពេល ៣ ឆ្នាំចុងក្រោយ។

អាហ្សង់ទីនគឺជាក្រុមជម្រើសជាតិដ៏ជោគជ័យមួយនៅទ្វីបអាមេរិកខាងត្បូង។ ទោះជាយ៉ាងណា ដោយបញ្ហាផ្សេងៗ ក្រុមជម្រើសជាតិមានការលំបាកក្នុងការដណ្ដើមពានធំៗក្នុងអំឡុងពាក់កណ្ដាលទសវត្សឆ្នាំ ១៩៩០ ទសវត្សឆ្នាំ ២០០០ និងទសវត្សឆ្នាំ ២០១០។ ក្នុងអំឡុងពេលជិត ៣០ ឆ្នាំនោះ គឺអាហ្សង់ទីនមិនបានឈ្នះពានធំៗសូម្បីតែម្ដង។

យ៉ាងនេះក្ដី អ្វីៗបានប្រែប្រួលនៅឆ្នាំ ២០២១។ អាហ្សង់ទីនបានឈ្នះពានកូប៉ាអាមេរិកឆ្នាំ ២០២១ ក្រោយយកឈ្នះម្ចាស់ផ្ទះប្រេស៊ីលក្នុងលទ្ធផល ១ ទល់នឹង ០។ ព្រឹត្តិការណ៍កូប៉ាគឺជាកម្មវិធីប្រកួតបាល់ទាត់ក្រុមជម្រើសជាតិដ៏ធំប្រចាំទ្វីបអាមេរិកខាងត្បូង។ ពានកូប៉ាឆ្នាំ ២០២១ គឺជាពានធំទីមួយដែលអាហ្សង់ទីនឈ្នះក្នុងរយៈពេលជិត ៣០ ឆ្នាំ។

នៅខែមិថុនា ឆ្នាំ ២០២២ ក្នុងនាមជើងឯកកូប៉ាអាមេរិក អាហ្សង់ទីនបានយកឈ្នះជើងឯកអឺរ៉ុបអ៊ីតាលីក្នុងលទ្ធផល ៣ ទល់នឹង ០។ ជ័យជំនះនេះ ធ្វើឲ្យអាហ្សង់ទីនឈ្នះពានមួយទៀត គឺពាន Finalissima ដែលជាពានដែលជើងឯកកូប៉ាអាមេរិក ត្រូវប៉ះជាមួយជើងឯកអឺរ៉ុប ដើម្បីរកជើងឯកប្រចាំទ្វីបទាំងពីរ។

នៅខែធ្នូ ឆ្នាំ ២០២២ អាហ្សង់ទីនធ្វើបានសម្រេចម្ដងទៀតក្នុងឈ្នះពានធំមួយទៀត នោះគឺ ពានជើងឯកពិភពលោក World Cup នៅប្រទេសកាតា ក្រោយយកជ័យជំនះលើបារាំងក្នុងវគ្គទាត់បាល់ទាត់ប៉េណាល់ទី។ ការឈ្នះពាន World Cup ឆ្នាំ ២០២២ គឺជាជោគជ័យធំណាស់សម្រាប់អាហ្សង់ទីន។ លើកចុងក្រោយដែលក្រុមជម្រើសជាតិនេះឈ្នះWorld Cup គឺនៅឆ្នាំ ១៩៨៦។

ដោយឡែកកាលពីពេលថ្មីៗកន្លងទៅ អាហ្សង់ទីនបានយកឈ្នះកូឡុំប៊ី ដណ្ដើមយកពានកូប៉ាអាមេរិកឆ្នាំ ២០២៤។ ការឈ្នះនេះ ធ្វើឲ្យអាហ្សង់ទីនក្លាយជាក្រុមជម្រើសជាតិដែលជោគជ័យជាងគេក្នុងប្រវត្តិសាស្ត្រជាង ១០០ ឆ្នាំនៃកម្មវិធីកំពូលជើងឯកបាល់ទាត់ប្រចាំទ្វីបអាមេរិក ក្រោយឈ្នះពានមួយនេះចំនួន ១៦ ដង ដែលជាកំណត់ត្រាច្រើនជាងក្រុមណាណាទាំងអស់។ ក្រុមជម្រើសជាតិដែលជោគជ័យបន្ទាប់គឺអ៊ុយរ៉ាហ្គាយដែលបានឈ្នះកូប៉ាអាមេរិកចំនួន ១៥ ដង៕