កីឡាករម្នាក់បដិសេធមិនចូលលេងប្រកួត Super Cup ឲ្យ Atlanta

2024-08-08 11:55:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Teun Koopmeiners បដិសេធមិនចូលរួមហ្វឹកហាត់ ឬលេងឲ្យក្លឹប Atlanta ទៀតទេ ព្រោះចង់ផ្ទេរចេញទៅចូលរួមជាមួយ Juventus។ នេះបើតាមសម្ដីរបស់លោក Gian Piero Gasperini អ្នកចាត់ការក្លឹប Atlanta។

លោក Gasperini បាននិយាយប្រាប់អ្នកសារព័ត៌មានថា ក្លឹប និងកីឡាករ Teun Koopmeiners មិនមានបញ្ហានឹងគ្នាឡើយ។ ទើបតែមួយសប្ដាហ៍ចុងក្រោយ ដែល Koopmeiners ប្ដូរឥរិយាបថមិនចូលរួមហ្វឹកហាត់ ឬលេងឲ្យក្លឹបទៀតឡើយ ព្រោះកីឡាករចង់ទៅចូលរួមជាមួយ Juventus។ យោងតាមការលើកឡើងរបស់អ្នកចាត់ការដដែល បានឲ្យដឹងទៀតថា Koopmeiners បានព្រមព្រៀងជាមួយ Juventus រួចរាល់ហើយ ដូច្នេះក្លឹប Atlanta គ្មានជម្រើសអ្វីក្រៅពីមិនប្រើប្រាស់ Koopmeiners ក្នុងប្រកួត Super Cup ជាមួយ Real Madrid នាពេលខាងមុខ។

ជើងឯក Europa League ក្លឹប Atlanta ត្រូវប៉ះជាមួយជើងឯក Champions League ក្លឹប Real Madrid ក្នុងកម្មវិធីដណ្ដើមពាន Super Cup នៅថ្ងៃព្រហស្បតិ៍ ទី ១៥ សីហា ឆ្នាំ ២០២៤ ខាងមុខ វេលាម៉ោង ២ ទៀបភ្លឺម៉ោងនៅកម្ពុជា។

Koopmeiners គឺជាខ្សែបម្រើសញ្ជាតិហុល្លង់វ័យ ២៦ ឆ្នាំ ដែលកំពុងលេងឲ្យក្លឹប Atlanta តាំងពីឆ្នាំ ២០២១ មក។ កីឡាករគឺជាខ្សែបម្រើបង្គោលរបស់ក្លឹប និងបានបង្ហាញទម្រង់លេងយ៉ាងល្អកាលពីរដូវកាលមុន ដោយលេងសរុប ៥១ ប្រកួត និងស៊ុតចូល ១៥ គ្រាប់ ហើយជួយក្លឹបឈ្នះពាន Europa League ដោយយកឈ្នះក្លឹបឡើងជើងអាល្លឺម៉ង់ Bayer Leverkusenក្នុងវគ្គផ្ដាច់ព្រ័ត្រ។

ការឡើងទម្រង់លេងរបស់កីឡាករនេះ ធ្វើឲ្យខ្សែបម្រើក្លាយជាគោលដៅយ៉ាងសំខាន់សម្រាប់ក្លឹបធំៗជាពិសេសក្លឹប Juventus និងហង្សក្រហម Liverpool។ តម្លៃផ្ទេររបស់ Koopmeiners គឺប្រមាណ ៥៥ លានដុល្លារសហរដ្ឋអាមេរិក។

ថ្វីបើអ្នកចាត់ការ Atlanta ពោលបែបនេះក្ដី យោងតាមការចុះផ្សាយព័ត៌មានធំៗ ការចរចារវាងក្លឹប និងក្លឹប Juventus ស្ថិតនៅដំណាក់កាលចាប់ផ្ដើមនៅឡើយ មិនទាន់មានអ្វីព្រមព្រៀងគ្នានៅឡើយ ជាពិសេសរឿងតម្លៃផ្ទេរកីឡាករ Koopmeiners។

គិតមកទល់ពេលនេះ Koopmeiners ផ្ទាល់ ក៏មិនទាន់ចេញមុខបកស្រាយការលើកឡើងរបស់អ្នកចាត់ការបច្ចុប្បន្នរបស់ខ្លួននៅឡើយ៕