De Gea ទម្លាយការពិត រឿងសម្រាកពីបាល់ទាត់ជិត ១៥ ខែ

2024-08-13 11:28:04
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅទីបំផុត អ្នកចាំទី David De Gea បានបង្ហើបពីមូលហេតុពិតនៃការសម្រាកពីការលេងបាល់ទាត់អាជីពជិត ១៥ ខែ។ មូលហេតុ គឺក្នុងអំឡុងពេលនោះ De Gea បានបាត់បង់ឆន្ទៈក្នុងការលេងបាល់អាជីព។

De Gea បានសម្រាកពីអាជីពបាល់ទាត់ប្រមាណមួយឆ្នាំជាងហើយ ក្រោយចែកផ្លូវជាមួយបិសាចក្រហម កាលពីពាក់កណ្ដាលឆ្នាំមុន បន្ទាប់ពីកីឡាករអេស្ប៉ាញ និងក្លឹបមិនអាចឯកភាពគ្នារឿងកុងត្រាថ្មីបាន។ អ្នកចាំទីរូបនេះ មិនដែលប្រាប់អ្នកសារព័ត៌មានទេថា មូលហេតុអីបានរូបគេសម្រាកបែបនេះ ហើយមិនចូលរួមជាមួយក្លឹបដទៃ។

កាលពីដើមសប្ដាហ៍នេះ កីឡាករបានត្រលប់លេងបាល់អាជីពវិញ បន្ទាប់ពីបានចូលរួមជាផ្លូវការជាមួយក្លឹបអ៊ីតាលី Florentina។

ក្រោយចូលរួមជាមួយក្លឹបថ្មី កីឡាករសញ្ជាតិអេស្ប៉ាញវ័យ ៣៣ ឆ្នាំរូបនេះ បានបង្ហើបជាសាធារណៈ មូលហេតុដែលរូបគេសម្រាកពីបាល់ទាត់ជាងមួយឆ្នាំនេះ គឺដោយសាររូបគេបានបាត់បង់ឆន្ទៈក្នុងការលេងបាល់ទាត់អាជីព បន្ទាប់ពីចំណាយពេលដល់ ១២ ឆ្នាំជាមួយក្លឹបយក្ស Manchester United។ ទើបតែឥឡូវឆន្ទៈនេះ ត្រលប់មកវិញ ព្រោះរូបគេមានឱកាសមកចូលរួមក្លឹប Florentina។

De Gea គឺជាវីរបុរសដ៏ស្មោះស្ម័គ្ររបស់ក្លឹបបិសាចក្រហម។ កីឡាករបានចំណាយពេល ១២ រដូវកាលនៅជាមួយក្លឹបពី ឆ្នាំ ២០១១ ដល់ ២០២៣ ហើយជួយក្លឹបក្នុងដំណាក់កាលលំបាកជាច្រើន ជាពិសេសនៅពេលក្លឹបធ្លាក់ទម្រង់លេងជាគំហុក ក្រោយការចូលនិវត្តន៍របស់អតីតអ្នកចាត់ការ Alex Ferguson កាលពីពាក់កណ្ដាលឆ្នាំ ២០១៣ មក។ កីឡាករលេងសរុប ៥៤៥ ប្រកួតឲ្យក្លឹប។

De Gea ត្រូវបានជំនួសដោយកីឡាករសញ្ជាតិកាមេរ៉ូន Andre Onana ក្នុងនាមជាអ្នកចាំទីដៃទីមួយរបស់ក្លឹប។ មុនមកលេងឲ្យបិសាចក្រហម Onana ចំណាយពេលមួយរដូវកាលនៅ Inter Milan និង ៦ រដូវកាលនៅហុល្លង់ជាមួយក្លឹប Ajax៕

ប្រភព៖ Goal អត្ថបទ៖ សេរី មង្គល