McTominay ចែកផ្លូវជាមួយបិសាចក្រហម

2024-08-27 12:52:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Scott McTominay ចេញពីក្លឹប Manchester United ទៅចូលរួមជាមួយក្លឹបអ៊ីតាលី Napoli។

យោងតាមការចុះផ្សាយរបស់សារព័ត៌មាន BBC បានឲ្យដឹងថា ទាំងភាគីបិសាចក្រហម និងភាគី Napoli បានឯកភាពរឿងតម្លៃផ្ទេរហើយ គឺប្រមាណ ៣៥ លានដុល្លារសហរដ្ឋអាមេរិក។ McTominay ក៏ព្រមចូលរួមជាមួយក្លឹបយក្សអ៊ីតាលីផងដែរ។ ខ្សែបម្រើការពារស្កុតឡែនវ័យ ២៦ ឆ្នាំរូបនេះ នឹងដំណើរទៅអ៊ីតាលីនាថ្ងៃនេះ ដើម្បីពិនិត្យសុខភាព។

បើមិនមានអ្វីប្រែប្រួលទេ ក្លឹប Napoli នឹងប្រកាសជាផ្លូវការអំពីការផ្ទេរចូលកីឡាករ McTominay នាពេលឆាប់ៗខាងមុខ។

McTominay គឺជាកីឡាករដែលដុះចេញពីថ្នាលយុវជនរបស់បិសាចក្រហម។ ខ្សែបម្រើបានរួមរស់ជាមួយក្លឹបទាំងពីឆ្នាំ ២០០២ មក ហើយឡើងទៅលេងឈុតធំចាប់ពីឆ្នាំ ២០១៧ កន្លងទៅ។ ក្នុងអាជីពឈុតធំ កីឡាកររូបនេះ លេងសរុបឲ្យក្លឹប ២៥៥ ប្រកួត និងស៊ុតចូល ២៩ គ្រាប់។

ខ្សែបម្រើ Scott McTominay គឺជាកីឡាករដ៏ចម្រូងចម្រាស់មួយសម្រាប់អ្នកគាំទ្រក្លឹបបិសាចក្រហម។ អ្នកគាំទ្រខ្លះពេញចិត្តនឹងទម្រង់លេងរបស់កីឡាកររូបនេះ ហើយចង់ឲ្យក្លឹបបន្តផ្ដល់ឱកាសឲ្យរូបគេ ដើម្បីបង្ហាញសមត្ថភាពក្លាយជាវីរបុរសរបស់ក្លឹប។ អ្នកគាំទ្រខ្លះទៀត មិនសប្បាយចិត្តនឹងទម្រង់លេងការពាររបស់កីឡាករ ជាពិសេសក្នុងប្រកួតសំខាន់ៗមួយចំនួន ហើយតែងតែទាមទារអំពាវនាវឲ្យក្លឹបផ្ទេរចូលកីឡាករល្អៗនៅតំបន់ខ្សែបម្រើ ដើម្បីបង្កើនគុណភាពក្រុម។

ការចាកចេញទៅចូលរួមជាមួយក្លឹបអ៊ីតាលី Napoli លើកនេះ គឺជាព្រឹត្តិការណ៍លើកទីមួយក្នុងអាជីពរបស់ McTominay ដែលរូបគេលេងឲ្យក្លឹបផ្សេងក្រៅពីបិសាចក្រហម។

ការផ្ទេរ McTominay នេះ ត្រូវបានមជ្ឈដ្ឋានជាច្រើនមើលឃើញ គឺដើម្បីបើកផ្លូវក្នុងការនាំចូលខ្សែបម្រើការពារសញ្ជាតិអ៊ុយរ៉ាហ្គាយវ័យ ២៤ ឆ្នាំ Manuel Ugarte ពីក្លឹប Paris Saint Germain។ Ugarte អាចនឹងចូលរួមបិសាចក្រហមនាពេលឆាប់ៗខាងមុខ ក្រោយលេចលឺដំណឹងថា Manchester United និង PSG កាន់នឹងខិតជិតព្រមព្រៀងតម្លៃផ្ទេររបស់កីឡាកររូបនេះ ដែលតម្លៃប្រមាណជាង ៧០ លានដុល្លារសហរដ្ឋអាមេរិក៕