ស្ពានអាកាសមរតកតេជោកម្ពស់ពីរជាន់នៅតំបន់ក្បាលថ្នល់ ក្នុងរាជធានីភ្នំពេញ ត្រូវបានសម្ពោធជាផ្លូវការនៅព្រឹកថ្ងៃនេះ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

ថ្លែងក្នុងឱកាសនោះ សម្តេចធិបតី ហ៊ុន ម៉ាណែត បានស្វាគមន៍ចំពោះសមិទ្ធផលថ្មីរបស់រាជធានីភ្នំពេញ និងបានសម្តែងនូវមោទនភាពចំពោះសមត្ថភាពរបស់ប្រជាជនកម្ពុជាដែលកាន់តែរីកចម្រើនក្នុងការសាងសង់គម្រោងហេដ្ឋារចនាសម្ព័ន្ធទ្រង់ទ្រាយធំ។

យោងតាមការបញ្ជាក់របស់ ឯកឧត្តម ឃួង ស្រេង អភិបាលរាជធានីភ្នំពេញ ស្ពានអាកាសនេះស្ថិតនៅចំនុចប្រសព្វនៃមហាវិថីសម្តេចតេជោ ហ៊ុន សែន (ផ្លូវ៦០ម៉ែត្រ) មហាវិថីព្រះមុនីវង្ស និងមហាវិថីកងយោធពលខេមរភូមិន្ទ (ផ្លូវ២៧១) ក្នុងខណ្ឌមានជ័យ និងខណ្ឌចំការមន។ លោកបានបញ្ជាក់ថា ការសាងសង់ស្ពាននេះបានចាប់ផ្តើមនៅថ្ងៃទី៣១ ខែសីហា ឆ្នាំ២០២២ និងបានបញ្ចប់ក្នុងរយៈពេលត្រឹម៣០ខែ ដែលលឿនជាងការគ្រោងទុក៦ខែ ជាមួយនឹងទឹកប្រាក់សរុបជិត ៣៦,៨លានដុល្លារអាមេរិក។

ស្ពានអាកាសនេះត្រូវបានរំពឹងថានឹងជួយសម្រួលចរាចរណ៍នៅផ្នែកខាងត្បូងនៃរាជធានីភ្នំពេញយ៉ាងច្រើន ដោយលោកអភិបាលបានបញ្ជាក់ថា វាជាផ្នែកមួយនៃយុទ្ធសាស្ត្រអភិវឌ្ឍន៍ទីក្រុងរបស់ភ្នំពេញ ដើម្បីពង្រឹងការតភ្ជាប់រវាងតំបន់សេដ្ឋកិច្ចរបស់ទីក្រុង និងខេត្តនានាតាមបណ្តោយផ្លូវជាតិលេខ១ និងលេខ២។

លោកបានបន្តថា ស្ពាននេះក៏នឹងជួយភ្ជាប់ទំនាក់ទំនងទៅកាន់គម្រោងហេដ្ឋារចនាសម្ព័ន្ធសំខាន់ៗដូចជា អាកាសយានដ្ឋានអន្តរជាតិថ្មី និងគម្រោងព្រែកជីកហ្វូណនតេជោ ដែលធ្វើឱ្យរាជធានីភ្នំពេញ កាន់តែមានភាពប្រកួតប្រជែង និងទាក់ទាញសម្រាប់វិនិយោគិនក្នុងស្រុក និងបរទេស។

បច្ចុប្បន្ន ស្ពានអាកាសដែលកំពុងដំណើរការនៅភ្នំពេញរួមមាន៖ ស្ពានអាកាសក្បាលថ្នល់ សម្ពោធនៅថ្ងៃទី២៤ ខែមិថុនា ឆ្នាំ២០១០, ស្ពានអាកាស៧មករា នៅថ្ងៃទី៦ ខែមករា ឆ្នាំ២០១២, ស្ពានអាកាសស្ទឹងមានជ័យ នៅថ្ងៃទី៣១ ខែកក្កដា ឆ្នាំ២០១៤, ស្ពានអាកាស៥មករា នៅថ្ងៃទី៥ ខែមករា ឆ្នាំ២០១៦, ស្ពានអាកាសឈប់ផ្សារដីហុយ នៅថ្ងៃទី២ ខែកក្កដា ឆ្នាំ២០១៨; ស្ពានអាកាសចោមចៅ នៅថ្ងៃទី៣១ ខែមីនា ឆ្នាំ២០២២, ស្ពានអាកាសឫស្សីកែវ នៅថ្ងៃទី៣១ ខែឧសភា ឆ្នាំ២០២៣, និងស្ពានអាកាសមរតកតេជោ នៅថ្ងៃទី ៧ ខែមេសា ឆ្នាំ ២០២៥នេះ៕