ព្រះសង្ឃជាន់ខ្ពស់ពីរអង្គ នៅប្រទេសថៃត្រូវបានចាប់ផ្សឹក បន្ទាប់ពីមានការរកឃើញ វីដេអូ សិច និង រូបភាពជាង ៨០,០០០ ដែលបង្ហាញពីទំនាក់ទំនងផ្លូវភេទរវាងស្ត្រីម្នាក់ និងព្រះសង្ឃជាន់ខ្ពស់នៅវត្តល្បីៗនៅទីក្រុងបាងកក និងខេត្តផ្សេងទៀត។

អាជ្ញាធរប៉ូលីសផ្នែកប្រឆាំងអំពើពុករលួយ (ACD) បានរកឃើញភស្តុតាងទាំងនេះ បន្ទាប់ពីការឆែកឆេរផ្ទះស្ត្រីម្នាក់ឈ្មោះ “ស៊ីកា ក” នៅថ្ងៃទី៤ ខែកក្កដា ឆ្នាំ២០២៥។ ពីទូរស័ព្ទចំនួនប្រាំរបស់នាង ប៉ូលីសបានរកឃើញរូបភាព និងវីដេអូដែលបង្ហាញពីទំនាក់ទំនងផ្លូវភេទ ជាមួយព្រះសង្ឃជាន់ខ្ពស់នៅវត្តល្បីៗ។ អាជ្ញាធរបានកំណត់អត្តសញ្ញាណព្រះសង្ឃចំនួនប្រាំបីអង្គរួចហើយ ដោយបីអង្គត្រូវបានបញ្ជាក់ថាបានបំពានវិន័យសង្ឃ ដែលនាំឱ្យមានការចាប់ផ្សឹក។

ក្នុងចំណោមព្រះសង្ឃទាំងនេះ ព្រះថេប វចិរថេរ៉ាភន ដែលជាចៅអធិការវត្តព្រះពុទ្ធជ័យនៅខេត្តសារ៉ាបុរី ត្រូវបានប៉ូលីសនាំខ្លួន នៅខេត្តសមុទ្រប្រាកាន។ ព្រះអង្គបានយល់ព្រមសឹក បន្ទាប់ពីប៉ូលីសបង្ហាញភស្តុតាងវីដេអូ។ ព្រះអង្គ បានសារភាពថាមានទំនាក់ទំនងស្នេហាជាមួយស្ត្រីឈ្មោះ “ស៊ីកា ក” ឬហៅថា “ស៊ីកា ហ្គោល” អស់រយៈពេលជាច្រើនឆ្នាំ និងថែមទាំងមានគម្រោងសឹក ដើម្បីរៀបការជាមួយនាង មុននឹងរកឃើញថានាងមានទំនាក់ទំនងស្នេហាជាមួយព្រះសង្ឃជាន់ខ្ពស់ផ្សេងទៀត។

ប៉ូលីសកំពុងបន្តស្វែងរកព្រះគ្រូ សិរិវិរិយធន នៃវត្តសុធន ដែលនៅតែកំពុងរត់គេចខ្លួន។ ការស៊ើបអង្កេតក៏កំពុងបន្តទាក់ទងនឹងការសង្ស័យពីអំពើពុករលួយផ្នែកហិរញ្ញវត្ថុ ដោយប៉ូលីសបានរកឃើញថា ស្ត្រីឈ្មោះ “ស៊ីកា ក” បានទទួលការផ្ទេរប្រាក់ពីព្រះសង្ឃជាន់ខ្ពស់យ៉ាងហោចណាស់ ១៥ អង្គក្នុងរយៈពេលប៉ុន្មានកន្លងមក។

អ្នកស៊ើបអង្កេត បានរំពឹងថានឹងរកឃើញភស្តុតាងទាក់ទងនឹងករណីពុករលួយនៅក្នុងវត្ត ប៉ុន្តែជំនួសមកវិញ ពួកគេបានរកឃើញឯកសារអាសអាភាសដែលបង្ហាញពីទំនាក់ទំនងផ្លូវភេទរវាងស្ត្រីនេះ និងព្រះសង្ឃជាន់ខ្ពស់មួយចំនួន។ ស្ត្រីនេះក៏មានកូនបីនាក់អាយុ ១៣, ១០ និង ៦ ឆ្នាំ ជាមួយព្រះសង្ឃជាន់ខ្ពស់មួយចំនួនដែលត្រូវបានសឹក រួចហើយ។

រឿងអាស្រូវនេះបានបង្កឱ្យមានការភ្ញាក់ផ្អើលជាខ្លាំង នៅក្នុងប្រទេសថៃ ដែលជាប្រទេសមានប្រជាជនភាគច្រើនកាន់ព្រះពុទ្ធសាសនា។ អាជ្ញាធរបាននិយាយថា ការស៊ើបអង្កេតនឹងបន្តដើម្បីកំណត់អត្តសញ្ញាណព្រះសង្ឃផ្សេងទៀតដែលពាក់ព័ន្ធ និងដើម្បីធានាថាអ្នកបំពានវិន័យសង្ឃនឹងគេចមិនផុតពីសំណាញ់ច្បាប់ឡើយ៕