នាព្រឹកថ្ងៃទី 07 ខែកុម្ភៈ ឆ្នាំ 2026 ក្រុមហ៊ុន អឺបេនលែន (Urbanland) បានរៀបចំពិធីសម្ពោធបើកដំណើរការផ្លូវការរបស់ផ្សារសហគមន៍ ខេ ម៉ល ព្រែកត្នោត ដែលជាភាពជោគជ័យថ្មីមួយក្នុងការនាំមកនូវបទពិសោធន៍នៃការរស់នៅ ការទិញទំនិញ និងការបង្កើតទំនាក់ទំនងកាន់តែប្រសើរក្នុងសហគមន៍។ ទីតាំងផ្សារស្ថិតនៅតាមបណ្តោយផ្លូវជាតិលេខ 2 ជាប់នឹងច្រកចេញចូលបុរីចន្ទគីរី 1 មានចម្ងាយត្រឹមតែ 4 នាទីប៉ុណ្ណោះពីរង្វល់មូលគួរស្រូវ និង 5 នាទីពីស្ពានអាកាសភ្លោះសម្តេចមហាបវរធិបតី ដែលអាចបម្រើតម្រូវការរបស់ម្ចាស់ផ្ទះបុរីចន្ទគីរី 1 និងបុរីចន្ទគីរី 2 ក៏ដូចជាប្រជាជនរស់នៅក្នុងសហគមន៍ជុំវិញ។ សូមបញ្ជាក់ផងដែរថាផ្សារសហគមន៍ថ្មីនេះ បានចាប់ផ្តើមបើកដំណើរការសាកល្បងកាលពីថ្ងៃទី 16 ខែមករា ឆ្នាំ 2025 ដោយបង្ហាញពីការប្តេជ្ញាចិត្តរបស់ក្រុមហ៊ុន អឺបេនលែន ក្នុងការអភិវឌ្ឍគម្រោងប្រកបដោយការយកចិត្តទុកដាក់ខ្ពស់។

ផ្សារសហគមន៍ ខេ ម៉ល ព្រែកត្នោត បានស្វាគមន៍ដៃគូសហការជាច្រើនដូចជាហាងម្ហូបអាហារ ភេសជ្ជៈ ហាងទំនិញ និងសេវាកម្មផ្សេងៗ រួមមាន៖ ហាងកាហ្វេ BROWN Coffee & Bakery ផ្សារទំនើប Lucky Supermarket ភោជនីយដ្ឋានស៊ុបចិន Kungku Kitchen ក្លឹបហាត់ប្រាណ Fitology Gym & Fitness ហាងមាន់បំពង Lucky Chicken ហាង​ Snow Yogurt ហាងភេសជ្ជៈ​ D'Yogurt Bar ហាងការ៉េម Mixue​ ភោជនីយដ្ឋាន ពូបុត្រ និងការិយាល័យលក់បុរីចន្ទគីរី ដែលបង្កើតជាគោលដៅជួបជុំដ៏រស់រវើកសម្រាប់ការរស់នៅពេញលេញ និងកាន់តែងាយស្រួលរបស់សហគមន៍។

លោក កាំង ហុក អគ្គនាយកប្រតិបត្តិនៃក្រុមហ៊ុន អឺបេនលែន (Urbanland) បានមានប្រសាសន៍ថា៖ “ផ្សារសហគមន៍ ខេ ម៉ល ព្រែកត្នោតបានបង្ហាញពីទស្សនវិស័យដែលជឿជាក់ថា ផ្សារសហគមន៍មិនត្រឹមតែជាគោលដៅទិញទំនិញតែប៉ុណ្ណោះទេ ប៉ុន្តែជាទីតាំងជួបជុំដ៏ជិតស្និទ្ធមួយសម្រាប់ប្រជាជនខ្មែរ រចនាដើម្បីផ្សារភ្ជាប់មនុស្សគ្រប់រូប សម្រួលដល់ជីវិតប្រចាំថ្ងៃ និងពង្រឹងការលូតលាស់របស់សហគមន៍ជុំវិញផងដែរ។ ក្រុមហ៊ុន អឺបេនលែន (Urbanland) ផ្តោតយ៉ាងសំខាន់ទៅលើគុណភាព និងផាសុកភាព ដោយមានគោលបំណងចម្បងក្នុងការបម្រើដល់តម្រូវការអ្នករស់នៅក្នុងរយៈពេលយូរអង្វែង ដូច្នេះហើយផ្សារសហគមន៍ ខេ ម៉ល ព្រែកត្នោត គឺជាជំហានដ៏សំខាន់ និងរឹងមាំមួយរបស់យើងក្នុងការសម្រេចគោលដៅនេះ។”

ក្នុងពិធីសម្ពោធបើកដំណើរការផ្លូវការនេះដែរ អតិថិជនអាចនាំក្រុមគ្រួសារ និងមិត្តភក្តិមករីករាយកម្សាន្ត ពិសារអាហារ ទិញទំនិញ និងសម្រាកលម្ហែកាយក្នុងបរិយាកាសបៃតងស្រស់បំព្រង ស្ថិតលើផ្ទៃដីជាង 8,000 ម៉ែត្រការ៉េ រចនាបែបបើកចំហអមដោយសួនធម្មជាតិ Courtyard រួមទាំងកន្លែងលេងសម្រាប់កុមារ និងទីធ្លាធំទូលាយសម្រាប់ការជួបជុំជាមួយសកម្មភាពសប្បាយៗផ្សេងៗ។

បន្ទាប់ពីភាពជោគជ័យនៃផ្សារទំនើប ខេ ម៉ល វេង ស្រេង ដែលជាផ្សារទំនើបសហគមន៍ដំបូងគេរបស់ក្រុមហ៊ុន​​​ អឺបេនលែន (Urbanland) ដោយបច្ចុប្បន្នបានទទួលស្វាគមន៍ភ្ញៀវប្រមាណ 6,300 នាក់ក្នុងមួយថ្ងៃ ជាមួយហាងទំនិញល្បីៗ និងហាងម្ហូបអាហារជាច្រើនចំនួនជាង 40 សម្រាប់សហគមន៍តំបន់ វេង ស្រេង ក្រុមហ៊ុន អឺបេនលែន ក៏នឹងបន្តនាំមកនូវបទពិសោធន៍ថ្មីប្លែកតាមរយៈ ផ្សារសហគមន៍ ខេ ម៉ល ព្រែកត្នោត ដើម្បីបម្រើដល់សហគមន៍ជុំវិញតំបន់ព្រែកត្នោតផងដែរ។

អំពីក្រុមហ៊ុន អឺបេនលែន (Urbanland)

ក្រុមហ៊ុន​ អឺបេនលែន (Urbanland) គឺជាក្រុមហ៊ុនអភិវឌ្ឍអចនទ្រព្យក្នុងស្រុកឈានមុខគេមួយ បានបង្កើតឡើងនៅឆ្នាំ 2013 ដោយស្ថាបត្យករ លោក កាំង ហុក ក្នុងគោលដៅបង្កើតទីកន្លែងប្រកបដោយគុណភាព និងភាពច្នៃប្រឌិតខ្ពស់ ដើម្បីបម្រើដល់មនុស្សគ្រប់រូបអាចរស់នៅ ធ្វើការ និងកម្សាន្តប្រកបដោយផាសុកភាព។ គ្រប់គម្រោងទាំងអស់ត្រូវបានរចនាផ្អែកទៅលើគុណភាព ភាពឋិតឋេរ និងភាពផ្ចិតផ្ចង់ ដោយក្រុមហ៊ុន អឺបេនលែន ជឿជាក់ថាការផ្តោតលើតម្រូវការរបស់មនុស្សជាចម្បង គឺជាយុទ្ធសាស្រ្តដ៏ល្អបំផុតដើម្បីជួយលើកកម្ពស់គុណភាពនៃការរស់នៅឱ្យកាន់តែប្រសើរ និងការចូលរួមចំណែកអភិវឌ្ឍប្រទេសកម្ពុជា។