ពិភពបច្ចេកវិទ្យាកំពុងប្រឈមមុខនឹងរលកនៃការឡើងថ្លៃទំនិញថ្មីមួយទៀត ដែលអ្នកជំនាញហៅថា "RAMageddon" បន្ទាប់ពីតម្លៃស្មាតហ្វូន ឡេបថប និងម៉ាស៊ីនហ្គេម (Gaming Consoles) បាននិងកំពុងហក់ឡើងខ្ពស់ទូទាំងសកលលោក។ វិបត្តិនេះកើតឡើងដោយសារការកើនឡើងយ៉ាងគំហុកនៃតម្រូវការឈីបអង្គចងចាំ (Memory Chips/RAM) នៅក្នុងមជ្ឈមណ្ឌលផ្ទុកទិន្នន័យ (Data Centers) ដើម្បីបម្រើឱ្យបច្ចេកវិទ្យាបញ្ញាសិប្បនិម្មិត (AI)។

យោងតាមរបាយការណ៍ស្រាវជ្រាវពីស្ថាប័នជាច្រើន រួមទាំងក្រុមហ៊ុនវិភាគទីផ្សារ TrendForce និង Sigmaintell បានបង្ហាញថា នៅឆ្នាំ២០២៦ នេះ មជ្ឈមណ្ឌលទិន្នន័យ AI បានស្រូបយកផលិតកម្មឈីបអង្គចងចាំរហូតដល់ទៅ ៧០% នៃផលិតកម្មសរុបនៅលើពិភពលោក។ នេះមានន័យថា រាល់ឈីបចំនួន ១០ គ្រាប់ដែលផលិតបាន គឺមានរហូតដល់ ៧ គ្រាប់ត្រូវបានបញ្ជូនទៅកាន់ម៉ាស៊ីនមេ (Servers) របស់ក្រុមហ៊ុន AI ធំៗ ដែលបន្សល់ទុកចំណែកតិចតួចបំផុតសម្រាប់ក្រុមហ៊ុនផលិតឧបករណ៍អេឡិចត្រូនិកប្រើប្រាស់ទូទៅ។

ផ្អែកលើស្ថានភាពបច្ចុប្បន្ន ឥទ្ធិពលនៃវិបត្តិនេះបានជះទៅលើក្រុមហ៊ុនបច្ចេកវិទ្យាយក្ស និងអ្នកប្រើប្រាស់ផ្ទាល់៖

• ក្រុមហ៊ុន Apple និង Samsung ត្រៀមដំឡើងថ្លៃស្មាតហ្វូន៖ លោក Tim Cook នាយកប្រតិបត្តិក្រុមហ៊ុន Apple បានទទួលស្គាល់នៅក្នុងបទសម្ភាសន៍ជាមួយកាសែត The Wall Street Journal ថា ការឡើងថ្លៃផលិតផលគឺជារឿង «មិនអាចចៀសរួចឡើយ» ដោយសារតែតម្លៃគ្រឿងបង្គុំហក់ឡើងខ្ពស់ពេក។ ជាមួយគ្នានេះ ស្មាតហ្វូនលំដាប់កំពូលជំនាន់ថ្មីរបស់ Samsung ដូចជា Galaxy Z Fold 8 Ultra ត្រូវបានគេរំពឹងថាអាចនឹងមានតម្លៃកើនឡើងរហូតដល់ ២,១០០ ដុល្លារអាមេរិក។
• តម្លៃម៉ាស៊ីនហ្គេម និងឡេបថបកើនឡើង៖ ក្រុមហ៊ុនហ្គេមល្បីឈ្មោះ Valve ទើបតែបានប្រកាសចេញលក់ម៉ាស៊ីនហ្គេម "Steam Machine" ជំនាន់ថ្មីក្នុងតម្លៃរហូតដល់ទៅ ១,០៤៩ ដុល្លារអាមេរិក ដោយសារការចំណាយលើឈីបអង្គចងចាំកើនឡើងជាង ៣ ដងធៀបនឹងឆ្នាំមុនៗ។ ចំណែកឯតម្លៃឡេបថបធម្មតា ក៏ត្រូវបានគេព្យាករណ៍ថានឹងអាចកើនឡើងរហូតដល់ ៤០% ផងដែរ។
• ផលប៉ះពាល់ខ្លាំងលើទូរស័ព្ទតម្លៃសមរម្យ៖ ក្រុមហ៊ុនទូរស័ព្ទលំដាប់ថវិកា និងមធ្យម (ដូចជា Xiaomi, Realme, និងប្រ៊ែនចិនផ្សេងទៀត) កំពុងជួបសម្ពាធខ្លាំងជាងគេ ព្រោះប្រាក់ចំណេញរបស់ពួកគេមានកម្រិតទាបស្រាប់។ នៅពេលដែលតម្លៃ RAM កើនឡើងទ្វេដងក្នុងរយៈពេលតែមួយត្រីមាស ពួកគេគ្មានជម្រើសអ្វីក្រៅតែពីដំឡើងថ្លៃលក់ ឬកាត់បន្ថយទំហំ RAM នៅក្នុងទូរស័ព្ទម៉ូដែលថ្មីៗនោះឡើយ។

ខណៈពេលដែលអ្នកប្រើប្រាស់ត្រូវចំណាយប្រាក់កាន់តែច្រើន ក្រុមហ៊ុនផលិតឈីបឈានមុខគេដូចជា Samsung Electronics, SK Hynix និង Micron កំពុងទទួលបានផលចំណេញយ៉ាងមហាសាលពីវិបត្តិនេះ ដោយសារសមត្ថភាពផលិតរបស់ពួកគេត្រូវបានកក់ទុកពេញរហូតដល់ដាច់ឆ្នាំ។ អ្នកជំនាញផ្នែកឧស្សាហកម្មពាក់កណ្តាលចម្លង (Semiconductor) បានព្រមានថា ស្ថានភាពកង្វះខាតឈីបសម្រាប់ឧបករណ៍ប្រើប្រាស់ទូទៅនេះ អាចនឹងអូសបន្លាយរហូតដល់ឆ្នាំ ២០២៧ ឬ ២០៣០ ឯណោះ ព្រោះការសាងសង់រោងចក្រផលិតឈីបថ្មីត្រូវចំណាយពេលច្រើនឆ្នាំទម្រាំអាចដំណើរការបាន៕