ប្រកួតបាល់ទាត់កុមារអាយុក្រោម១៣ឆ្នាំ ២០១៥ រកឃើញជើងឯក

2015-06-27 21:09:41
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រកួតបាល់ទាត់របស់កុមារអាយុក្រោម១៣ឆ្នាំ ប្រចាំឆ្នាំ២០១៥ បានបញ្ចប់ទៅមុននេះបន្តិច ដែលកម្មវិធីនេះបានចាប់ផ្ដើមឡើងនាព្រឹកមិញនេះនៅតារាងបាល់ទាត់ KB ALL Sport Club, Phnom Penh ។

សកម្មភាពថតជុំគ្នា របស់កីឡាករ និង ថ្នាក់ដឹកនាំ

ព្រឹត្តិការណ៍បាល់ទាត់នេះមានការចូលរួមប្រកួតពីកុមារចំនួន២០០នាក់ មកពីសាលាចំនួន១៦ ដែលស្ថិតក្នុងរាជធានីភ្នំពេញ និងតាមបណ្ដាខេត្តនានាក្នុងប្រទេសកម្ពុជា។ ឆ្លងកាត់ការប្រកួតអស់រយៈពេលមួយព្រឹកធំ កម្មវិធីក៏បានរកឃើញក្រុមខ្លាំងចំនួន៤ គឺជើងឯកបានទៅ សាលាបឋមសិក្សាពោធិមង្គល ជើងឯករងបានមកសាលាបឋមសិក្សា ខ្យោង លេខ៣បានមកលើក្រុម តារាមាណា និងលេខ៤ បានមកក្រុម សាលាបឋមសិក្សាព្រែកកំពឹស។

ឆ្លៀតក្នុងឱកាសនោះ លោក លីម លូន សេង នាយកធនាគារ អ អេច ប៊ី (RHB) ក៏ប្រាប់ពីមូលហេតុក្នុងការបង្កើតព្រឹត្តិការណ៍ឡើងថា គោលដៅរបស់ក្រុមហ៊ុន គឺចង់ធ្វើយ៉ាងណាឲ្យកុមារមានភាពប្រសើរឡើងខាងផ្នែកកីឡា។ ម្យ៉ាងទៀត លោកក៏ចង់ឲ្យពូកគេមានឱកាសស្មើៗគ្នាក្នុងការស្វែងរកនូវមហិច្ឆតាកីឡារបស់ខ្លួន ស្របពេលវិស័យកីឡានៅកម្ពុជាកំពុងមានការរីកចំរើន។ មិនត្រឹមតែប៉ុណ្ណោះ លោកនឹងធ្វើយ៉ាងណាជួយជ្រោមជ្រែងគ្រប់វិស័យកីឡានៅកម្ពុជាតែម្ដង ប៉ុន្តែខណៈពេលនេះ បានជួយផ្នែកកីឡាបាល់ទាត់កុមារមួយផ្នែកហើយ។

លោក លីម លូន សេង

ជាមួយគ្នានោះដែរ លោក មៃ តុលា អគ្គលេខាធិការរងសហព័ន្ធបាល់ទាត់កម្ពុជាក៏មានចំណាប់អារម្មណ៍ផងដែរថា ធនាគារ អ អេច ប៊ី គ្រុបបានចូលរួមយ៉ាងសកម្មក្នុងកម្មវិធីបាល់ទាត់របស់កុមារជុំវិញបណ្ដាប្រទេសនៃតំបន់អាស៊ាន។ ប្រទេសកម្ពុជាវិញគឺបានទទួលការជួយគាំទ្រតាមរយៈថវិកា និងសម្ភារៈលើកទឹកចិត្តអស់រយៈពេលជាច្រើនឆ្នាំកន្លងមកហើយ ។

លោកក៏បានបញ្ជាក់បន្ថែមទៀតថា សហព័ន្ធកីឡាបាល់ទាត់កម្ពុជាតែងតែសម្លឹងរកប្អូនៗ កុមារជំនាន់ក្រោយដែលមានសក្ដានុពល និងទេពកោសល្យខ្ពស់ដើម្បីជួយវិស័យកីឡាបាល់ទាត់កម្ពុជាឲ្យកាន់តែរីកចំរើនខ្លាំងឡើង។ កម្មវិធីប្រកួតបាល់ទាត់កុមារអាយុក្រោម១៣ឆ្នាំ ប្រចាំឆ្នាំ២០១៥នេះ ធនាគារ អ អេច ប៊ី បានផ្ដល់ឱកាសឲ្យប្អូនក្មួយ របស់កម្ពុជាបានបង្ហាញទេពកោសល្យ និងដកស្រង់បទពិសោធន៍ក្នុងការប្រកួតជាលក្ខណៈទ្រង់ទ្រាយធំ។ គ្មានអ្នកណាមួយដឹងថា ក្មួយ និងកុមារទាំងអស់ក្នុងចំណោមក្មួយទាំងនេះនឹងក្លាយទៅជាកីឡាករជម្រើសជាតិនាពេលអនាគតនោះទេ។

កម្មវិធីប្រកួតបាល់ទាត់កុមារអាយុក្រោម១៣ឆ្នាំ ប្រចាំឆ្នាំ ២០១៥ នេះគឺ ជាសកម្មភាពជួយសង្គមមួយ ដែលផ្ដួចផ្ដើមរៀបចំដោយធនាគារ អ អេច ប៊ី គ្រុប ហើយក៏ជាសកម្មភាពមួយជួយសង្គម ដែលស្ដែងបញ្ជាក់អំពីទស្សនវិជ្ជា នៃការជួយជំរុញ និងបីបាច់ថែរក្សាក្នុងការអប់រំកុមារជំនាន់ក្រោយក្នុងសហគមន៍ទាំងនោះ ដែលមានវត្តមានធនាគារ អ អេច ប៊ី ជាអ្នកជួយជ្រោមជ្រែងទាំងស្រុង ។

ពានរង្វាន់លេខ១ទទួលបានពានមួយ និងមេដាយកិត្តិយស។ ចំពោះជើងឯករង លេខ៣ និងលេខ៤ ក៏មានវត្ថុអនុស្សាវរីយផ្សេងៗ និងមេដាយកិត្តិយសផងដែរ។ បន្ថែមពីលើរង្វាន់ទាំងនេះ ក្រុមហ៊ុន ធនាគារ អ អេច ប៊ី ក៏បានផ្ដល់ប្រាក់ចំនួន១ពាន់ដុល្លារអាមេរិកដើម្បីឲ្យកុមារទាំងអស់ទិញសម្ភារៈកីឡាផ្សែងៗបន្ថែមទៀត៕