ពហុកីឡដ្ឋានជាតិនឹងកាន់តែពិសេសប្លែកសម្រាប់ទទួលក្រុមជប៉ុន

2015-10-06 16:20:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពហុកីឡដ្ឋានជាតិរបស់ព្រះរាជាណាចក្រកម្ពុជានឹងកាន់តែពិសេសប្លែក ពេលទទួលក្រុមខ្លាំងលំដាប់ពិភពលោក ជប៉ុន នៅថ្ងៃទី១៧ ខែវិច្ឆិកាខាងមុខ។ ទីតាំងនៅក្នុងបរិវេណពហុកីឡដ្ឋានជាតិកំពុងត្រូវបានជួសជុលកែលម្អ និងលាបពណ៌បន្ថែមដើម្បីឲ្យកាន់តែមានសោភណភាព ក្នុងនាមជាម្ចាស់ផ្ទះការប្រកួតជម្រុះបាល់ទាត់ពិភពលោកឆ្នាំ២០១៨នៅតំបន់អាស៊ី ពូលE ជើងទីពីរ។

ពហុកីឡដ្ឋានជាតិ

តាមទំព័រហ្វេសប៊ុករបស់អគ្គនាយកដ្ឋានកីឡាបានឲ្យដឹងថា គណៈកម្មការបានចុះត្រួតពិនិត្យ ប្រគល់ការជួសជុលពង្រីកបន្ថែមជុំវិញទីលានបាល់ទាត់ ព្រមទាំងបំពាក់កៅអីជ័រនៅលើវេទិកាកិត្តិយស ជួសជុលប្រព័ន្ធលូបង្ហូរទឹកភ្លៀងនៅមុខវេទិកាកិត្តិយស។ បន្ទាប់ពីពិនិត្យតាមទីតាំងនានាដែលត្រូវជួសជុលរួច គណៈកម្មការបានពិនិត្យឃើញថា៖

១. កៅអីជ័របានបំពាក់រួចរាល់ហើយ នៅសល់តែការបាញ់លេខសម្គាល់តាមតំបន់នីមួយៗ ដែលក្រុមហ៊ុនត្រូវបញ្ចប់ការងារនេះ។

២. ចំពោះរបង និងប្រព័ន្ធលូបង្ហូរទឹកភ្លៀងនៅខាងមុខវេទិកាបានធ្វើរួចរាល់ និងអាចទទួលយកបាន។

៣. តំបន់ពង្រីកបន្ថែមជុំវិញទីលានអត្តពលកម្មត្រូវលាបពណ៌ខៀវ ចំណែកឯតំបន់នៅក្រោយបង្គោលទីខាងជើងត្រូវលាបពណ៌ក្រហម។

៤. ក្រុមហ៊ុនត្រូវបញ្ចប់ការលាបពណ៌ជញ្ជាំងផ្លូវដើរផ្នែកខាងក្នុងរហូតដល់បន្ទប់ទឹក និងចាក់បេតុងនៅផ្លូវចូលទីលានទាំងសង្ខាង តាមការឯកភាពនៃអង្គប្រជុំលើកមុន។

កិច្ចការនេះត្រូវបញ្ចប់ឱ្យបានមុនថ្ងៃទី១៧ ខែវិច្ឆិកា ឆ្នាំ២០១៥ ជាថ្ងៃដែលកម្ពុជាត្រូវធ្វើជាម្ចាស់ផ្ទះទទួលភ្ញៀវសាម៉ូរ៉ៃជប៉ុន ក្នុងជំនួបជម្រុះពានរង្វាន់បាល់ទាត់ពិភពលោក២០១៨ នៅប្រទេសរុស្ស៊ី។ កាលជើងទីមួយ កម្ពុជាបានចាញ់ក្រុមខ្លាំងនេះ ៣-០ នៅកីឡដ្ឋាន Saitama Stadium 2002 ក្រោមក្រសែភ្នែកអ្នកគាំទ្រប្រមាណជាង ៥ម៉ឺននាក់៕