Ford Adventure លើកទី ១០ ត្រៀមដំណើរឆ្ពោះទៅលេងបុរីរាម ប្រទេសថៃ

2016-11-28 05:14:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណើរកម្សាន្តប្រចាំឆ្នាំ FORD Adventure ជាលើកទី ១០ នឹងចាប់ផ្ដើមថ្ងៃទី ៨ ដល់ ១១ ខែធ្នូ ដើម្បីឆ្ពោះទៅកម្សាន្តខេត្តបុរីរាមប្រទេសថៃ។

លោក សេង វឹឹង(រូបពាក់អាវខៀវ)

លោក សេង វឹង នាយកគ្រប់គ្រងក្រុមហ៊ុន RMA Cambodia មានប្រសាសន៍ថា Ford Adventure ឆ្នាំនេះជាឆ្នាំទី ១០ គិតចាប់ពីការរៀបចំលើកដំបូងពីឆ្នាំ ២០០៧។

ដំណើរកម្សាន្ត Ford Adventure ឆ្នាំនេះ នឹងនាំអ្នកចូលរួមធ្វើដំណើរកម្សាន្តតាមក្បួនរថយន្តទៅខេត្តឧត្តរមានជ័យ និងបន្តឆ្ពោះទៅតំបន់ទេសចរណ៍គោលដៅខេត្តបុរីរាមនៃប្រទេសថៃ។

លោកថា អ្នកចូលរួមក្រៅពីអាចកម្សាន្តសប្បាយ អាចទស្សនាទេសភាព ព្រៃភ្នំនៅតាមដងផ្លូវ ក្នុងខេត្តសុរិន រួមជាមួយបទពិសោធន៍ បោះជំរំលើវាលស្មៅ និងដើរទិញទំនិញជាច្រើនសំបូរបែបខេត្តបុរីរាម និងកម្មវិធីកម្សាន្តសប្បាយៗជាច្រើនទៀត ក៏មានការចូលរួមចែកអំណោយសម្រាប់ពលរដ្ឋតាមមូលដ្ឋានផងដែរ។

ដំណើរកម្សាន្ត Ford Adventure បានរៀបចំដំបូងក្នុងឆ្នាំ ២០០៧ និងបន្តធ្វើជារៀងរាល់ឆ្នាំតាមគោលដៅតំបន់ទេសចរណ៍ក្នុងប្រទេសកម្ពុជា និងប្រទេសជិតខាង។ ឆ្នាំ ២០០៧ បានធ្វើដំណើរទៅខេត្តមណ្ឌលគិរី ឆ្នាំ ២០០៨ ទៅកាន់ខេត្តរតនគិរី ឆ្នាំ ២០០៩ ទៅកាន់ខេត្តបៃលិន ឆ្នាំ ២០១០, ២០១១ ទៅខេត្តចម្ប៉ាសាក់ប្រទេសឡាវ ឆ្នាំ ២០១២ ទៅកាន់ខេត្តមណ្ឌលគិរី ២០១៣ ទៅកាន់ខេត្តចម្ប៉ាសាក់ប្រទេសឡាវ ឆ្នាំ ២០១៤ ទៅកាន់ខេត្តត្រាតប្រទេសថៃ ឆ្នាំ ២០១៥ ទៅកាន់ខេត្តចន្ថាបុរី ប្រទេសថៃ និងលើកទី ១០ ទៅខេត្តបុរីរាមប្រទេសថៃ៕