RMA Cambodia ចែកអំណោយពលរដ្ឋ ២០០ គ្រួសារក្នុងខេត្តឧត្តរមានជ័យ

2016-12-09 08:03:31
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីរសៀលម្សិលមិញ ក្រុមហ៊ុន RMA Cambodia បានចុះចែកអំណោយដល់ពលរដ្ឋ ២០០ គ្រួសារនៅក្រុង សំរោង ខេត្តឧត្តរមានជ័យ នាព្រឹត្តិការណ៍ Ford Adventure 2016 ឆ្ពោះទៅខេត្តបុរីរាមប្រទេសថៃ។

អំណោយដែលក្រុមហ៊ុន RMA បានចែកជូនពលរដ្ឋទាំង ២០០ គ្រួសារនោះ ក្នុងមួយគ្រួសារទទួលបាន មុង ភួយ សារុង ទឹកត្រីកន្លះឡូ អង្ករ ២០គីឡូក្រាម និងមី ១កេះ។

លោក ងន សាំង អគ្គនាយកក្រុមហ៊ុន អ.អិម.អេ ខេមបូឌា បានថ្លែងក្នុងឱកាសចុះចែកអំណោយដល់ពលរដ្ឋក្រុងសំរោង ដូច្នេះថា ក្រៅពីការធ្វើជំនួញយ៉ាងជោគជ័យក្នុងប្រទេសកម្ពុជា ក្រុមហ៊ុនក៏បានរួមចំណែកត្រឡប់ទៅវិញជួយដល់សង្គមជាតិរៀងរាល់ឆ្នាំ។ កន្លងមកក្រុមហ៊ុន បានជួយសាងសង់សាលារៀន បណ្ណាល័យ ផ្ដល់ថវិកាមួយចំនួនសម្រាប់ការថែទាំប្រាសាទ និងចែកអំណោយដល់ពលរដ្ឋតាមតំបន់នានាទូទាំងប្រទេស។

លោក បន្ថែមថា RMA Cambodia ក៏បានដើរតួមួយផ្នែកក្នុងការផ្ដល់ការងារដល់ពលរដ្ឋកម្ពុជាផងដែរ។ បច្ចុប្បន្នបុគ្គលិកកំពុងបម្រើការនៅក្រុមហ៊ុនសរុបទូទាំងប្រទេសមានប្រមាណជាង ២ពាន់នាក់ ក្នុងនោះមានជនបរទេសតែ ៨នាក់ប៉ុណ្ណោះ។

អ អិម អេ ខេមបូឌា បានរៀបចំដំណើរកម្សាន្ត Ford Adventure 2016 រយៈពេល ៤ថ្ងៃ ពីថ្ងៃទី ០៨ ដល់ ១១ ធ្នូ ឆ្នាំ ២០១៦ ដោយមានអ្នកចូលរួមប្រមាណ ៤០០នាក់និងរថយន្ត Ford ៨០គ្រឿង។ អ្នកចូលរួមក្នុងព្រឹត្តិការណ៍នេះនឹង រីករាយ ជាមួយទេសភាព ព្រៃភ្នំនៅតាមដងផ្លូវ ក្នុងទឹកដីខេត្តឧត្តរមានជ័យ រួមនឹងបទពិសោធន៍ បោះជុំរុំដ៏អស្ចារ្យនៅលើវាលស្មៅយ៉ាងស្រស់ត្រកាល នៃខេត្តបុរីរាម ប្រទេសថៃ៕