ស្រាសរមាសហែកល្បីខ្លាំងដុតឆេះ ជាតិអាល់កុលលើសស្រាបៀជាង ១០ដង

2016-12-14 23:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រុករមាសហែក ជាកន្លែងដែលល្បីថាបិតស្រាសឆ្ងាញ់ និងខ្លាំងរហូតអាចដុតឆេះ ព្រោះមានជាតិអាល់កុលដល់ទៅ ៥៥% លើសស្រាបៀធម្មតាជាង ១០ដង ដែលមានកម្រិតជាតិអាល់កុលជាមធ្យម ៤.៥%។ ដោយសារបែបនេះហើយ ទើបមានអ្នកទៅទិញហូរហែទាំងភ្នំពេញ បាវិត ធ្លាយដល់ប្រទេសវៀតណាមផង។ នេះបើតាមការឲ្យដឹងពីអ្នកស្រី ឡឹក រិះ ជាអ្នកបិតស្រានៅភូមិសំរោង ឃុំអង្គព្រះស្រែ ស្រុករមាសហែក ខេត្តស្វាយរៀង។

អ្នកស្រី ឡឹក រិះ បានប្រាប់ក្រុមការងារ ផ្លូវទៅស្រុក ថា ស្រាដែលកំពុងបិតរាល់ថ្ងៃមាន ៣ប្រភេទ គឺតម្លៃ ២ពាន់រៀល ៣ពាន់រៀល និង ៥ពាន់រៀល។ ចំពោះបរិមាណដែលបិតបានពីអង្ករមួយតៅ គឺ ១៨លីត្រសម្រាប់តម្លៃ ២ពាន់រៀល ១៣លីត្រសម្រាប់តម្លៃ ៣ពាន់រៀល និងបានត្រឹម ៨លីត្រប៉ុណ្ណោះសម្រាប់តម្លៃ ៥ពាន់រៀល។

អ្នកបិតស្រានៅស្រុករមាសហែករូបនេះ បាននិយាយថា ចំពោះស្រាដែលមានកម្រិតជាតិអាល់កុលចាប់ពី ៥០% ឡើងទៅ គឺអាចដុតឆេះហើយ ប៉ុន្តែស្រាដែលអ្នកស្រីបិតខ្លាំងបំផុត មានជាតិអាល់កុលដល់ទៅ ៥៥%។ ចំពោះស្រាលំដាប់ទី២ តម្លៃ ៣ពាន់រៀល មានជាតិអាល់កុល ៤៥% និងលំដាប់ទី៣ តម្លៃ ២ពាន់រៀល មានជាតិអាល់កុល ៣៨%។

អ្នកស្រីបានបន្តថា រយៈពេលបិតគឺ ៥ថ្ងៃ ដោយក្នុងនោះត្រូវដាំបាយ ផ្អាប់ទុក ៤យប់ ទើបដាក់ឆ្នាំងបិតចេញជាស្រា។ រាល់ថ្ងៃ ស្រាដែលលក់ដាច់ខ្លាំង មានតែប្រភេទតម្លៃ ២ពាន់រៀលប៉ុណ្ណោះ ព្រោះស្រាដែលបិតខ្លាំង មិនសូវមានអ្នកអាចផឹកបាន លុះត្រាតែទិញយកទៅត្រាំលាយជាមួយថ្នាំ ឬផ្លែឈើជាដើម៕