ព្រះអង្គធំវត្តព្រែកអំបិល ល្បីថានៅបាតទន្លេប៉ុន្តែស្រង់មិនបាន

2016-12-21 23:28:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មានការល្បីតៗគ្នាថា ព្រះអង្គធំនៅវិហារចាស់ ក្នុងវត្តព្រែកអំបិល ត្រូវបានខ្មែរក្រហមច្រានទម្លាក់ទឹក ដោយសារមានឫទ្ធិអំណាចរហូតវាយបំផ្លាញមិនបាន។ សព្វថ្ងៃមានតែចាស់ៗប៉ុណ្ណោះ ដែលដឹងរឿងនេះ ហើយក៏ធ្លាប់ធ្វើពិធីស្រង់ដែរ តែព្រះអង្គមិនបង្ហាញឲ្យឃើញ។

វិហារចាស់ក្នុងវត្តព្រែកអំបិល

លោក ឡៅ ឡូ ជាអាចារ្យម្នាក់នៅវត្តព្រែកអំបិល បាននិយាយថា រឿងល្បីតគ្នាព្រះអង្គធំស្ថិតនៅបាតទន្លេជារឿងពិត។ លោកថា ព្រះអង្គធំនៅវិហារចាស់ក្នុងវត្តព្រែកអំបិល ត្រូវខ្មែរក្រហមច្រានទម្លាក់ទឹក ព្រោះមិនអាចវាយបំផ្លាញឲ្យបែកជាបំណែកបាន។ ផុតសម័យខ្មែរក្រហម ទូកចាមបានជួយរាវរកដែរ ប៉ុន្តែមិនឃើញ ហើយក្រោយមកក៏មានការបន់ស្រន់ ៣យប់ ៣ថ្ងៃដើម្បីស្រង់ ក៏នៅតែមិនប្រទះ។ រឿងរ៉ាវនេះបានស្ងប់ស្ងាត់ទៅវិញ ហើយក៏គ្មានអ្នករវល់រកតទៅទៀត ព្រោះគិតថារកមិនឃើញ។

លោក ឡៅ ឡូ

ចំណែកលោកតា ពុយ នៅ ជាចាស់ព្រឹទ្ធាចារ្យម្នាក់នៅឃុំព្រែកអំបិល បានអះអាងថា ធ្លាប់ប៉ះចំខ្នងព្រះអង្គធំនៅពេលងូតទឹកក្នុងទន្លេ ប៉ុន្តែមិនចាំច្បាស់នៅឆ្នាំណាឡើយ។ លោកថា រូបសំណាកព្រះអង្គធំនេះមានអំណាចណាស់ ទើបធ្វើឲ្យទាហានខ្មែរក្រហមវាយមិនបែក ហើយច្រានទម្លាក់ទឹក។ យ៉ាងណាក្ដៅ លោកតា ពុយ នៅ បានបញ្ជាក់ថាធ្លាប់ប៉ះរូបសំណាកនោះតែម្ដងគត់។

លោកតា ពុយ នៅ

ព្រះអង្គ មាស សំណាង ចៅអធិការវត្តព្រែកអំបិល បានមានសង្ឃដីកាថា ព្រះអង្គធំនៅវត្តនេះ ពិតជាត្រូវខ្មែរក្រហមច្រានទម្លាក់ទឹកមែន ព្រោះវាយបំបែកមិនបែក។ ប៉ុន្តែចំពោះទំហំប៉ុណ្ណា ហើយរឿងរ៉ាវយ៉ាងណានោះ ព្រះអង្គក៏មិនហ៊ានអះអាងច្បាស់ដែរ ព្រោះកើតមិនទាន់៕