ទីកម្សាន្តសំខាន់៧ដែលភ្ញៀវមិនអាចរំលងបាននៅខេត្តស្ទឹងត្រែង

2016-12-30 23:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ទឹងត្រែងត្រូវបានគេចាត់ទុកថាជាខេត្តដែលមានសក្ដានុពលទេសចរណ៍ខ្លាំងជាងគេនៅតំបន់ភាគខាងជើង។ ក្នុងខេត្តនេះមានតំបន់ទេសចរណ៍បែបវប្បធម៌ និងធម្មជាតិជាច្រើនដែលទទួលស្វាគមន៍ភ្ញៀវជាតិ និងអន្តរជាតិគ្រប់ពេលវេលា។ «ផ្លូវទៅស្រុក»សូមបង្ហាញតំបន់ទេសចរណ៍សំខាន់ទាំង៧ក្នុងចំណោមទីកន្លែងកម្សាន្តជាច្រើននៅខេត្តស្ទឹងត្រែង។

១- រមណីយដ្ឋានធម្មជាតិអូរច្រឡង់«ក្រមុំព្រហ្មចារី» នៅកណ្តាលព្រៃ

ទឹកអូរច្រឡង់

ទឹកហូរអូរច្រឡង់ ឬហៅថា អូរវែង ដែលស្ថិតនៅចម្ងាយ៤៤គីឡូម៉ែត្រ ពីក្រុងស្ទឹងត្រែង ប្រៀបដូចជា «ក្រមុំព្រហ្មចារី» នៅក្នុងព្រៃស្ងប់ស្ងាត់ បែបធម្មជាតិសុទ្ធសាធ ហើយភ្ញៀវទេសចរភាគច្រើន នៅមិនទាន់ស្គាល់ ឬទៅលេងច្រើននោះទេ។

២- ជិះទូកមើលថ្ងៃលិចនៅស្ពានសេកុង ពិតជាគួរឲ្យគយគន់

ទិដ្ឋភាពថ្ងៃជិតលិច

ព្រះអាទិត្យរៀបអស្ដង្គតនៅស្ពានសេកុង ក្រុងស្ទឹងត្រែង បានចាំងផ្លាតនៅលើផ្ទៃទឹក ប្រៀបនឹងគ្រាប់ពេជ្រ រំលេចជាពណ៌មាស គួរឲ្យគយគន់មិនជិនណាយ ធ្វើឲ្យអារម្មណ៍ស្រស់ស្រាយ ស្បើយអស់ទុក្ខកង្វល់។ តាមធម្មតាមភ្ញៀវមិនសូវចាប់អារម្មណ៍ ប៉ុន្តែពេលសាក់ល្បងម្តងនឹងមានអារម្មណ៍ចង់ទៅម្តងទៀត។

៣- រមណីយដ្ឋានធម្មជាតិអូរឫស្សីកណ្ដាលមានទាំងស្ពានយោល

ស្ពានយោលអូរឫស្សី

រមណីយដ្ឋានធម្មជាតិអូរឫស្សីកណ្ដាល ស្ថិតនៅភាគខាងត្បូងទីក្រុងស្ទឹងត្រែងប្រមាណ៣០គីឡូម៉ែត្រជាទីកម្សាន្តដ៏ពេញនិយមមួយសម្រាប់អ្នកខេត្តស្ទឹងត្រែង និងភ្ញៀវពីចម្ងាយ។ លេងទឹកអូរថ្លាខ្មៅលើថ្ម គ្រប់ដោយព្រឹក្សាលតាវល្លិ៍ដ៏ត្រជាក់ចិត្ត និងមានស្ពានយោលថែមទៀតផង។

៤- ទឹកជ្រោះល្បាក់ខោនប្រៀបផ្ទាំងគំនូរឯកនៅជាប់ព្រំដែនឡាវ

ទឹកជ្រោះល្បាក់ខោន

ទឹកធ្លាក់លើផ្ទាំងសិលាយក្សនេះមានឈ្មោះដល់ទៅ៣ដែលត្រូវបានអ្នកស្រុកនិយាយតៗពីគ្នាគឺអ្នកខ្លះហៅ ទឹកជ្រោះសុភមិត្រ អ្នកខ្លះហៅ ល្បាក់ខោន ឬក៏ហៅព្រះនិម្មិត។ ប៉ុន្តែឈ្មោះដែលគេនិយមហៅជាងគេគឺល្បាក់ខោន។ វាស្ថិតនៅភាគខាងប្រទេសកម្ពុជាដែលជាប់នឹងព្រំដែនឡាវ។ វាគឺជាតំបន់មួយដែលទន្លេមេគង្គហូរឆ្លងកាត់ចុះចេញពីខ្ពង់រាបធ្លាក់ចូលមកទន្លេមេគង្គក្នុងទឹកដីនៃប្រទេសកម្ពុជា។ ទឹកធ្លាក់ល្បាក់ខោន ឬទឹកធ្លាក់សុភមិត្រស្ថិត នៅក្នុងឃុំ ព្រះរំកិល ស្រុកថាឡាបូរិវ៉ាត់ដែលមានចម្ងាយប្រមាណជិត៨០គីឡូម៉ែត្រពីខេត្តស្ទឹងត្រែង និងស្ថិតក្នុងភូមិ កំពង់ស្រឡៅ ស្រុកឆែប ដែលមានចម្ងាយជាង១០០គីឡូម៉ត្រពីខេត្តព្រះវិហារ៕

៥- ព្រះរំកិលជាអន្លង់ផ្សោតនៅជាប់ទល់ដែនឡាវ

ព្រះរំកិលជាប់ទឹកដីឡាវ

តំបន់ព្រះរំកិលជាអន្លង់ផ្សោតឈើទាល ស្ថិតនៅព្រំប្រទល់ខ្មែរឡាវ ក្នុងទឹកដីឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែង និងមានចម្ងាយប្រហែល ៦៩គីឡូម៉ែត្រពីទីរួមខេត្ត។ ពេលទៅដល់មាត់ទន្លេមេគង្គនៅព្រះរំកិល នៅម្ខាងទន្លេមានកោះស្ដាំ ស្រុកចំប៉ាសាក់ ប្រទេសឡាវ រីឯកោះខាងស្ដាំដៃឈ្មោះថា «កោះល្ង»ជាកោះខ្មែរ រីឯប្រជាជននៅទីនោះ ក៏ចេះនិយាយភាសាឡាវច្រើនផងដែរ។

៦- ល្អាងភ្នំប្រាក់ជាតំបន់បោះជំរំក្នុងព្រៃដ៏ពិសេស

រូងក្រោមថ្ម

ល្អាងភ្នំប្រាក់ ស្ថិតនៅជើងភ្នំប្រាក់ មានចម្ងាយប្រហែល១៨គីឡូម៉ែត្រ ពីឃុំអូរស្វាយ។ ដើម្បីទៅដល់ល្អាងភ្នំមួយនេះ ភ្ញៀវទេសចរត្រូវធ្វើដំណើរដោយជិះទូកតាមដៃទន្លេមេគង្គ រយៈពេលប្រហែល១ម៉ោង ទើបដល់ភូមិវឿនសៀន រួចបន្តធ្វើដំណើរដោយថ្មើរជើង ឬជិះគោយន្តចូលទៅព្រៃ៣គីឡូម៉ែត្រទៀត។ វាស្ថិតនៅតំបន់ភ្នំដែលមានទាំងរូងថ្ម និងព្រៃឈើរាប់សិបហិចតាដែលអាចក្លាយជាកន្លែងបោះជំរំដ៏អស្ចារ្យបាន។

៧- ទស្សនាព្រៃលិចទឹកតាមដៃទន្លេមេគង្គនៅអូរស្វាយ

ឫសឈើដៃតាមព្រែកនៅទន្លេមេគង្គឃុំអូរស្វាយ

ព្រៃលិចទឹកនៅតាមដៃទន្លេមេគង្គជាកន្លែងកម្សាន្តដ៏កម្រមួយនៅប្រទេសកម្ពុជាដែលមនុស្សគ្រប់គ្នាប្រាថ្នាចង់ឃើញ។ ព្រៃលិចទឹកនេះត្រូវបានគេហៅថា រុំាសា (តំបន់អភិរក្សលិចទឹក)មានចម្ងាយរាប់គីឡូម៉ែត្រតាមដងទន្លេមេគង្គ នៅឃុំអូរស្វាយ ស្រុកថាឡាបូរិវ៉ាត ខេត្តស្ទឹងត្រែង។ តំបន់រុំាសា (តំបន់អភិរក្ស លិចទឹក) ដែលមានសត្វផ្សោតតាមដងទន្លេមេគង្គ សត្វបក្សាបក្សី សត្វព្រៃ ជាច្រើនទៀត។ វាប្រៀបបាននឹងត្បូងពេជ្រដ៏មានតម្លៃ ដែលបានផុសឡើងពីទឹកតាមបណ្ដោយទន្លេមេគង្គ។ វាបានផ្តល់នូវសម្បត្តិព្រៃឈើដ៏ ប្រសើរ ដែលជាជម្រកដ៏ប្រសើរសម្រាប់សត្វព្រៃ។

អត្ថបទ៖ ជាន ចាន់រ៉ា