តោះស្គាល់គ្រូក្រុមទាំង១២លីគកម្ពុជា២០១៧ឲ្យច្បាស់ទាំងអស់គ្នា

2017-01-20 01:55:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្របខ័ណ្ឌបាល់ទាត់លីគកំពូលកម្ពុជាឆ្នាំ២០១៧នេះមាន១២ក្រុមដែលត្រូវប្រជែងគ្នាចាប់ពីថ្ងៃទី១៨ ខែកុម្ភៈ ដល់ថ្ងៃទី១៩ ខែវិច្ឆិកា ឆ្នាំ២០១៧។ មុនការប្រកួតលីគកំពូលចាប់ផ្ដើមថ្ងៃនេះ Sabay សូមណែនាំប្រិយមិត្តឲ្យស្គាល់កម្រិតនៃការសិក្សា បទពិសោធន៍ និងស្រុកកំណើតរបស់គ្រូបង្គោលទាំង១២ក្លឹប។

២ លោក មាស ចាន់ណា ៖ បច្ចុប្បន្នជាគ្រូបង្វឹកក្រុមបាល់ទាត់ ណាហ្គាវើល ។ លោកជាគ្រូកម្រិត A-license ដែលមានស្រុកកំណើតមកពីខេត្តកំពង់ស្ពឺ និងបានចាប់ផ្ដើមធ្វើជាគ្រូបង្វឹកធំនាឆ្នាំ២០១៥ ជាគ្រូបង្គោលក្លឹបណាហ្គាវើល។

លោក មាស ចាន់ណា

២ លោក ទេព ឡុងរចនា ៖ គ្រូបង្វឹកក្រុមក្រសួងការពារជាតិជាគ្រូបង្វឹកកម្រិត A-license ។ លោកចាប់ផ្ដើមបង្វឹកក្រុមទ័ពតាំងពីឆ្នាំ២០០២ ដែលពេលនោះដឹកបានមួយរដូវកាល។ ក្នុងឆ្នាំដដែលនោះលោកក៏ជាគ្រូបង្ហាត់ក្រុមជម្រើសជាតិកម្ពុជាក្រោមអាយុ១៤ឆ្នាំផងដែរ។ លោកកើតនៅខេត្តកំពង់ឆ្នាំង។

លោក ទេព ឡុងរចនា

៣ John McGlynn ៖ បច្ចុប្បន្នជាគ្រូបង្វឹកក្រុមបឹងកេតអង្គរ ដែលទើបឡើងកាន់តំណែងថ្មីៗនេះជាគ្រូកម្រិត A-license មានសញ្ជាតិអូស្ត្រាលី។ ធ្លាប់ដឹកនាំបឹងកេតបានម្ដងរួចមកកាលពីកំឡុងចុងឆ្នាំ២០១៤។

លោក McGlynn

៤ លោក Oleg Starynskyi ៖ គ្រូបង្ហាត់កម្រិត UEFA B-license ជាជនជាតិអ៊ុយក្រែនមានអាយុ៣០ឆ្នាំចូលរួមជាមួយភ្នំពេញក្រោនតាំងពីខែកុម្ភៈ ឆ្នាំ២០១៦ក្នុងនាមជាគ្រូថ្នាល។ លោកធ្លាប់ចំណាយពេលវេលា៣ឆ្នាំកន្លះនៅប្រទេសម៉ាឡេស៊ី ដោយធ្វើជាគ្រូជំនួយក្រុមជម្រើសជាតិម៉ាឡេស៊ីអាយុក្រោម១៧ឆ្នាំបាន៦ខែ។

លោក Oleg Starynskyi

៥ លោក សំ វ៉ាន់ដេត ៖ គ្រូបង្វឹកក្លឹបព្រះខ័នរាជស្វាយរៀងបញ្ចប់កម្រិត B-license។ លោកដែលមានស្រុកកំណើតនៅខេត្តតាកែវបានចាប់ផ្ដើមបង្ហាត់បាល់ទាត់តាំងពីឆ្នាំ២០០២ ដោយធ្វើជាគ្រូជំនួយរបស់ព្រះខ័នរាជ និងចាប់ផ្ដើមធ្វើជាគ្រូបង្គោលនាឆ្នាំ២០១៣ ដោយដឹកនាំព្រះខ័នរាជស្វាយរៀងនេះរហូតដល់សព្វថ្ងៃ។

លោក សំ វ៉ាន់ដេត

៦ លោក ហុក សុជីវ័ន្ត ៖ គ្រូបង្ហាត់ក្លឹប Cambodian Tiger ជាគ្រូបង្ហាត់បាល់ទាត់កម្រិត A-license។ លោកបានចាប់ផ្ដើមបង្ហាត់ក្រុមបាល់ទាត់ខេត្តស្ទឹងត្រែងនាឆ្នាំ២០០៧ ដល់ឆ្នាំ២០១២។ លោកធ្វើជាគ្រូជំនួយជម្រើសជាតិ U-22 និងគ្រូជំនួយជម្រើសជាតិកម្ពុជា។ ឆ្នាំ២០១៥ លោកបានដឹកនាំ U-19 ជម្រើសជាតិកម្ពុជាបានមួយឆ្នាំ។ លោកមានស្រុកកំណើតនៅភ្នំពេញ។

លោក ហុក សុជីវ័ន្ត

៧ លោក ស៊ុំ វណ្ណា ៖ គ្រូបង្វឹកក្រុមវេស្ទើនភ្នំពេញ មានកម្រិតបង្ហាត់ C-license និងធ្លាប់បានបញ្ចប់បរិញ្ញាបត្រនៅប្រទេសគុយបាផ្នែកបាល់ទាត់ ។ លោកមានស្រុកកំណើតនៅទីរួមខេត្តកំពង់ឆ្នាំង។ ផ្នែកបាល់ទាត់លោកចូលរួមធ្វើជាគ្រួជំនួយនៅក្លឹបបៀលប្រាយចន្លោះចុងឆ្នាំ២០១៣ ដល់ពាក់កណ្ដាលឆ្នាំ២០១៥ និងចាប់ផ្ដើមធ្វើជាគ្រូធំដើមឆ្នាំ២០១៦ កំឡុងដឹកនាំស៊ីម៉ាក់។

លោក ស៊ុំ វណ្ណា

៨ លោក ផាន់ ចាន់ផាត ៖ ជាគ្រូបង្វឹកក្រុមបាល់ទាត់គីរីវង់សុខសែនជ័យបច្ចុប្បន្ន។ លោកជាគ្រូបង្ហាត់កម្រិត C-license ដែលចាប់ផ្ដើមធ្វើជាគ្រូជំនួយក្លឹបគីរីវង់ឆ្នាំ២០០៩។ តាមគម្រោងក្លឹបមួយនេះគ្រោងនាំយកគ្រូថ្មីសម្រាប់រដូវកាល២០១៧។ នេះបើតាកការបញ្ជាក់របស់លោក ផាន់ ចាន់ផាត។

លោក ផាន់ ចាន់ផាត

៩ លោក ប្រាក់ វុទ្ធី ៖ គ្រូបង្វឹកក្លឹបអគ្គិសនីកម្ពុជាជាប់កម្រិត A-license និងមានស្រុកកំណើតមកពីខេត្តតាកែវ។ លោកមានស្នាដៃជួយបឹងកេតលើកពានលីគកំពូលកម្ពុជាកាលពីឆ្នាំ២០១២។

លោក ប្រាក់ វុទ្ធី (ស្ពាយកាបូប)រូបថត៖ អគ្គិសនី

១០ លោក ណែម សុភ័ណ្ឌ ៖ រដូវកាលថ្មីនេះជាគ្រូស៊ីម៉ាក់។ លោកជាគ្រូកម្រិត B-license ដែលចាប់ផ្ដើមបង្ហាត់បាល់ទាត់នាកំឡុងឆ្នាំ២០០២ ដែលពេលនោះជាគ្រូបង្ហាត់បាល់នៅវិទ្យាល័យស៊ីសុវត្ថិ ដល់ឆ្នាំ២០០៦ ទើបលោកចូលខ្លួនបង្ហាត់បាល់ទាត់អាជីព។ លោកមានស្រុកកំណើតនៅខេត្តភ្នំពេញ។

ក្រុម ស៊ីម់ាក់

១១ លោក ពាស សុធី ៖ ជាគ្រូជំនួយក្លឹបអគ្គស្នងការដ្ឋាននគរបាលជាតិដែលត្រូវបានតែងតាំងជាគ្រូបង្គោលបណ្ដោះអាសន្នសម្រាប់រដូវកាល២០១៧នេះ។ លោកជាគ្រូកម្រិត C-license ដែលចាប់ផ្ដើមបង្ហាត់បាល់ទាត់ជាគ្រូជំនួយរបស់ក្លឹបប៉ូលិសនាកំឡុងឆ្នាំ២០១០។ លោកមានស្រុកកំណើតនៅភ្នំពេញ។

ក្រុម ប៉ូលិស

១២ លោក សុក វាសនា ៖ ជាគ្រូបង្វឹកក្រុមអាស៊ីអឺរ៉ុបនារដូវកាល២០១៧។ លោកជាគ្រូកម្រិត C-license ដែលបានចាប់ផ្ដើមបង្ហាត់បាល់ទាត់នាកំឡុងឆ្នាំ២០១២ កាន់យុវជន U-13 និង U-15 ក្លឹបព្រះខ័នរាជស្វាយរៀង។ ចូលដល់ឆ្នាំ២០១៤-២០១៦ លោកមកកាន់យុវជន U-19 ព្រះខ័នរាជស្វាយរៀង។ លោក វាសនា មានស្រុកកំណើតនៅភ្នំពេញ។