គម្លាតតម្លៃខុសគ្នាដូចមេឃដី រវាងសិល្បៈបុរាណ និងសម័យ តើជារឿងយុត្តិធម៌ទេ?
- 2017-12-24 02:53:26
- ចំនួនមតិ 0 | ចំនួនចែករំលែក 0
គម្លាតតម្លៃខុសគ្នាដូចមេឃដី រវាងសិល្បៈបុរាណ និងសម័យ តើជារឿងយុត្តិធម៌ទេ?
ចន្លោះមិនឃើញ
សិល្បៈបុរាណ ជាសិល្បៈតំណាងឲ្យជាតិ ជាឫសគល់វប្បធម៌ដែលជាមរតកល្អឯកមិនអាចកាត់ថ្លៃបាន។ ប៉ុន្តែតម្លៃខ្លួនចេញសម្ដែងរវាងសិល្បករបុរាណ និងសម័យ ដែលជាទម្រង់ជួយស្ទួយវប្បធម៌ជាតិបែរជាមានភាពខុសគ្នាទៅវិញ។
តាមការសិក្សាកន្លងមក សង្កេតឃើញថាជីវិតអ្នកសិល្បៈបុរាណមានជីវភាពក្រីក្រលំបាកតោកយ៉ាកភាគច្រើន។ ជាការពិតណាស់បើប្រៀបធៀបតម្លៃខ្លួនក្នុងការចេញសម្ដែងកាន់តែខុសគ្នាសែនឆ្ងាយទៅទៀតរវាងទម្រង់សិល្បៈទាំងពីរនេះ។
ជុំវិញភាពខុសគ្នារវាងតម្លៃនៃការសម្ដែងសិល្បៈបុរាណ និងសម័យ លោក ព្រឿង ឈាង ទីប្រឹក្សាក្រសួងវប្បធម៌ និងវិចិត្រសិល្បៈ និងសិល្បករជើងចាស់ម្នាក់ បានបង្ហាញទស្សនៈផ្ទាល់ខ្លួនថា លោកមិនច្រណែន ឬអន់ចិត្តអ្វីចំពោះការឲ្យតម្លៃជួលពេលទៅសម្តែងម្តងនោះទេ។ ប៉ុន្តែលោកសូមឲ្យអ្នកគ្រប់គ្នាពិចារណានៅពេលដែលជួលក្រុមបុរាណសម្ដែងម្តងៗ ដែលគ្នាជាង១០០នាក់ក្នុងកម្មវិធីធំមួយ ឲ្យតម្លៃមិនស្មើអ្នកសិល្បៈសម័យល្បីមួយរូបផង។ លោកព្រឿង ឈាងបានប្រាប់ Sabay ទាំងមុខស្ងួតថា អ្នកសិល្បៈបុរាណសម្ដែងរាប់ឆ្នាំនៅតែក្រ តែពួកគេធ្វើរាល់ថ្ងៃនេះ ធ្វើព្រោះក្តីស្រលាញ់ទេ។
«ការពិតយើងក៏មានការរង្កៀសចិត្តដែរ! ឧទាហរណ៍យើងចេញទៅសម្ដែងម្តងមានគ្នា១៥០នាក់ ទាំងអ្នកតែងខ្លួន អ្នកភ្លេង អ្នកសម្ដែង ហើយខាងក្រុមសម័យ មាន១៥នាក់ ! គេទួលបានម្នាក់ ៣ ០០០ដុល្លា ចំពោះអ្នកល្បីខ្លាំង ចំណែកពួកខ្ញុំ ទៅមួយក្រុមជាង១០០នាក់ សុំតែ ១ ០០០ដុល្លា នៅតថ្លៃទៀត សូមពិចារណាមើល តើយុត្តិធម៌ ឬអត់? យើងមិនចង់បានដល់ស្មើគេ ឬ សុំ៥០ % នៃគេនោះទេ តែយើងសុំត្រឹមតម្លៃអ្នកល្បីម្នាក់ ចែកឲ្យយើងមួយក្រុមក៏បានដែរ តែសូមកុំតថ្លៃទៀត»។
អ្នកណាក៏ដឹងនិយាយស្ទាត់មាត់ថា «វប្បធម៌រលត់ជាតិរលាយ វប្បធម៌ពណ្ណរាយជាតិថ្កើនថ្កាន» តែអ្នកដែលរក្សាខឿនវប្បធម៌ដ៏ផូរផង់ពីអតីតកាលហាក់ដូចជាបាក់ទឹកចិត្ត ចំពោះការឲ្យគុណតម្លៃផ្សេងគ្នាបែបនេះដែរ។
នាដការីរបាំបុរាណម្នាក់បច្ចុប្បន្នជាសាស្ត្រាចារ្យ សុំមិនបញ្ចេញឈ្មោះក៏បានបង្ហាញអារម្មណ៍មិនសប្បាយចិត្តចំពោះជញ្ជីងដែលថ្លឹងមិនស្មើគ្នា រវាងសិល្បៈបុរាណ និងសម័យនេះដែរ។ នាដការីរូបនេះបន្តថា អ្នកសិល្បៈបុរាណ គាត់ពិបាកច្រើនដូចជាការហ្វឹកហាត់ ការសម្ដែង និងត្រូវគ្រងសម្លៀកបំពាក់ដែលមានរឹបជាប់ខ្លួននិងមកុដពេលពាក់ជាប់ក្បាលកាន់យូរកាន់តែឈឺទៀតផង។ «ពេលខ្លះអាណិតខ្លួនឯងពេលចេញទៅសម្តែង ក្រោយពីចប់ឯងទៅបោះតង់ដេក ឯអ្នកសម័យគេឡើងសណ្ឋាគារ»។
ដូចគ្នានេះដែរ ឯកឧត្តម ថៃ នរៈសត្យា រដ្ឋលេខាធិការ ក្រសួងវប្បធម៌ និងវិចិត្រសិល្បៈ បានទទួលស្គាល់ចំពោះភាពមិនស្មើគ្នានេះ ឯកឧត្តមថា កន្លងមកក្រសួងក៏ធ្លាប់បានលើកឡើងពីបញ្ហា និងបានឃើញពីបញ្ហាទាំងអស់នេះដែរ។ ឯកឧត្តមបានលើកឡើងថា បើយើងចង់ឲ្យលើកស្ទួយសិល្បៈបុរាណ ទាល់តែបង្វែរការឧបត្ថម្ភដល់អ្នកបុរាណផង។
«ការអាក់អន់ចិត្តរបស់សិល្បករ ពិតជាត្រឹមត្រូវណាស់ អ្នកណាក៏អាក់អន់ស្រពន់ចិត្តដែរ នៅពេលជញ្ជីងតែមួយថ្លឹងចេញទម្ងន់ផ្សេងគ្នាឆ្ងាយបែននេះ។ ប៉ុន្តែបើចង់ឲ្យស្មើគ្នាក៏មិនបាន អីចឹងបើមិនបានស្មើគ្នា ក៏ឲ្យកុំឲ្យមានគម្លាតឆ្ងាយពីគ្នាពេក យើងចង់ថែរក្សាសិល្បៈបុរាណទាល់តែបង្កើនការគាំទ្រពួកគាត់» ឯកឧត្តម ថៃ នរៈសត្យា បន្ថែម។
ចុងក្រោយរដ្ឋលេខាធិការ ក្រសួងវប្បធម៌ និងវិចិត្រសិល្បៈរូបនេះ ស្នើសុំឲ្យម្ចាស់កម្មវិធី និងអ្នកឧបត្ថម្ភកម្មវិធីគួរគិតគូរពីបញ្ហាទាំងនេះ ដើម្បីភាពរីកចម្រើននៃសិល្បៈខ្មែរ៕