ថ្មីៗ​នេះ​ Apple បាន​ចេញ​មុខ​ទទួល​ស្គាល់​ថា​​ បាន​​បន្ថយ​ល្បឿន​​ iPhone ​ដែល​មាន​ថ្ម​អាយុ​កាល​យូរ​​ ដោយ​ចេតនា​ដើម្បី​ទប់​ស្កាត់​បញ្ហា​ដែល​ធ្វើ​ឲ្យ​ទូរសព្ទ​រលត់​ដោយ​ខ្លួន​ឯង។ មាន​វិធី​មួយ​អាច​ឲ្យ​អ្នក​ឆែក​មើល​ថា​ iPhone របស់​អ្នក​ស្ថិត​ក្នុង​ចំណោម​ iPhone ដែល​រងគ្រោះ​នេះ​ដែរ​ឬ​អត់។

ដំបូង​ត្រូវ​ដឹង​ថា​ iPhone ដែល​ Apple បាន​បន្ថយ​ល្បឿន​ មាន​ដូច​ជា​ iPhone 6, iPhone 6s, iPhone SE និង iPhone 7 ដែល​មាន​ប្រើ​ប្រព័ន្ធ​ប្រតិបត្តិការ​ iOS ចាប់​ពី​​ជំនាន់​ទី​ 10.2.1 ឡើង​ទៅ។ ការ​បន្ថយ​ល្បឿន​នេះ​​កើត​មាន​លើ​ iPhone ដែល​​ថាមពល​ថ្ម​មាន​សេសសល់​ចាប់​ពី​​​ ៨០% ​ចុះ​​​ (មាន​ន័យ​ថា​ថ្ម​ខូច​អស់​ ២០%)។

ដើម្បី​ឆែក​មើល​ថា​ថ្ម iPhone របស់​អ្នក​ខូច​ប៉ុន្មាន​ភាគ​រយ​ ត្រូវ​ដំឡើង​កម្មវិធី​មួយ​ឈ្មោះ​ថា​ Battery Life ដែល​មាន​នៅ​លើ​ App Store។

ពេល​ដំឡើង​កម្មវិធី​នេះ​រួច​ ចូល​ទៅ​កាន់​ Wear Level ដែល​វា​នឹង​បង្ហាញ​ថា​ថ្ម​ទូរសព្ទ​របស់​អ្នក​ខូច​ប៉ុន្មាន​ភាគ​រយ​។

ឬ​អាច​ចុច​លើ​ Raw Data ដើម្បី​អាច​មើល​ទិន្នន័យ​អំពី​ថ្ម​បាន​កាន់​តែ​ច្បាស់។

បើ​ iPhone អ្នក​មាន​ Wear Level ដល់​ ២០% ឡើង​ មាន​ន័យ​ថា​ល្បឿន​​ដំណើរ​ការ​​ធម្មតា​លើ​ស្មាតហ្វូន​របស់​អ្នក​ត្រូវ​បាន​កាត់​បន្ថយ​​​ ដើម្បី​ទប់​ស្កាត់​​​កុំ​ឲ្យ​ស្មាតហ្វូន​រលត់​ដោយ​ខ្លួន​ឯង​ ​ហើយ​វា​ដំណើរ​ការ​លឿន​តែ​នៅ​ពេល​ចាំ​បាច់​ប៉ុណ្ណោះ។

​​Apple បាន​បញ្ជាក់​ថា​ ថ្ម​​របស់​ iPhone ផលិត​ឡើង​ដោយ​វា​​​អាច​រក្សា​ជីវិត​បាន​ ៨០% នៃ​ថាមពល​ថ្ម​ដើម​ ក្រោយ​ពី​សាក​មួយ​ពេញ​អស់​ ៥០០ លើក។ ​មាន​ន័យ​ថា​ប្រសិន​បើ​អ្នក​សាក​បំពេញ​ថ្ម​ iPhone មួយ​ថ្ងៃ​ម្ដង​ នោះ​ជីវិត​​ថ្ម​ iPhone ​នឹង​​នៅ​សល់​ ៨០% ​ក្រោយ​ពី​ប្រើ​បាន​ជាង​មួយ​ឆ្នាំ៕

ប្រភព៖ redmondpie   ប្រែ​សម្រួល៖ សុខហេង