Mourinho បែររ៉ាដាទៅ Dybala?

2017-12-26 14:01:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យចចាមអារ៉ាមមួយបានឆាបឆួលមែនទែនក្នុងថ្ងៃនេះ បន្ទាប់ពីសារព័ត៌មាន Daily Star បានចុះផ្សាយថា អ្នកចាត់ការក្លឹប Manchester United លោក Jose Mourinho កំពុងតែចង់បាន Paulo Dybala ឲ្យមកលេងនៅកីឡដ្ឋាន Old Trafford នារដូវកាលក្រោយ។

យោងតាមប្រភពមួយនេះ បានអះអាងថា លោក Mourinho កំពុងតែអន្ទះអន្ទែងក្នុងការតាមទិញកីឡាករខ្សែបម្រើប្រយុទ្ធ ក្នុងនោះ ជាគោលដៅសំខាន់របស់លោក។ Daily Sport បានថែមទាំងបន្តទៀតថា អ្នកចាត់ការសញ្ជាតិព័រទុយហ្គាល់រូបនេះ ជឿថា Dybala ពិតជាកីឡាករដែលក្រុមលោកកំពុងត្រូវការ ដោយសារតែល្បឿន បច្ចេកទេស និងភាពច្នៃប្រឌិតរបស់កីឡាករសញ្ជាតិអាហ្សង់ទីនរូបនេះ។

សូមបញ្ជាក់ផងដែរថា កាលពីពេលកន្លងទៅ ក៏មានពាក្យចចាមអារ៉ាមជាច្រើនដែលថា Antoine Griezmann អាចនឹងចាកចេញពី Atletico Madrid មកចូលរួមជាមួយក្លឹបបិសាចក្រហមនារដូវកាលក្រោយ។ ទោះជាយ៉ាងណា មួយរយៈចុងក្រោយ រឿងនេះ ហាក់ស្ងាត់បាត់ទៅវិញ បន្ទាប់ពីលេចលឺព័ត៌មានថា Barcelona កំពុងចែចូវកីឡាករសញ្ជាតិបារាំងរូបនេះដែរ៕

ប្រភព៖ Dailystar ប្រែសម្រួល៖ ហ៊ីម រស្មី