សហគ្រិន៖ របរណាដែលរកស៊ីមិនចេះអស់ ទើបរកស៊ីបានយូរអង្វែង
- 2018-01-08 00:30:00
- ចំនួនមតិ 0 | ចំនួនចែករំលែក 0
សហគ្រិន៖ របរណាដែលរកស៊ីមិនចេះអស់ ទើបរកស៊ីបានយូរអង្វែង
ចន្លោះមិនឃើញ
ក្រោយឆ្អិននឹងការងាររយៈពេល៥ឆ្នាំ អ្នកស្រី ឃីន ស្រីនាថ បានសម្រេចបោះបង់ការងារមានប្រាក់ខែដ៏ច្រើនក្នុងស្ថាប័នឯកជនមួយដើម្បីមកបើកក្រុមហ៊ុនដោយខ្លួនឯង ឈ្មោះថា VIRGO Cambodia។
ក្រុមហ៊ុននេះជាភ្នាក់ងាររើសបុគ្គលិក សម្រាប់បំពេញការងារឲ្យក្រុមហ៊ុនផ្សេងទៅតាមតម្រូវការ។
អ្នកស្រី ឃិត ស្រីនាថ ជាអតីបបុគ្គលិកផ្នែកធនធានមនុស្សនៅក្រុមហ៊ុនឯកជនមួយ មុននឹងអ្នកស្រីបើកក្រុមហ៊ុនផ្ទាល់ខ្លួល។ ដោយសារតែធ្វើការលើផ្នែកធនធានមនុស្សប្រាំឆ្នាំ បានធ្វើឲ្យអ្នកស្រីមានជំនាញច្បាស់លាស់ក្នុងការជ្រើសរើសបុគ្គលិកឲ្យត្រូវទៅតាមជំនាញ និងតម្រូវការរបស់ក្រុមហ៊ុននីមួយៗ។
ទោះបីជាអ្នកស្រីមានជំនាញបែបនេះក្តី ក៏អ្នកស្រីថាក្នុងជីវិតជាអ្នកជំនួញមិនមែនមានន័យថាជោគជ័យរហូត ឬមិនជួបបញ្ហានោះទេ។ អ្នកស្រីបន្តថាៈ « ការរកស៊ីជៀសមិនផុតពីបញ្ហា ប៉ុន្តែក៏មិនត្រូវខ្លាចបញ្ហា និងការបរាជ័យដែរ»។
សហគ្រិនថ្មីថ្មោងរូបនេះបញ្ជាក់ទៀតថា អ្វីដែលកាន់តែពិសេសនិងចាំបាច់នោះត្រូវមាន ផែនការអាជីវកម្មច្បាស់លាស់ រក្សាការងារប្រកបដោយវិជ្ជាជីវៈ និងផ្ដល់ទំនុកចិត្តខ្ពស់ដល់អតិថិជន។
ចំពោះថាហេតុអ្វីបានជាអ្នកស្រីចាប់យកអាជីវកម្មជាភ្នាក់ងារជ្រើសរើសបុគ្គលិកនេះ អ្នស្រីឆ្លើយយ៉ាងសាមញ្ញថារបរណាដែលមានតម្រូវការជាប្រចាំ គឺជារបរដែលមានជីវិតយូរអង្វែង។ អ្នកស្រីបញ្ជាក់យ៉ាងដូចនេះថាៈ « របរណាដែលរកស៊ីមិនចេះអស់ ទើបរកស៊ីបានយូរអង្វែង មិនបារម្ភខ្លាចគ្មានទីផ្សារនាពេលអនាគត»។
ការលើកឡើងបែបនេះ ដោយអ្នកស្រីមើលឃើញពីសន្ទុះនៃការស្វែងរកការងារពីសំណាក់និស្សិតដែលទើបបញ្ចប់ការសិក្សាពីមួយឆ្នាំទៅមួយឆ្នាំមានការកើនឡើង។ ម្យ៉ាងទៀតអ្នកស្រីថាបុគ្គលិកជំនាញ តែងផ្លាស់ប្ដូរការងារពីមួយទៅមួយ ឥតឈប់ឈរ ចំណែកឯក្រុមហ៊ុនធំៗមួយចំនួន ក៏មិនសូវមានពេលវេលាច្រើន សម្រាប់ជ្រើសរើសបុគ្គលិកដោយផ្ទាល់នោះទេ ហើយក៏មិនចង់ចំណាយប្រាក់ខែទៅលើបុគ្គលិកផ្នែកធនធានមនុស្សច្រើនពេកដែរ។
ត្រង់ចំណុចនេះអ្នកស្រី ជឿថាទៅថ្ងៃអនាគតក្រុមហ៊ុនភ្នាក់ងារជ្រើសរើសបុគ្គលិកសម្រាប់បម្រើការតាមក្រុមហ៊ុននឹងកាន់តែមានច្រើននិងដើរតួកាន់តែសំខាន់។
សម្រាប់អ្នកស្រី ឃិន ស្រីនាថ ក៏មានមហិច្ឆតាមិនធម្មតាដែរ ដោយអ្នកស្រីរំពឹងថាក្នុងរយៈពេល៥ ទៅ១០ឆ្នាំខាងមុខ ក្រុមហ៊ុនអ្នកស្រីនឹងក្លាយជាក្រុមហ៊ុនផ្ដល់សេវាជ្រើសរើសបុគ្គលិកមួយលេចមុខមាត់ថ្មី ឬក្លាយជាក្រុមហ៊ុនឯកជនលំដាប់អន្តរជាតិ៕
ចុចទស្សនាវីដេអូ៣០ដេលី៖