ឃើញគេវាយ Keyboard ពូកែស្ទាត់ជំនាញ ចង់ខ្លាំងដូចគេមានទៅពិបាកអី!

2018-01-08 00:41:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការវាយ Typing ឬប្រើប្រាស់ Keyboard ស្ទាត់ជំនាញលើកុំព្យូទ័រជាមូលដ្ឋានគ្រឹះដ៏សំខាន់មួយក្នុងការបំពេញការងារ, កិច្ចការសាលា ឬធ្វើឯកសារណាមួយ ដែលជួយឲ្យអ្នកចំណាយពេលខ្លី។ Sabay ចែករំលែកគន្លឹះអាថ៌កំបាំង ៦ ចំណុច ជួយពង្រឹងសមត្ថភាព Typing របស់អ្នករាល់គ្នា។

១.រៀបចំតុការងារឲ្យបានស្រស់ស្អាត:

បរិស្ថានស្អាតនៅជុំវិញខ្លួនអ្នកជាតម្រូវការដំបូង មុននឹងអ្នកដាក់ចិត្តអង្គុយរៀនអនុវត្តការវាយ Typing។ ត្រូវរៀបចំតុការងារឲ្យមានផាសុកភាព ជៀសវាងមានធូលីដី និងគ្មានរបៀបរៀបរយ។

២.រៀបចំបែបបទនៃការអង្គុយ:

ព្យាយាមអង្គុយឲ្យត្រង់ខ្នង ដាក់កដៃឲ្យស្មើទៅនឹងតម្រឹមនឹង Keyboard ដែលជួយឲ្យម្រាមដៃទាំងអស់ សម្របបានទៅនឹងគ្រាប់ចុចនីមួយៗ។ ជៀសវាងការធ្វើខ្លួនមិនស្វាហាប់ និងអង្គុយលើកៅអីឬអ្វីមួយដែលមានកម្ពស់ខ្ពស់ជ្រុល។

៣.ដាក់ម្រាមឲ្យត្រូវទីតាំង:

ចំណុចនេះសំខាន់ណាស់ ទោះទៅថ្ងៃមុខអ្នកក៏ត្រូវរក្សាការអនុវត្តបែបនេះដដែល។ ដើម្បីអាចប្រើប្រាស់ Keyboard បានរហ័សនិងត្រូវក្បួនខ្នាត ចាំបាច់ដាក់ម្រាមដៃឲ្យត្រូវតាមគ្រាប់ចុច។

ម្រាមចង្អុលដៃឆ្វេងដាក់លើអក្សរ F
ម្រាមកណ្តាលដៃឆ្វេងដាក់លើអក្សរ D
ម្រាមដៃនាងខាងឆ្វេងដាក់លើអក្សរ S
ម្រាមកូនដៃឆ្វេងដាក់លើអក្សរ A
ម្រាមចង្អុលដៃស្តាំដាក់លើអក្សរ J
ម្រាមកណ្ដាលដៃស្តាំដាក់លើអក្សរ K
ម្រាមដៃនាងខាងស្តាំដាក់លើអក្សរ L
ម្រាមកូនដៃស្តាំដាក់លើសញ្ញា (; និង :)
មេដៃទាំងឆ្វេងស្តាំដាក់លើប៊ូតុង Space bar

៤.សាកល្បងអនុវត្ត Typing លំហាត់ធម្មតា:

រៀនវាយអក្សរ asdf jkl;
បន្ទាប់មកវាយអក្សរធំ ASDF JKL;
សាកល្បងជួរក្រោមម្តង zxcvbnm,.
សាកល្បងជួរលើម្តងទៀត qwertyuiop

៥.រៀន Typing ដោយមិនចាំបាច់មើល:

ប្រសិនបើអ្នកអនុវត្តមកដល់ចំណុចនេះហើយ អ្នកប្រាកដជាមានអារម្មណ៍ប្លែកនិងគិតថាខ្លួនឯងចេះប្រើប្រាស់ប្រហែល ៥០ ភាគរយ។ ប៉ុន្តែដើម្បីឈានទៅដល់ចំណុចវាយឲ្យស្ទាត់ជំនាញ អ្នកត្រូវសាកល្បងវាយនូវពាក្យឬតួអក្សរណាមួយ ដោយមិនចាំបាច់ក្រឡេកទៅមើល Keyboard ថ្វីបើដំបូងខុស សាកម្តងទៀត រហូតដល់អ្នកចាំដៃថាគ្រាប់ចុចមួយណាត្រូវនឹងម្រាមមួយណាយ៉ាងពិតប្រាកដ។

៦.អនុវត្ត, អនុវត្ត, អនុវត្ត:

ការសិក្សាសុទ្ធសឹងតែចាប់ផ្តើមពីចំណុចសូន្យ ម្ល៉ោះដំបូងអ្នកអាចនឹងវាយយឺតៗ មិនរហ័សដូចអ្នកជំនាញ ប៉ុន្តែត្រូវព្យាយាមអនុវត្តជារឿយៗ មិនថាតែការវាយឯកសារជាភាសាអង់គ្លេសឬភាសាខ្មែរ ត្រូវទម្លាប់ធ្វើហើយធ្វើទៀត ដោយមិនចាំបាច់លួចមើលមក Keyboard។ រហូតដល់ប៉ុន្មានសប្តាហ៍បន្ទាប់ អ្នកនឹងឃើញលទ្ធផលនៃការព្យាយាមមួយរយៈពេលនេះ។