ទូរសព្ទ KHMER ចេញបានមួយប្រាវ ស្រាប់តែស្ងាត់ទៅវិញ

2018-01-09 04:44:21
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីទូរសព្ទខ្មែរដំបូងបានប្រកាសបង្ហាញរូបរាងជាផ្លូវការ និងទទួលការចាប់អារម្មណ៍ប្រិយមិត្តក្នុងអំឡុងដើមឆ្នាំ ២០១៤ មកមួយរយៈចុងក្រោយនេះហាក់មានភាពស្ងប់ស្ងាត់ បើតាមការសាកសួរនៅតាមបណ្ដាហាងលក់ទូរសព្ទមួយចំនួននៅក្នុងទីក្រុងភ្នំពេញពីទូរសព្ទខ្មែរហ្វូន នេះមានហាងមួយចំនួនពុំបានស្គាល់ និងហាងខ្លះទៀតមានភាពមិនច្បាស់ចំពោះវត្តមានទូរសព្ទនេះ។

ខាងក្រោមនេះជាការរៀបរាប់ពីហាងមួយចំនួនដែល Sabay បានសាកសួរ៖

ហាង សៀងលីន និង ហាង អៀ សុខហៀង ហាក់បង្ហាញពីភាពស្ទាក់ស្ទើរពីវត្តមានរបស់ទូរសព្ទមួយនេះ ដោយឆ្លើយប្រាប់ថាពុំដែលបានឃើញទូរសព្ទ ខ្មែរហ្វូន នេះទេនិងពុំដែលមានក្រុមហ៊ុនណាមកទាក់ទង់លក់នៅក្នុងហាងតែម្ដង។

ងាកមកលោក គាម សោភ័ណ ម្ចាស់ហាងលក់ទូរសព្ទ ស៊ី្រ ផ្លឹស ក៏បានប្រាប់ថាពុំដែលឃើញព័ត៌មានណាដែលចុះផ្សាយពីទូរសព្ទខ្មែរហ្វូន នេះទេ ដោយពេលកន្លងមកសូម្បីតែរូបរាងឬខាងក្រុមហ៊ុនមកទំនាក់ទំនង។ លោកបន្តថា ភាគច្រើនទូរសព្ទប្រភេទនេះតែងតែមានទីផ្សារនៅតាមបណ្ដាលខេត្ត ច្រើនជាងនៅភ្នំពេញព្រោះជាប្រភេទទូរសព្ទ ដែលមានប្រេនថ្មី ណាមួយអាចមានតម្លៃធូរថ្លៃជាងទូរសព្ទផ្សេងទៀត ដែលអាចត្រូវជាមួយនិងជីវភាពអ្នករស់នៅតំបន់នេះ ។

ចំណែកលោក ជីវន្ត អ្នកលក់ទូរសព្ទនៅផ្សារទួលសង្កែបានឲ្យដឹងដែរថា ទូរសព្ទខ្មែរនេះលោកក៏ពុំធ្លាប់បានឃើញដូចគ្នា ។ តែលោកក៏មានការចាប់អារម្មណ៍ពីទូរសព្ទខ្មែរនេះដែរប្រសិនបើមានខាងក្រុមហ៊ុន ទាក់ទងដាក់លក់ ។ តែលោកក៏ត្រូវមើលលើតម្រូវការទីផ្សារតើមានចាប់អារម្មណ៍កម្រិតណាពីអ្នកប្រើប្រាស់ ជាពិសេសនេះតម្លៃរូបរាងនិងគុណភាពប្រើប្រាស់ផងដែរ។

ទូរសព្ទខ្មែរហ្វូនត្រូវបានផលិតឡើងដោយក្រុមហ៊ុន Jezetek Khmer Comserviceដំបូងគេដែលបានបើកសម្ពោធរូបរាងទូរសព្ទខ្មែរ C2 កាលពីដើមឆ្នាំ ២០១៤ ដោយអះអាងជាស្នាដៃបង្កើតឡើងដោយកូនខ្មែរ។ ទូរសព្ទខ្មែរ C2 ត្រូវបានរចនាឡើងប្រកបដោយលក្ខណៈសម្បត្តិដ៏គួរឲ្យចាប់អារម្មណ៍មួយចំនួនដូចជា ដើរដោយប្រព័ន្ធប្រតិបត្តិការ Android 4.2, CPU Quad Core 1.5 GHz Cortex-A7, អេក្រង់ ៥ អ៊ីង, RAM 2 GB និងអង្គចងចាំ 32 GB។ ទូរសព្ទដ៏ទំនើបនេះមានកាមេរ៉ាក្រោយ 13 Mega Pixel និង កាមេរ៉ាមុខ 5 Mega Pixel និងដែលមានពុម្ព និងក្ដារចុចអក្សរខ្មែររួចជាស្រេច។

Sabay នឹងព្យាយាមទាក់ទងទៅក្រុមហ៊ុនផលិតទូរសព្ទនេះ ដើម្បីចុះផ្សារព័ត៌មានលម្អិតនៅពេលក្រោយ ។

ចុះប្រិយមិត្តវិញមានធ្លាប់បានឃើញនិងបានប្រើប្រាស់ទូរសព្ទខ្មែរនេះហើយឬនៅ? បើដឹងអីខ្លះជួយប្រាប់ប្រិយមិត្តយើងផង។

ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......

អានអត្ថបទបន្ត៖

អត្ថបទ៖ ម៉េងងី