Sony ចេញស្មាតហ្វូនកាមេរ៉ាភ្លោះនៅខាងមុខ ត្រូវនឹងអ្នកមានជំងឺ Selfitis

2018-01-09 02:33:57
ចំនួនមតិ 0 | ចំនួនចែករំលែក 0

ចន្លោះមិនឃើញ

អម្បាញ់មិញនេះ ក្នុងព្រឹត្តិការណ៍ CES ឆ្នាំ ២០១៨ ក្រុមហ៊ុន Sony បានបង្ហាញចេញស្មាតហ្វូនថ្មីចំនួនពីរម៉ូដែលគឺ Xperia XA2 និង Xperia XA2 Ultra។ Xperia XA2 Ultra គួរឲ្យចាប់អារម្មណ៍ជាងគេព្រោះមានកាមេរ៉ាភ្លោះនៅផ្នែកខាងមុខ។

Xperia XA2 Ultra

ស្មាតហ្វូនទាំងពីរម៉ូដែលមានកាមេរ៉ាខាងក្រោយទំហំ ២៣ MP អាចថតវីដេអូបានដល់កម្រិត 4K និងអាចថតវីដេអូយឺតៗនៅល្បឿន ១២០ ប្លង់/វិនាទី។ កាមេរ៉ាក្រោយនេះក៏អាចដំឡើងកម្រិត ISO បានដល់ ១២ ៨០០ សម្រាប់ថតនៅទីងងឹតខ្លាំង។

Xperia XA2

នៅផ្នែកខាងមុខនៃ XA2 មានបំពាក់កាមេរ៉ាមួយគ្រាប់ទំហំ ៨ MP ជាប្រភេទកាមេរ៉ា Wide-Angle អាចថត Selfie បានធំទូលាយ។ ចំណែក XA2 Ultra វិញមានកាមេរ៉ាខាងមុខដល់ទៅពីរគ្រាប់ឯណោះដោយមានកាមេរ៉ាមួយជាប្រភេទ Wide-Angle ទំហំ ៨ MP និងមួយទៀតជាកាមេរ៉ាធម្មតាទំហំ ១៦ MP។ កាមេរ៉ាទីពីរនេះមានបច្ចេកវិទ្យា OIS ជួយរក្សាលំនឹងពេលថត Selfie និងថតបានច្បាស់ល្អ។ លើសពីនេះទៅទៀត XA2 Ultra មានភ្លើងសម្រាប់ជំនួយពេលថត Selfie នៅទីងងឹតទៀតផង។

Xperia XA2 Ultra

ចំពោះរចនាបថរបស់ស្មាតហ្វូនឯកទេសខាង Selfie ទាំងពីរនេះ នៅតែមានលក្ខណៈជ្រុងៗ និងមានគែមអេក្រង់ក្រាស់ដូចស៊េរីមុនៗដែរ ប៉ុន្តែមានជម្រើសពណ៌ថ្មីៗ។ XA2 មានអេក្រង់ទំហំ ៥,២ អ៊ីញ អាចបង្ហាញរូបភាពក្នុងកម្រិត 1080 x 1920 ភីកសែល និង XA2 Ultra មានអេក្រង់ទំហំ ៦ អ៊ីញ អាចបង្ហាញរូបភាពក្នុងកម្រិតដូចគ្នា។

Xperia XA2 Ultra

XA2 និង XA2 Ultra មានប្រើបន្ទះឈីប Snapdragon 630 ដូចគ្នា មាន CPU ៨ គ្រាប់ដែលមានល្បឿនរត់រហូតដល់ 2.2 GHz។ XA2 មាន RAM ទំហំ ៣ GB និងអង្គផ្ទុកទិន្នន័យ ៣២ GB ចំណែក XA2 Ultra មាន RAM ទំហំ ៤ GB និងអង្គផ្ទុកទិន្នន័យ ៦៤ GB ដោយមានរន្ធសម្រាប់ដោតមេមូរីកាតដូចគ្នា។ XA2 មានថ្មទំហំ ៣៣០០ mAh និង XA2 Ultra មានថ្មទំហំ ៣៥៨០ mAh។