អ្នកភ្នំពេញ ៩០% អត់ដឹងពីលក្ខណៈពិសេសមិនធម្មតាភ្លើងស្តុបថ្មី ចឹងបានស្ទះឥតល្ហែ

2018-01-11 04:06:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្លើងស្តុបថ្មីជាង ១០០កន្លែងក្នុងរាជធានីភ្នំពេញ បានដាក់ឲ្យដំណើរការជាបន្តបន្ទាប់ ក្រោមជំនួយពីទីភ្នាក់ងារសហប្រតិបត្តិការអន្តរជាតិជប៉ុន-កម្ពុជា ហៅកាត់ (JICA)។

ភ្លើងស្តុបថ្មីៗដ៏ទំនើបទាំងនោះមានលក្ខណៈពិសេសជាច្រើន ខុសពីភ្លើងស្តុបចាស់ តែប្រជាពលរដ្ឋនៅរាជធានីភ្នំពេញ ក៏ដូចជាអ្នកធ្វើដំណើរភាគច្រើនមិនសូវបានដឹងពីលក្ខណៈពិសេសរបស់វានោះទេ។

បើតាមការរៀបរាប់របស់ ឯកឧត្ដម ហ៊ីដេហ៊ីសា ហូរីណូអុជិ ឯកអគ្គរាជទូតជប៉ុនប្រចាំប្រទេសកម្ពុជា ក្នុងវីដេអូខ្លីមួយ បានឲ្យដឹងថា ភ្លើងស្តុបចរាចរណ៍ថ្មីនេះ មានភ្ជាប់ប្រព័ន្ធ Sensor ដែលអាចដឹងថានៅលើផ្លូវយានយន្តតិច ឬច្រើន និងអាចកំណត់នាទីដោយស្វ័យប្រវត្តិ ដើម្បីសម្រួលដល់បញ្ហាកកស្ទះ។ មានន័យថា ប្រសិនបើនៅលើផ្លូវរត់ត្រង់ ឬបត់ស្ដាំ និងបត់ឆ្វេង មានយានយន្តច្រើន នោះភ្លើងពណ៌បៃតង នឹងពន្យារពេលកាន់តែយូរ។ ប៉ុន្តែប្រជាពលរដ្ឋភាគច្រើនមិនសូវបានដឹងនោះទេ ហើយតែងតែឆ្ងល់ថា ហេតុអ្វីបានជាភ្លើងស្តុបឥឡូវចាំយូរជាងមុន?

លក្ខណៈពិសេសមួយទៀតនោះ ប្រសិនបើនៅលើដងផ្លូវមានយានយន្តតិច នោះភ្លើងស្តុបនឹងលោតធម្មតា មិនពន្យារពេលនោះទេ។ បន្ថែមលើពីនេះទៀត ប្រសិនបើអ្នកបើកបរទាំងឡាយ មិនគោរពភ្លើងសញ្ញាចរាចរណ៍ ឈប់ខុសគន្លង នោះភ្លើងស្តុបថ្មីនឹងលោតពណ៌ខុសប្រក្រតី។ ឧទាហរណ៍ថា អ្នកបើកបរណាម្នាក់ចង់ទៅត្រង់ តែបែរជាមកឈប់គន្លងបត់ឆ្វេង ហើយស្រាប់តែកាច់ចង្កូតទៅត្រង់វិញ នោះភ្លើងស្តុបនឹងយល់ថា គន្លងបត់ឆ្វេងកំពុងកកស្ទះខ្លាំង។ ដូច្នេះភ្លើងស្តុបនឹងបញ្ឈប់អ្នកដំណើរតាមផ្លូវត្រង់ ហើយមកពន្យារពេលឱ្យគន្លងបត់ឆ្វេងវិញ។

ដូចនេះមានន័យថា បើអ្នកបើកបរមិនគោរពភ្លើងសញ្ញា បត់ខុស ឬឈប់ខុសគន្លង នឹងធ្វើឱ្យភ្លើងស្តុបថ្មី ដំណើរការខុសប្រក្រតី និងបង្កឱ្យមានបញ្ហាកកស្ទះកាន់តែខ្លាំងឡើង។ ហេតុនេះហើយទាមទារឱ្យអ្នកបញ្ជាចង្កូតទាំងអស់គោរពភ្លើងសញ្ញាឱ្យបានត្រឹមត្រូវ ទើបមិនខាតពេលវេលា និងមិនកកស្ទះចរាចរណ៍។

ដូច្នេះហើយ ដើម្បីកាត់បន្ថយការកកស្ទះចរាចរណ៍ និងចូលរួមគោរពច្បាប់ចរាចរណ៍អ្នកធ្វើដំណើរទាំងឡាយត្រូវគោរពភ្លើងសញ្ញាឲ្យបានខ្ជាប់ខ្ជួន។ ប្រសិនបើភ្លើងពណ៌លឿង ត្រូវប្រុងប្រៀបឈប់ ភ្លើងក្រហមត្រូវតែឈប់ដាច់ខាត ភ្លើងបៃតងសឹមចេញដំណើរ និងត្រូវឈប់ឲ្យត្រូវគំនូស និងគន្លង ទើបភ្លើងស្តុបថ្មីនេះដំណើរការធម្មតាមិនខុសប្រក្រតី៕

ទស្សនាបទយកការណ៍ខាងក្រោមនេះ៖