ចំណូលពន្ធពីច្រកអន្តរជាតិប៉ោយប៉ែតឆ្នាំ ២០១៧ បានជាង ២២៦ លានដុល្លារ

2018-01-11 05:13:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ចំណូលពន្ធគយច្រកទ្វារអន្តរជាតិប៉ោយប៉ែត ក្នុងឆ្នាំ២០១៧ នេះបានកើនឡើងដល់ទៅជាង ២២៦ លានដុល្លារអាមេរិក។ នេះបើតាមការលើកឡើងរបស់លោក អ៊ី ឃីម អនុប្រធានការិយាល័យគយ និងរដ្ឋាករក្រុងប៉ោយប៉ែត ខេត្តបន្ទាយមានជ័យ។

លោកបានបន្ថែមថា ចំណូលដែលប្រមូលបាន គឺមានការកើនឡើងដល់ទៅទៅ ១១៤,៨០% នៃផែនការដែលបានដាក់ចេញ ខណៈឆ្នាំមុនចំណូលទទួលបានមានជាង ១៦៨ លានដុល្លារអាមេរិក។ ដោយឡែកចំណូលផ្នែករទេះប្រចាំឆ្នាំ២០១៧ ប្រមូលបានជិត ៤ លានដុល្លារអាមេរិក ខណៈឆ្នាំ ២០១៦ ទទួលបានជាង ២លានដុល្លារអាមេរិក។

«អញ្ចឹងយើងប្រមូលចំណូលកាលពីឆ្នាំ២០១៧ កើនឡើងលើសពី ២០១៦ គឺ ៧ប៊ីលានជាង។ ដូច្នេះការប្រមូលចេះតែមានការកើនឡើងបន្តិចម្តងៗ…ឥឡូវឆ្នាំ២០១៨ ត្រូវតែកើនឡើងទៀតហើយ ព្រោះផែនការដាក់ចេញគឺឡើងដែរ។ ២០១៧ យើងរកបាន ៦០ លានរៀលក្នុងមួយថ្ងៃ ដូច្នេះ២០១៨ អាចថារកឱ្យបាន ៧០លានរៀលក្នុងមួយថ្ងៃ”។ លោក អ៊ី ឃីម បន្ថែម។

ទោះជាយ៉ាងណាលោកបានបន្ថែមថា ការប្រមូលពន្ធមានការប្រឈមខ្លះៗ ដោយសារអ្នកអូសរទេះមួយចំនួនថៅកែមិនព្រមចេញមុខ ប៉ុន្តែក្នុងនាមអ្នកទទួលខុសត្រូវលើការប្រមូលពន្ធមានតែខិតខំសម្របសម្រួល និងបំពេញការងារឱ្យល្អប្រសើរតែប៉ុណ្ណោះ។

ច្រកអន្តរជាតិប៉ោយប៉ែតត្រូវបានចាត់ទុកជាច្រកទ្វារធំជាងគេក្នុងការដោះដូរទំនិញ រវាងកម្ពុជា-ថៃ ខណៈថៃ គឺជាដៃគូពាណិជ្ជកម្មដ៏សំខាន់មួយរបស់កម្ពុជា។ លោក អ៊ី ឃីម បានអំពាវដល់បងប្អូនអាជីវករ ជាពិសេសអ្នកដែលត្រូវបង់ពន្ធនៅផ្នែកត្រួតពិនិត្យទីលានរទេះ និងគល់ស្ពានត្រូវបំពេញ កាតព្វកិច្ចបង់ពន្ធឱ្យបានគ្រប់ៗគ្នា៕