ទីក្រុងភ្នំពេញ រដ្ឋធានីនៃប្រទេសកម្ពុជា កំពុងក្លាយជាគោលដៅដ៏គួរឱ្យចាប់អារម្មណ៍សម្រាប់អ្នកស្រឡាញ់ម្ហូបអាហារ ដោយផ្តល់ជូននូវបទពិសោធន៍ធ្វើម្ហូបចម្រុះ ចាប់ពីម្ហូបខ្មែរបុរាណរហូតដល់ម្ហូបអន្តរជាតិដែលមានការបញ្ចូលគ្នាយ៉ាងប៉ិនប្រសប់។ យោងតាមអត្ថបទថ្មីមួយពី Cathay Pacific ដែលបានស្វែងយល់ពីភោជនីយដ្ឋានល្អបំផុតនៅភ្នំពេញ ទីក្រុងនេះកំពុងទទួលបានការចាប់អារម្មណ៍ជាសកលសម្រាប់ឈុតឆាកធ្វើម្ហូបដ៏រស់រវើករបស់ខ្លួន។

ភោជនីយដ្ឋានល្បីៗ ពេញនិយមនៅភ្នំពេញ ដោយ Cathay Pacific

១. ខេម៉ា (Khéma)

ភោជនីយដ្ឋាន ខេម៉ា ដែលមានសាខាចំនួនបីនៅភ្នំពេញ ផ្តល់ជូននូវម្ហូបបារាំងបែបបុរាណជាមួយនឹងភាពទាក់ទាញនៃសម័យអាណានិគម។ ទីតាំងមួយនៅជិតអគារប្រៃសណីយ៍ចាស់ គឺជាកន្លែងពេញនិយមសម្រាប់អាហារពេលព្រឹកចុងសប្តាហ៍បែបសេរី ឬអាហារពេលល្ងាចដ៏ឈ្ងុយឆ្ងាញ់ជាមួយមុខម្ហូបដូចជា ស្តេកហ្វ្រីត (steak frites) និង ប៉ាតេបែបប្រទេស។

២. ម៉ាលីស (Malis)

សម្រាប់អ្នកដែលចង់សាកល្បងម្ហូបខ្មែរបែបខ្ពស់ ម៉ាលីស គឺជាជម្រើសដ៏ល្អ។ ដឹកនាំដោយចុងភៅល្បីឈ្មោះ លោក លូ ម៉េង ភោជនីយដ្ឋាននេះបម្រើម្ហូបខ្មែរបុរាណក្នុងបរិយាកាសសួនច្បារដ៏ស្រស់ស្អាត។ មុខម្ហូបលេចធ្លោរួមមាន សាច់ក្រកតាកែវ ត្រីគល់អំបិលដុតជាមួយទឹកជ្រលក់ស្វាយខ្ចី និងបាយចំហុយជាមួយក្តាមផ្កាម៉ាក្រា។

៣. អេលីយ៉ា (Elia)

ភោជនីយដ្ឋាន អេលីយ៉ា ដែលមានប្រភពចេញពីសៀមរាប បាននាំយកម្ហូបក្រិចមកកាន់ភ្នំពេញជាមួយនឹងសាខាពីរនៅទីនេះ។ ភ្ញៀវអាចរីករាយជាមួយនឹងមុខម្ហូបដូចជា នំប៉័ងប៉ីតាជាមួយទឹកជ្រលក់ផ្ទាល់ខ្លួន ចានមីហ្សេចម្រុះ និងសាច់អាំងស៊ូវឡាគី។

៤. ផ្សារធំថ្មី (Central Market)

ផ្សារធំថ្មី ដែលជាស្នាដៃស្ថាបត្យកម្មបែបអាតដេកូ មិនត្រឹមតែជាកន្លែងទិញទំនិញប៉ុណ្ណោះទេ ប៉ុន្តែក៏ជាទីតាំងសម្រាប់ភ្លក្សម្ហូបផ្លូវថ្នល់ផងដែរ។ អ្នកទស្សនាអាចសាកល្បងទឹកអំពៅច្របាច់ជាមួយក្រូចថ្លុង ដំឡូងបំពង ឬ លតឆា ដែលជាគុយទាវឆាជាមួយបន្លែ សាច់ និងស៊ុត។

៥. ប្រោន (Brown)

ជាសាខាកាហ្វេក្នុងស្រុកដ៏ល្បី ប្រោន ផ្តល់ជូននូវភេសជ្ជៈដូចជា កាហ្វេហ្វ្លែតវ៉ាយ កាប៉ូស៊ីណូ និងភេសជ្ជៈបែបក្នុងស្រុកដូចជា កាហ្វេក្រែមម្រេចកំពត និងនំដានីសក្រអូបធូរេន។ ការរចនាខុសៗគ្នានៃសាខានីមួយៗធ្វើឱ្យ ប្រោន ក្លាយជាកន្លែងពេញនិយមសម្រាប់អ្នកស្រុកនិងភ្ញៀវទេសចរ។

៦. ហ្វាតផាសិន (Fat Passion)

ដឹកនាំដោយចុងភៅវ័យក្មេង លោក ចច ចេន ដែលទទួលបានពានរង្វាន់ជាចុងភៅឆ្នើមនៅអាស៊ីក្នុងឆ្នាំ២០២៤ ហ្វាតផាសិន ផ្តល់ជូននូវម្ហូបអាស៊ីបែបហ្វុយសិនដ៏ឈ្ងុយឆ្ងាញ់ ដូចជា នំសាំងវិចសាច់ជ្រូកអាំង៨ម៉ោង មាន់បំពងជាមួយទឹកឃ្មុំហឹរ និង តាតារ៍ត្រីធូណាហឹរ។

៧. ហ្វាម ទូ ថេបល (Farm to Table)

ភោជនីយដ្ឋាន ហ្វាម ទូ ថេបល គឺជាកន្លែងដែលផ្តល់នូវអារម្មណ៍សហគមន៍ ជាមួយនឹងម្ហូបផលិតពីគ្រឿងផ្សំក្នុងស្រុក។ សួនច្បារដ៏ធំទូលាយនិងបរិយាកាសសមស្របសម្រាប់គ្រួសារធ្វើឱ្យវាក្លាយជាកន្លែងពេញនិយមសម្រាប់អ្នកស្រុក។ ព្រឹត្តិការណ៍ដូចជាផ្សារកសិករ និងថ្នាក់ធ្វើម្ហូបសម្រាប់កុមារក៏ត្រូវបានរៀបចំជាប្រចាំ។

៨. នេសាត ស៊ីហ្វូដ ហោស៍ (Nesat Seafood House)

ភោជនីយដ្ឋាន នេសាត ស៊ីហ្វូដ ហោស៍ ផ្តល់ជូននូវអាហារសមុទ្រដ៏ល្អបំផុតនៅភ្នំពេញ ជាមួយគ្រឿងផ្សំស្រស់ៗពីទីក្រុងកំពត។ មុខម្ហូបលេចធ្លោរួមមាន ក្តាមទន្លេអាំង ខ្យងជាមួយទឹកជ្រលក់ខ្ទឹម និង សែលហ្វីស ម៉ាដណេស ដែលមានក្តាម បង្គា និងគុយទាវឆាជាមួយទឹកជ្រលក់ហឹរ។

ជាមួយនឹងភាពចម្រុះនៃម្ហូបអាហារ និងវប្បធម៌ដ៏សម្បូរបែប ភ្នំពេញកំពុងទាក់ទាញភ្ញៀវទេសចរមកពីជុំវិញពិភពលោក។ ពីភោជនីយដ្ឋានបែបប្រណីតរហូតដល់ Street Foods ទីក្រុងនេះផ្តល់ជូននូវអ្វីគ្រប់យ៉ាងសម្រាប់អ្នកស្រឡាញ់ម្ហូបអាហារ៕