មកដឹងចំណុចខ្លាំងរវាង រឿង សោភ័ណ្ឌ និង អូប៉ មុនប៉ះគ្នានៅវគ្គផ្ដាច់សប្ដាហ៍នេះ

2018-01-11 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនដល់វគ្គផ្ដាច់ព្រ័ត្រខ្សែក្រវាត់ CNC សប្ដាហ៍នេះរវាងជើងខ្លាំងរបស់កម្ពុជា រឿង សោភ័ណ្ឌ ប៉ះជាមួយអ្នកប្រដាល់ឆ្លងដែនមកពីថៃ អូប៉ សថ វីស៊ីត មកដឹងពីចំណុចខ្លាំង ចំណុចខ្សោយនិងប្រវត្តិខ្លះៗរបស់ពួកគេទាំងពីរ។

កីឡាករ រឿង សោភ័ណ្ឌ

រឿង សោភ័ណ្ឌ ជាអ្នកប្រដាល់ជួរមុខរបស់កម្ពុជាម្នាក់ដែរមានកណ្ដាប់ដៃធ្ងន់ហើយរហ័ស ចំណែកស្នៀតកែង ឬទាត់នោះ គេសុទ្ធតែអាចប្រើបានទាំងអស់ប៉ុន្តែមិនសូវប្រើច្រើនដូចកណ្ដាប់នោះទេ អាចថាក្បាច់សម្លាប់របស់គេគឺកណ្ដាប់ដៃតែម្ដង។ ចំណុចខ្លាំងរបស់អ្នកប្រដាល់មកពីខេត្តកណ្ដាលខាងលើនេះមួយទៀតនោះគឺចិត្តសឿងហ៊ានប្ដូរ និងវ៉ៃដោយភាពឆ្លាតវៃ។ បើទោះជាមានខ្លាំងដូចនេះមែន ប៉ុន្តែ សោភ័ណ្ឌ ក៏មានចំណុចខ្សោយខ្លះដែរគឺចាញ់ជង្គង់ នៅពេលដែលប៉ះដៃគូដែលល្អចាប់ឡាំហើយ វាពិបាកខ្លាំងសម្រាប់រូបគេយកឈ្នះព្រោះខ្លួនចូលចិត្តវ៉ៃឆ្ងាយ។ មួយទៀតនោះជើងខ្លាំងខាងលើមានកម្ពស់ទាប ពេលប៉ះអ្នកខ្ពស់ពិបាកជាពិសេសពេលអោប។ អ្នកលេងគុនខ្មែររូបនេះធ្វើបានល្អមែនទែនក្នុងការប្រកួតកម្មវិធីខ្សែក្រវាត់របស់ CNC នេះ ពោលបេក្ខភាពទាំង៤នាក់របស់ថៃសុទ្ធតែធ្លាប់ចាញ់ខ្លួនទាំងអស់ក្នុងវគ្គសន្សំពិន្ទុ និងបន្តឈ្នះនៅវគ្គពាក់កណ្ដាលផ្ដាច់ព្រ័ត្រទៀតពោលគិតដល់វគ្គផ្ដាច់ព្រ័ត្រនេះមិនទាន់ស្គាល់ពាក្យចាញ់។

កីឡាករថៃ អូប៉ សថ វីស៊ីត

អូប៉ សថ វីស៊ីត ជាជើងខ្លាំងរបស់ថៃ និងធ្លាប់ឈ្នះខ្សែក្រវាត់របស់សង្វៀនអាស៊ីអាគ្នេយ៍ រួមនិងពានរង្វាន់ម៉ារ៉ាតុងរបស់បាយ័នទៀតផង។ អ្នកប្រដាល់រូបនេះក៏ធ្វើបានល្អដែរ ក្នុងកម្មវិធីខ្សែក្រវាត់របស់ CNC ៥ប្រកួតចាញ់១ដងនោះទេតាំងពីវគ្គសន្សំពិន្ទុដល់វគ្គផ្ដាច់ព្រ័ត្រ។ កីឡាកររូបនេះមានជំហររឹងមាំ និងល្អគ្រប់ស្នៀត មិនថាកណ្ដាប់ដៃ បោះជង្គង់ ចាប់ឡាំសុទ្ធតែល្អទាំងអស់ ថែមទាំងចេះធាក់ឬទាត់កាត់ដៃគូបានល្អទៀតផង។ ស្នៀតគ្រោះថ្នាក់បំផុតនោះគឺទាត់ផ្កាប់ចាន មានកីឡាករថៃ និងអ្នកប្រដាល់ច្រើននាក់សន្លប់ក្រោមក្បាច់នេះ។ អ្នកប្រដាល់ឆ្លងដែនមកពីប្រទេសម្នាក់នេះស្ទើរតែគ្មានចំណុចនោះឡើយ ប៉ុន្តែក៏ធ្លាប់សន្លប់ធំដោយសារកណ្ដាប់ដៃរបស់ រឿង សោភ័ណ្ឌ ម្ដងដែរនៅសង្វៀនអាស៊ីអាគ្នេយ៍ ដូច្នេះអាចថាមុខរៀងជ្រាយបន្តិចដែរ។

កីឡាករ សៅ វណ្ណា

កីឡាករ អ៊ុំ វណ្ណេត

សម្រាប់កីឡាករទាំងពីរនាក់នេះធ្លាប់ជួបគ្នា៤លើកមកហើយ ពោលនៅសង្វៀន៣លើកនៅសង្វៀនអាស៊ីអាគ្នេយ៍ និង១លើកនៅសង្វៀន CNC ក្នុងនោះ រឿង សោភ័ណ្ឌ ឈ្នះ ៣ ខណៈ អូប៉ ស ថ វីស៊ីត ឈ្នះតែ១លើកនោះទេ។

នៅថ្ងៃសៅរ៍ ទី១៣ ខែមករា ២០១៨ សប្ដាហ៍នេះគឺមានសង្វៀន២ ដែលត្រូវប្រកួតវគ្គផ្ដាច់ព្រ័ត្រក្នុងនោះទី១ នៅ CNC រវាង រឿង សោភ័ណ្ឌ ប៉ះ អូប៉ សថ វីស៊ីត(ថៃ)ដណ្ដើមខ្សែក្រវាត់ទម្ងន់ ៦៩គីឡូក្រាម ចាប់ពីម៉ោង ៦ល្ងាចតទៅ ខណៈនៅសង្វៀន TV5 រវាង អ៊ុំ វណ្ណេត ប៉ះកីឡាករជំនាន់ក្រោយ សៅ វណ្ណា ដណ្ដើមពានរង្វាន់ TV5 Knock Out Series By Kecent ចាប់ពីម៉ោង ៥ល្ងាច៕

អត្ថបទ៖ នួន ស៊ីណា