ដឹងថា ម៉េចបានខ្សែការពារថ្លៃបំផុត Van Dijk ជ្រើសយក Liverpool?
- 2018-01-12 11:46:35
- ចំនួនមតិ 0 | ចំនួនចែករំលែក 0
ដឹងថា ម៉េចបានខ្សែការពារថ្លៃបំផុត Van Dijk ជ្រើសយក Liverpool?
ចន្លោះមិនឃើញ
ខ្សែការពារ Virgil van Dijk ក្នុងថ្ងៃនេះ បានបង្ហើបពីមូលហេតុដែលខ្លួនសុខចិត្តមកចូលរួមជាមួយក្លឹបហង្សក្រហម Liverpool។
ពេលសួរថាម៉េចបានជាសម្រេចចិត្តមកចូលរួមជាមួយ Liverpool ខ្សែការពារសញ្ជាតិហុល្លង់រូបនេះ បានឆ្លើយប្រាប់សារព័ត៌មាន Sky Sports ថា៖ "ខ្ញុំគិតថា ក្លឹប Liverpool ជាក្លឹបដ៏អស្ចារ្យ ទាំងទំហំក្លឹប អ្នកគាំទ្រ កីឡាករ និងអ្នកចាត់ការ"។ Van Dijk បានបន្ត៖ "បរិយាកាសនៃការគាំទ្រក្នុងការប្រកួតនៅកីឡដ្ឋាន Anfield គឺពិតជាអស្ចារ្យសម្បើមណាស់។ ខ្ញុំពិតជាសប្បាយចិត្តណាស់ដែលបានលេងឲ្យក្លឹបមួយនេះ"។
សូមបញ្ជាក់ផងដែរថា កីឡាករ Van Dijk បានចាកចេញពីក្លឹប Southampton មកចូលរួមជាផ្លូវការជាមួយ Liverpool កាលពីដើមខែមករាកន្លងទៅនេះ ក្នុងតម្លៃផ្ទេររហូតដល់ទៅ ៧៥លានផោន ដែលនេះបានធ្វើឲ្យកីឡាករសញ្ជាតិហុល្លង់ ក្លាយជាខ្សែការពារថ្លៃជាងគេបំផុតក្នុងកំណត់ត្រាបាល់ទាត់។
គួររំលឹកផងដែរថា កាលពីពេលកន្លងទៅ មានពាក្យល្ហេចល្ហៀងជាច្រើនដែលថា មិនមែនមានតែ Liverpool មួយទេដែលតាមទិញខ្សែការពាររូបនេះ។ របាយការណ៍ជាច្រើនបានអះអាងថា ក្លឹប Chelsea បានដុតដៃដុតជើងក្នុងការនាំ Van Dijk មកលេងនៅកីឡដ្ឋាន Stamford Bridge។ អ្នកចាត់ការក្លឹបតោខៀវ Antonio Conte កាលពីពេលថ្មីៗនេះហ៊ានទាំងសារភាពទៀតថា លោកធ្លាប់ចង់បាន Van Dijk ពិតមែន។ ពាក្យចចាមអារ៉ាមផ្សេងទៀត ក៏បានគូសបញ្ជាក់ទៀតថា Manchester City កន្លងមកធ្លាប់ខំយ៉ាងសស្រាក់សស្រាំក្នុងការទិញខ្សែការពាររូបនេះ។ ទោះជាយ៉ាងណា លោក Pep Guardiola កាលពីចុងខែធ្នូ បានបដិសេធពាក្យនេះ៕