ថ្លែងពីការមកដល់របស់ Coutinho កីឡាករ Iniesta ថា៖ គ្មាននរណាអាចទាត់ខ្ញុំចេញពីក្រុមឡើយ
- 2018-01-12 13:41:06
- ចំនួនមតិ 0 | ចំនួនចែករំលែក 0
ថ្លែងពីការមកដល់របស់ Coutinho កីឡាករ Iniesta ថា៖ គ្មាននរណាអាចទាត់ខ្ញុំចេញពីក្រុមឡើយ
ចន្លោះមិនឃើញ
បន្ទាប់ពីខ្សែបម្រើប្រយុទ្ធ Philippe Coutinho បានក្លាយជាកីឡាករ Barcelona ជាផ្លូវការ កាលពីដើមសប្ដាហ៍នេះ មតិក្នុងពិភពបាល់ទាត់ជាច្រើនបានមើលឃើញថា កីឡាករប្រេស៊ីលត្រូវបានក្លឹបទិញ ក្នុងគោលដៅធ្វើការជំនួសខ្សែបម្រើ Andres Iniesta ដែលមានវ័យកាន់តែជ្រេទៅហើយ។ ទោះជាយ៉ាងណា Iniesta បានចេញមុខទាត់ចោលមតិហ្នឹង ក្នុងថ្ងៃនេះ។
ខ្សែបម្រើវ័យ ៣៣ឆ្នាំ Iniesta បានថ្លែងប្រាប់សារព័ត៌មាន Onda Cero ថា៖ "ខ្ញុំគឺជាកីឡាករមួយរូបរបស់ក្លឹប Barcelona ហើយមានតែកីឡាករដែលល្អប៉ុណ្ណោះដែលលេងឲ្យក្លឹបមួយនេះ។ ដោយសារហេតុផលនេះហើយ ដែលធ្វើឲ្យ Coutinho ជាកីឡាករមួយដ៏ពិសេស។ គេនៅក្មេង មានទេពកោសល្យខ្ពស់ ហើយ Barcelona គឺជាក្លឹបដែលអាចធ្វើឲ្យគេកាន់តែល្អជាងនេះទៅទៀត"។
ទោះជាយ៉ាងណា ខ្សែបម្រើអេស្ប៉ាញបាននិយាយសង្កត់ធ្ងន់ថា៖ "ខ្ញុំចង់បញ្ជាក់ឲ្យបានច្បាស់ថា នឹងមិនមានកីឡាកររូបណា ដែលអាចធ្វើឲ្យខ្ញុំចូលនិវត្តន៍ ឬទាត់ខ្ញុំចេញពីក្រុមឡើយ។ ខ្ញុំទើបតែមានវ័យ ៣៣ឆ្នាំប៉ុណ្ណោះ វាមិនមែនជាបញ្ហាធ្ងន់ធ្ងរនោះទេរឿងអាយុនោះ។ Coutinho មកនេះដើម្បីធ្វើឲ្យក្រុមលេងកាន់តែល្អ មិនមែនមកជំនួសនរណានោះទេ"។