ផ្ទុះករណីជំងឺផ្ដាសាយបក្សី កើតមាននៅតំបន់មួយក្នុងរាជធានីភ្នំពេញ

2018-01-14 08:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងកសិកម្ម រុក្ខាប្រមាញ់ និងនេសាទ បានណែនាំឲ្យប្រជាពលរដ្ឋមានការប្រុងប្រយ័ត្ន បន្ទាប់ពីកើតមានករណីជំងឺផ្ដាសាយបក្សី កើតលើបក្សី នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ សេចក្ដីជូនដំណឹងនេះប្រកាសកាលពីថ្ងៃទី១១ ខែមករា ឆ្នាំ២០១៨។

បន្ទាប់ពីក្រសួងធ្វើការវិភាគលើមាន់ចំនួន ៣ក្បាលពីភូមិថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ វិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ នៃអគ្គនាយកដ្ឋានសុខភាពសត្វនិងផលិតកម្មសត្វ បានរកឃើញនូវជំងឺផ្ដាសាយបក្សីដែលបង្កដោយវីរុសក្នុងអនុក្រុម A1 (H5N1)។

អាស្រ័យហេតុនេះ ក្រសួងបានជំរុញមន្ត្រីជំនាញមានសមត្ថកិច្ចក្នុងការពង្រឹងការទប់ស្កាត់ចលនាបក្សី និងផលិតផលដែលមានដើមកំណើតពីបក្សីជាបណ្ដោះអាសន្ន ចេញពីតំបន់ដែលផ្ទុះជំងឺខាងលើ ក្នុងរង្វង់កាំ ៣គីឡូម៉ែត្រ ដើម្បីអនុវត្តវិធានបច្ចេកទេសបសុពេទ្យប្រកបដោយប្រសិទ្ធភាពខ្ពស់៕

អត្ថបទ៖ ស៊ិន សាវ៉េត