ត្រៀមជិះឲ្យណាណីម្ដង! ថ្មីចែស៣យ៉ាង ត្រៀមសម្ពោធមុនចូលឆ្នាំខ្មែរ

2018-01-17 01:00:03
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនចូលឆ្នាំថ្មីប្រពៃណីជាតិខ្មែរឆ្នាំ២០១៨នេះ មធ្យោបាយធ្វើដំណើរថ្មីសន្លាង៣យ៉ាង នឹងក្លាយជាកាដូដ៏ពិសេសសម្រាប់ប្រជាពលរដ្ឋខ្មែរ។

១. កាណូតដឹកអ្នកដំណើរពីព្រែកព្នៅ-ភ្នំពេញ-តាខ្មៅ

ទេសរដ្ឋមន្រ្តី រដ្ឋមន្រ្តីក្រសួងសាធាណការ បានប្រកាសថា នឹងសម្ពោធដាក់ឲ្យដំណើរការកាណូតដឹកអ្នកដំណើរពីព្រែកព្នៅ-ភ្នំពេញ-តាខ្មៅ ជាផ្លូវការនៅមុនចូលឆ្នាំថ្មីខាងមុខនេះហើយ។ ឯកឧត្ដមលើកឡើងថា មធ្យោបាយធ្វើដំណើរថ្មីសន្លាងនៅកម្ពុជានេះ នឹងជួយកាត់បន្ថយថ្លៃធ្វើដំណើរជួយសម្រួលដល់ជីវភាពប្រជាពលរដ្ឋ ជាពិសេសនោះ គឺជួយកាត់បន្ថយបញ្ហាគ្រោះថ្នាក់ចរាចរណ៍ និងបញ្ចៀសការកកស្ទះក្នុងរាជធានីភ្នំពេញទៀតផង។

២. រថភ្លើងដឹកអ្នកដំណើរពីស្ថានីយ ទៅព្រលានយន្តហោះអន្តរជាតិភ្នំពេញ

ក្នុងចំណោមក្ដីស្រមៃជាច្រើន របស់ឯកឧត្ដម ស៊ុន ចាន់ថុល ការបង្កើតឲ្យមានរថភ្លើងដឹកអ្នកដំណើរពីស្ថានីយ ទៅព្រលានយន្តហោះអន្តរជាតិភ្នំពេញ ក៏ជាក្ដីស្រមៃធំបំផុតដែលលោកចង់ឃើញ។ ឥឡូវផ្លូវដែកមួយខ្សែនេះសម្រេចការសាងសង់ជាស្ថាពរហើយ និងសម្ពោធដាក់ឲ្យប្រើប្រាស់ជាផ្លូវមុនចូលឆ្នាំខ្មែរខាងមុខនេះ។

ទេសរដ្ឋមន្ត្រី ស៊ុន ចាន់ថុល លើកឡើងថា ដោយសារតែបញ្ហាកកស្ទះធ្វើឲ្យអ្នកដំណើរទៅព្រលានយន្តហោះមានការយឺតយ៉ាវ ដូច្នេះហើយគួរតែមានរថភ្លើងដើម្បីបញ្ឈប់បញ្ហានេះតទៅទៀត។ កាត់បន្ថយបញ្ហាកកស្ទះ និងបន្ថែមមធ្យោបាយធ្វើដំណើរកាន់តែសម្បូរបែបនៅភ្នំពេញ ក៏ជាមូលហេតុមួយដែរ។ ជាពិសេសការបើកដំណើរការដំបូង៣ខែនឹងមិនត្រូវគិតថ្លៃ ពីប្រជាពលរដ្ឋនោះទេ។

៣. រថយន្តក្រុងស៊េរីទំនើបចំនួន១៤០គ្រឿងជាជំនួយឥតសំណងរបស់ជប៉ុន

រដ្ឋាភិបាលជប៉ុន បានសន្យាផ្តល់រថយន្តក្រុងឲ្យសាលារាជធានីភ្នំពេញ ចំនួន ១៤០គ្រឿង ស្មើនឹងតម្លៃជាង ៨លានដុល្លារ ចាប់ពីឆ្នាំ២០១៨ ដល់ ២០២០។ ក្នុងនោះ ជំហ៊ានទី១ រថយន្តក្រុងចំនួន ៨០គ្រឿង នឹងមកដល់រាជធានីភ្នំពេញនៅក្នុងអំឡុងខែមេសា ឆ្នាំ២០១៨ខាងមុខនេះ។ នេះបើតាមការបញ្ជាក់របស់លោក ម៉េត មាសភក្តី អ្នកនាំពាក្យសាលារាជធានីភ្នំពេញ។

រថយន្តក្រុងសាធារណជំនួយរបស់រដ្ឋាភិបាលចិនកន្លងមក

លោក ម៉េត មាសភក្តី បានឲ្យដឹងថា ការសន្យារបស់ជប៉ុន ក្នុងការផ្តល់រថយន្តក្រុងនេះ គឺក្រោយពីសាលារាជធានីភ្នំពេញ បានសិក្សា និងចរចាជាមួយភាគីជប៉ុន អស់រយៈពេលជិត៣ឆ្នាំ។

អ្នកនាំពាក្យរូបនេះ បានអះអាងថា ជំនួយរបស់ជប៉ុននេះ គឺដើម្បីពង្រីកសេវារថយន្តក្រុង នៅរាជធានីភ្នំពេញ ឲ្យបានល្អប្រសើរជាងមុន ផ្តល់ភាពងាយស្រួលសម្រាប់ប្រជាពលរដ្ឋរស់នៅក្នុងរាជធានីភ្នំពេញ និងកាត់បន្ថយការកកស្ទះចរាចរណ៍៕

អត្ថបទ៖ វឌ្ឍនៈ