ស្អាតពេកហើយ! ផ្លូវទៅខេត្តពោធិ៍សាត់ ស្អាតបំផុតមិនចាញ់ស្រុកគេ

2018-01-18 03:08:59
ចំនួនមតិ 0 | ចំនួនចែករំលែក 0

ចន្លោះមិនឃើញ

បើធ្វើដំណើរទៅកាន់ខេត្តពោធិ៍សាត់ កាត់តាមស្រុក ក្រវាញ ស្រុកវាលវែង រហូតដល់ស្រុកថ្មបាំង ព្រំដែនកម្ពុជា-ថៃ ប្រិយមិត្តប្រាកដជាលង់នឹងសម្រស់ផ្លូវដ៏ស្រស់ស្អាតបំផុត ទើបនឹងស្ថាបនារួច ពុះជ្រែកកាត់ព្រៃភ្នំដ៏ខៀវស្រងាត់ មានឡើង មានចុះ បត់បែនប្រៀបដូចអន្ទង់អាំងដូច្នោះដែរ។

តាមរបាយការណ៍របស់ក្រសួងសាធារណការ និងដឹកជញ្ជូន ផ្លូវជាតិលេខ៥៥នេះ មានប្រវែងជាង ១៨២គីឡូម៉ែត្រ ទទឹង 9ម៉ែត្រ។ ជាផ្លូវហាយវេថ្នាក់ទី៣ និងត្រូវបានកំណត់ល្បឿនក្នុងការបើកបរ នៅតំបន់ធម្មតា គឺក្នុងល្បឿន60km/ម៉ោង។ ចំពោះផ្លូវស្ថិតក្នុងតំបន់ភ្នំ គឺបានកំណត់ល្បឿន 30គីឡូម៉ែត្រ/ម៉ោង។

ផ្លូវជាតិលេខ៥៥ គឺជាបណ្ដាញផ្លូវដ៏សំខាន់មួយ នៃការតភ្ជាប់ការដឹកជញ្ជូនពីខេត្តពោធិ៍សាត់ ទៅតភ្ជាប់នឹងផ្លូវជាតិលេខ៥ និងបណ្ដាផ្លូវសំខាន់ៗមួយចំនួនទៀត នៃព្រំដែនកម្ពុជា-ថៃ ហើយវាជាផ្នែកមួយដ៏សំខាន់បំផុតនៃបណ្ដាញផ្លូវ នៅភាគខាងលិច ប្រទេសកម្ពុជា។

បន្ថែមលើពីនេះទៀត ផ្លូវដ៏វែងអន្លាយនេះនឹងអាចធ្វើឱ្យប្រសើរឡើង នៅតំបន់ភាគខាងលិច នៃបណ្ដាញផ្លូវនៃប្រទេសកម្ពុជា។ ក្នុងនោះមានសារៈសំខាន់បំផុត ក្នុងការជួយដល់ប្រជាជនក្នុងតំបន់ឱ្យមានជីវភាពខ្ពស់ បង្កើនល្បឿននៃការអភិវឌ្ឍវិស័យ ទេសចរណ៍ និងការកែលម្អកម្រិតការដឹកជញ្ជូនក្នុងខេត្តពោធិសាត់ឲ្យកាន់តែប្រសើរឡើងថែមទៀត។

ដោយឡែកកំណាត់ទី១ ចាប់ពីចំណុចតភ្ជាប់ផ្លូវជាតិលេខ៤៨ ទីរួមខេត្តកោះកុង កាត់តាមស្រុកមណ្ឌលសីម៉ា ស្រុកថ្មបាំង រហូតមក ដល់ចំណុចរង្វង់មូល ឃុំប្រមោយ ស្រុកវាលវែង ខេត្តពោធិ៍សាត់ ប្រវែងប្រមាណជាង១០០គីឡូម៉ែត្រ ក្រសួងសាធារណការកំពង់ដំណើរការគម្រោង។

ប្រសិនបើបញ្ចប់គម្រោងនេះ នោះប្រជាពលរដ្ឋនៅតាមបណ្ដាខេត្តមួយចំនួនដូចជា ខេត្តប៉ៃលិន ពោធិ៍សាត់ បន្ទាយមានជ័យ ឧត្តរមានជ័យ និងសៀមរាប អាចមានជម្រើសក្នុងការធ្វើដំណើរទៅខេត្តកោះកុង ឬទៅលេងឆ្នេរសមុទ្រនាទិសនិរតី ដោយមិនចាំបាច់ឆ្លងកាត់រាជធានីភ្នំពេញដូចមុនទៀតឡើយ៕