Messi កំពង់សោម ល្អមែន ជួយក្រុមបំបាក់ជើងឯករង វឌ្ឍនវិជ្ជា បានដដែល

2018-01-20 09:02:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមការពារតំណែងជើងឯក ស្នងការដ្ឋាននគរបាលខេត្តព្រះសីហនុ A បានយកឈ្នះលើក្រុមជើងឯករង វឌ្ឍនវិជ្ជា ក្នុងលទ្ធផល ៣-២ នៅវគ្គជម្រុះដំបូងមុននេះបន្តិច ក្នុងពានរង្វាន់ Tiger Street Football Festival 2018 មណ្ឌលព្រះសីហនុ។

ស្នងការដ្ឋាននគរបាលខេត្តព្រះសីហនុ A

ស្នងការដ្ឋាននគរបាលខេត្តព្រះសីហនុ A ដែលមានកីឡាករល្អៗ ដូចជា ភូ គឹមសែ (Messi កំពង់សោម) នៅតែធ្វើបានល្អដដែល ដោយអាចគ្រប់គ្រងការវាយសម្រុករបស់ក្រុម វឌ្ឍនវិជ្ជា និងស្វែងរកគ្រាប់បាល់ជ័យជម្នះទាល់តែបាន។ លោក លឹម តាំង សមាជិកក្រុមស្នងការដ្ឋាននគរបាលខេត្តព្រះសីហនុ A បានបង្ហើបទៀតថាការប្រកួតល្ងាចនេះ ពិតជាស្វិតស្វាញមែនទែន ព្រោះថាក្រុមខ្លាំងមកពីកំពតចង់ឈ្នះដើម្បីសងសឹក ខណៈដែលបច្ចេកទេសរបស់ពួកគេក៏កើនឡើងគួរឱ្យកត់សម្គាល់ដែរ។

Messi កំពង់សោម អាវប្រផេះ

ត្បិតតែយ៉ាងនេះក្ដី ការសហការគ្នាបានល្អរបស់ក្រុមស្នងការដ្ឋាននគរបាលខេត្តព្រះសីហនុ A គឺមិនធ្វើឱ្យអ្នកគាំទ្រអស់សង្ឃឹមឡើយ ដោយអាចយកជ័យជម្នះបាន ឡើងវគ្គបន្ដ និងសម្លឹងទៅរកជើងឯកបន្ដទៀត ដើម្បីបានឱកាសទៅលេងវគ្គផ្ដាច់ព្រ័ត្រនៅភ្នំពេញ ក៏ដូចជាការពារតំណែងជើងឯកប្រចាំមណ្ឌលព្រះសីហនុរបស់ខ្លួន។

នៅចាំបានថា កាលពីរដូវកាលមុន ស្នងការដ្ឋាននគរបាលខេត្តព្រះសីហនុ A បានយកឈ្នះលើក្រុម វឌ្ឍនវិជ្ជា ក្នុងលទ្ធផល ៤-១ នៅវគ្គផ្ដាច់ព្រ័ត្រ។ ក្រោយពីឈ្នះពានរង្វាន់ប្រចាំតំបន់ហើយ ក្រុមស្នងការដ្ឋាននគរបាលខេត្តព្រះសីហនុ A នេះ ក៏បានទៅធ្វើព្យុះភ្លៀងនៅភ្នំពេញនាការប្រកួតផ្ដាច់ព្រ័ត្រទូទាំងប្រទេសផងដែរ។ តែគួរឱ្យសោកស្ដាយពួកគេបានត្រឹមវគ្គ៨ក្រុមចុងក្រោយប៉ុណ្ណោះ ក៏ធ្លាក់ចេញទៅ៕