ក្រុមប៉ូលិសកំពង់សោម ប្រាប់មូលហេតុមិនអាចការពារតំណែងជើងឯកបាន

2018-01-22 01:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមស្នងការដ្ឋាននគរបាលខេត្តព្រះសីហនុ A ប្រកួតចាញ់ក្រុម Hurricane A នៅវគ្គផ្ដាច់ព្រ័ត្រពានរង្វាន់ Tiger Street Football Festival 2018 ក្នុងលទ្ធផល ១-០។

ក្រោយពីចប់ការប្រកួតនេះដែរ លោក លឹម តាំង សមាជិកក្រុមស្នងការដ្ឋាននគរបាលខេត្តព្រះសីហនុ A បានបញ្ជាក់ថាក្រុមលេងល្អ ប៉ុន្តែមូលហេតុដែលចាញ់នេះគឺដោយសារតែសមាជិកអស់កម្លាំងនៅវគ្គផ្ដាច់ព្រ័ត្រ។ ការលេងច្រើនប្រកួតជាប់គ្នា ធ្វើឱ្យពួកគេថមថយកម្លាំងច្រើន ទើបបណ្ដាលឱ្យបរាជ័យមិនអាចការពារតំណែងជើងឯករបស់ខ្លួនបាននៅរដូវកាលនេះ។

ដោយឡែកសម្រាប់ការឡើងទៅវគ្គផ្ដាច់ព្រ័ត្រនៅភ្នំពេញវិញ ក្រុមស្នងការដ្ឋាននគរបាលខេត្តព្រះសីហនុ A រំពឹងថានឹងធ្វើបានល្អជាងឆ្នាំមុន ត្បិតអីក្រុមមានសមាជិកថ្មី និងមានពេលច្រើនទៀតក្នុងការហ្វឹកហាត់ត្រៀមទៅប្រកួត។ ការដែលបានឈានដល់វគ្គ៨ក្រុមចុងក្រោយរដូវកាលមុននោះ គឺជាក្ដីសង្ឃឹមខ្ពស់មួយសម្រាប់ក្រុមទាំងមូលនៅរដូវកាលនេះ។

ក្រុមស្នងការដ្ឋាននគរបាលខេត្តព្រះសីហនុ A ជាក្រុមខ្លាំងនៅកំពង់សោម ដែលគ្រងពាន Tiger Street ៤រដូវកាលមកហើយ។ ដោយឡែករដូវកាលនេះ ពួកគេបានត្រឹមតែលេខ២ប៉ុណ្ណោះ ដោយក្រុមលេខ១បានទៅលើ Hurricane A ទៅវិញ។ នៅមណ្ឌលព្រះសីហនុ នឹងមាន៦ក្រុមឡើងទៅលេងនៅជុំផ្ដាច់ព្រ័ត្រនាភ្នំពេញ គឺ ក្រុម Hurricane A ក្រុមស្នងការដ្ឋាននគរបាលខេត្តព្រះសីហនុ A ក្រុម Nazora Sport Club ក្រុមយុវជនកំពង់ផែ A ក្រុម Sihanouk ville និងក្រុមយុវជនកំពង់ផែ B ៕

អត្ថបទ៖ មុន្នីរម្យ