ក្លឹប១៤នឹងត្រូវបានអញ្ជើញចូលរួមពិធី Cambodia Football Award ថ្ងៃទី២៥ មករា

2018-01-22 09:27:29
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈកម្មការប្រកួតបាល់ទាត់ជាតិកម្ពុជា(CNCC)នៃសហព័ន្ធកីឡាបាល់ទាត់កម្ពុជានឹងរៀបចំពិធីប្រគល់ពានរង្វាន់បាល់ទាត់កម្ពុជា ឬ Cambodia Football Award នាល្ងាចទី២៥ ខែមករា ឆ្នាំ២០១៨ ចាប់ពីម៉ោង៦-៨យប់ នៅមជ្ឈមណ្ឌលកោះពេជ្រ។

ក្រុមបឹងកេតជាជើងឯកលីគកំពូលកម្ពុជាឆ្នាំ២០១៧

សន្និសីទសារព័ត៌មានកាលពីវេលាម៉ោង២ថ្ងៃនេះ លោក ឆាំង ពិសិដ្ឋ លេខាប្រតិបត្តិនៃគណៈកម្មការប្រកួតបាល់ទាត់ជាតិកម្ពុជាបាននិយាយថា នេះជាលើកទី១ហើយដែលសហព័ន្ធកីឡាបាល់ទាត់កម្ពុជាបានរៀបចំធ្វើពិធីពានរង្វាន់នេះឡើង។ ការរៀបចំនេះគឺស្របតាមគោលការណ៍សហព័ន្ធកីឡាបាល់ទាត់អាស៊ាន អាស៊ី និងពិភពលោក។

លោកបន្តថា ដើម្បីឲ្យអ្នកគាំទ្របានចូលរួមក្នុងពិធីថ្មីប្លែកនេះ គណៈកម្មការបានរៀបចំលក់សំបុត្រដែល១សំបុត្រតម្លៃ៤ពាន់រៀលសម្រាប់មនុស្សម្នាក់។ រាល់ចំណូលដែលទទួលបានពីការលក់សំបុត្រនឹងយកទៅប្រើប្រាស់កិច្ចការមនុស្សធម៌ដែលផ្តួលផ្តើមឡើងដោយឯកឧត្តម ឌី វិជ្ជា ប្រធាន គណៈកម្មការប្រកួតបាល់ទាត់ជាតិកម្ពុជា។ ក្រៅពីអ្នកគាំទ្រ ក្លឹបចំនួន១៤ក្នុងនោះក្លឹបធ្លាក់ចេញពីលីគកំពូលកម្ពុជាគឺ គីរីវង់សុខសែនជ័យ ក្លឹបមជ្ឈមណ្ឌលកម្ចាត់មីនកម្ពុជា និងក្លឹបថ្មីឡើងលីគរដូវកាលថ្មី សូទីឡូអង្គរ និងវិសាខា ព្រមទាំងក្លឹប១០ផ្សេងទៀតដែលលេងនៅលីគនឹងត្រូវបានអញ្ជើញឲ្យចូលរួមទាំងអស់។

សន្និសីទសារព័ត៌មាននេះធ្វើឡើងក្នុងគោលបំណងដើម្បីឲ្យមហាជនបានដឹងពីពិធីរៀបចំប្រគល់ពានរង្វាន់នាថ្ងៃទី២៥ខាងមុខ ប៉ុន្តែមិនត្រូវបានទម្លាយឲ្យដឹងថា ពានរង្វាន់ទាំងអស់មានប៉ុន្មាន និងប្រាក់រង្វាន់ប៉ុន្មានឡើយ។

ក្រុមព្រះខ័នរាជស្វាយរៀងជាជើងឯក Hun Sen Cup ឆ្នាំ២០១៧

ទោះបីជាយ៉ាងណា ពានរង្វាន់ Award Night នេះត្រូវគេដឹងថា គ្រូបង្វឹកឆ្នើម និងកីឡាករប្រជាប្រិយត្រូវបានគណៈកម្មការដាក់ឲ្យបោះឆ្នោតតាម Facebook។ នរណាដែលទទួលបាន Likes ច្រើនជាងគេនឹងត្រូវឈ្នះពានរង្វាន់ ព្រមទាំងអាចមានពានរង្វាន់សម្រាប់អ្នកគាំទ្រថែមទៀតផង។ ពានរង្វាន់ផ្សេងៗគឺចេញពីលីគបាល់ទាត់កំពូលកម្ពុជារដូវកាល២០១៧ និង Hun Sen Cup រដូវកាល២០១៧ ត្រូវប្រគល់នារាត្រីខាងមុខនេះដែរដូចជា ពានគ្រូបង្វឹកល្អ ពានកីឡាកររកគ្រាប់បាលបានច្រើនជាង ពានអ្នកចាំទីល្អ និងក្រុមអាជ្ញាកណ្តាលជាដើម៕