បើមិនហ៊ានចំណាយខ្ពស់ តំបន់អាស៊ីអាគ្នេយ៍នឹងរងគ្រោះធំពី Cyberattack

2018-01-25 02:46:43
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ដាប្រទេសក្នុងសមាគមប្រជាជាតិអាស៊ីអាគ្នេយ៍ទាំងអស់ចាំបាច់ត្រូវប្រញាប់បង្កើនទំហំចំណាយរបស់ខ្លួន ក្នុងកិច្ចគាំពារការវាយប្រហារតាមប្រព័ន្ធអ៊ីនធឺណិត (Cyberattck) នេះបើយោងតាមរបាយការណ៍ពី A.T Kearney បានចុះផ្សាយកាលពីថ្ងៃអង្គារ។

បើពុំដូច្នោះទេបណ្ដាក្រុមហ៊ុនកំពូលៗទាំង ១ ០០០ ក្នុងតំបន់យក្សមួយនេះនឹងត្រូវខាតបង់យ៉ាងហោចណាស់ ៧៥០ ប៊ីលានដុល្លារ នៃទីផ្សារមូលធនសរុបរបស់ខ្លួន។

នាយកក្រុមហ៊ុន Cisco នៅប៉ែកអាស៊ីអាគ្នេយ៍លោក Naveen Menon បានថ្លែងប្រាប់ CNBC ដូច្នោះថា "មិនត្រឹមតែខាតបង់ចំណូល ទៀតសោតក៏ធ្វើឲ្យក្រុមហ៊ុនបាត់បង់ភាពដែលអាចទុកចិត្តបានថែមទៀតផង ហើយជាមធ្យមពួកគេត្រូវខាតចន្លោះ ១០ ទៅ ៣៥ ភាគរយ"។

ខណៈប៉ុន្មានឆ្នាំចុងក្រោយ អាស៊ីអាគ្នេយ៍បានប្រែក្លាយជាតំបន់អភិវឌ្ឍផ្នែកឌីជីថលនិងការបង្កើតថ្មី ជាកត្តាធ្វើឲ្យមានកំណើននៃការប្រើប្រាស់ប្រព័ន្ធអ៊ីនធឺណិតនិងស្មាតហ្វូន ហើយកាលពីឆ្នាំទៅការសិក្សាមួយក៏ធ្លាប់ប៉ាន់ប្រមាណសេដ្ឋកិច្ចនៃប្រព័ន្ធអ៊ីនធឺណិតនឹងកើនដល់ ២០០ ប៊ីលានដុល្លារនាឆ្នាំ ២០២៥។

ក្នុងឆ្នាំ ២០១៧ ជាមធ្យមបណ្តាប្រទេសធំៗក្នុងសកលលោកបានចំណាយ ០.១៣ ភាគរយនៃទំហំ GDP សរុបដើម្បីបញ្ចៀសពីការវាយប្រហារលើប្រព័ន្ធអ៊ីនធឺណិត ខណៈបណ្ដាប្រទេសក្នុងអាស៊ានចំណាយត្រឹម ០.០៦ ភាគរយ ស្មើនឹង ១.៩ ប៊ីលានដុល្លារប៉ុណ្ណោះ។ ថ្វីបើសិង្ហបុរីជាប្រទេសមួយដែលហ៊ានចំណាយខ្ពស់ជាងគេបន្តិចក្តី ប៉ុន្តែអ្នកជំនាញបានណែនាំឲ្យក្នុងប្រទេសជាសមាជិកទាំងមូល ត្រូវបង្កើនទំហំចំណាយចន្លោះ ០.៣៥ ដល់ ០.៦១ ដែលស្មើនឹង ១៧១ ប៊ីលានដុល្លារ ក្នុងឆ្នាំ ២០១៧ ដល់ ២០២៥។