អគារខ្មោចរស់ឡើងវិញ មានផលប្រយោជន៍អី្វសម្រាប់អ្នកភ្នំពេញឬអត់?

2018-01-29 02:40:17
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងអគារ ៤២ជាន់ GoldTower ជាគម្រោងជាប់គាំងយូរបំផុតនៅកម្ពុជា ពេលនេះម្ចាស់គម្រោងអគារកប់ពពកមួយនេះ បានចេញមុខសន្យានៅថ្ងៃទី ២៨ មករា ឆ្នាំ ២០១៨ ថា នឹងបញ្ចប់គម្រោងឲ្យរួចរាល់នៅមុនឆ្នាំ ២០២០។ ការចាប់ផ្ដើមសាងសង់ឡើងវិញ វាពិតជាដំណឹងដ៏ប្រពៃសម្រាប់ទីក្រុងភ្នំពេញ ស្របពេលវិស័យអចលនទ្រព្យនៅកម្ពុជាកំពុងមានសន្ទុះនាពេលបច្ចុប្បន្ន។

ជុំវិញការរស់ឡើងវិញនៃអគារខ្មោចកណ្ដាលក្រុងនេះ អ្នកវិភាគសេដ្ឋកិច្ច លោក ង៉ែត ជូ បានលើកឡើងថា ទីក្រុងចំណេញមុខមាត់ តែពលរដ្ឋហាក់បានប្រយោជន៍តិចតួច។ លោកបន្តថា រឿងល្អទី១ នោះ គឺបានដោះស្រាយឲ្យអតិថិជនដែលបានទិញរួច និងទី២ ជាសញ្ញាល្អលើវិស័យអចលនទ្រព្យ។

លោកថា៖ «ការសម្រួលកេរ្តិ៍ឈ្មោះ និងបរិយាកាសឲ្យកម្ពុជាក្នុងការទាក់ទាញវិនិយោគ ព្រោះថាការផ្អាកដំណើរការយូរពេក អគារនេះស្ទើរតែក្លាយទៅជា អគារខ្មោច និងជានិមិត្តរូបមិនល្អមួយនៃការអភិវឌ្ឍវិស័យសំណង់នៅកម្ពុជា»។ សម្រាប់ពលរដ្ឋនៅទីក្រុងនឹងសប្បាយចិត្ត ព្រោះថាកន្លងមកនៅពេលឆ្លងកាត់ ឃើញអគារជាប់គាំងនៅកណ្ដាលក្រុងបែបនេះ វាដូចជាមិនសមទំនងឡើយ។

លោកបញ្ជាក់ថា ការសាងសង់អគារខ្ពស់ៗនៅកណ្ដាលក្រុង មិនមានជួយអ្វីដល់ប្រជាជនឡើយ ប៉ុន្តែបើងាកមកសាងសង់សួនច្បារសម្រាប់លំហែកាយវិញនោះ ពលរដ្ឋពិតណាស់នឹងចំណេញទាំងសុខភាពផ្លូវកាយ និងផ្លូវចិត្ត។

បញ្ហាជាប់គាំងអគារស្អុយកណ្ដាលក្រុង ត្រូវបានម្ចាស់គម្រោងបញ្ជាក់ក្រោមហេតុផលថា ដោយសារវិបត្តិសេដ្ឋកិច្ចអំឡុងឆ្នាំ ២០០៨។ លោក Kim Tae Yeon អគ្គនាយកក្រុមហ៊ុន YON WOO អភិវឌ្ឍអគារ៤២ជាន់ ឲ្យដឹងថា ក្រុមហ៊ុនបានបន្ថែមទុន ១៥០លានដុល្លារលើគម្រោង Golden Tower មួយនេះ ដោយកាលពីមុនធ្លាប់បានបោះទុនចំនួន១០០លានដុល្លារ រួចមកហើយ។ បច្ចុប្បន្នអគារបានសាងសង់ដល់ជាន់ទី ២៨ ហើយនៅក្នុងឆ្នាំ ២០១៨ សម្រេចឲ្យបាន ៣៦ជាន់៕