រថភ្លើងអាកាសគ្មានមនុស្សបើក ដែលជិតមាននៅខ្មែរ កើតមានតាំងពីឆ្នាំណាមក?
- 2018-01-30 01:47:25
- ចំនួនមតិ 0 | ចំនួនចែករំលែក 0
រថភ្លើងអាកាសគ្មានមនុស្សបើក ដែលជិតមាននៅខ្មែរ កើតមានតាំងពីឆ្នាំណាមក?
ចន្លោះមិនឃើញ
ក្រសួងសាធារណការ និងភ្នាក់ងារ JICAរបស់ជប៉ុន បានកំពុងសិក្សាដើម្បីសាងសង់ផ្លូវរថភ្លើងលើអាកាសដំបូងបង្អស់នៅកម្ពុជា។ រថភ្លើងលើអាកាសនេះទៀតសោតជាប្រភេទរថភ្លើង AGT ដែលមានល្បឿនលឿនពិសេសមួយសម្រាប់រត់នៅទីប្រជុំជន ដែលដំណើរការដោយគ្មានមនុស្សបើក។
AGT មកពីពាក្យពេញថា Automated Guideway Transit ប្រើសម្គាល់លើប្រព័ន្ធធ្វើដំណើរស្វ័យប្រវត្តិ គ្មានអ្នកបើកបរ ដែលក្នុងនោះរថភ្លើងអាចដំណើរការទៅមុខដោយស្វ័យប្រវត្តិតាមរយៈប្រព័ន្ធកុំព្យូទ័រ។ AGT នេះត្រូវបានគេយកទៅប្រើប្រាស់សម្រាប់ ដឹកជញ្ជូនមនុស្សក្នុងទ្រង់ទ្រាយតូច ដូចជានៅតាមព្រលានយន្តហោះ និងដឹកជញ្ជូនមនុស្សក្នុងទ្រង់ទ្រាយធំ ដូចជាខ្សែរថភ្លើងអាកាសក្នុងទីក្រុង Vancouver ប្រទេសកាណាដាជាដើម។
ចំពោះការប្រើសម្រាប់ដឹកជញ្ជូនមនុស្សក្នុងទ្រង់ទ្រាយតូច គេឃើញមានប្រើប្រាស់ដំបូងគេនៅព្រលានយន្តហោះអន្តរជាតិ Tampan ក្នុងរដ្ឋ Florida សហរដ្ឋអាមេរិក នាឆ្នាំ ១៩៧១។ ប្រព័ន្ធរថភ្លើង AGT ទាំងនៅលើអាកាស និងលើដី ដែលប្រើនៅព្រលានយន្តហោះនេះ អាចឲ្យគេពង្រីកសមត្ថភាពដឹកជញ្ជូនដោយមិនចាំបាច់ពង្រីកទីតាំង។
ប្រព័ន្ធរថភ្លើង AGT ខ្នាតតូចនេះត្រូវបានដំឡើងនៅព្រលានយន្តហោះធំៗមួយចំនួននៅជុំវិញពិភពលោក ដែលជាទូទៅវាតភ្ជាប់ពីស្ថានីយអ្នកដំណើរ (Terminal) ទៅកាន់កន្លែងចតរថយន្ត។ ក្រៅពីនេះប្រព័ន្ធ AGT ក៏ត្រូវបានប្រើនៅសួនកម្សាន្តធំៗផងដែរ។
ដោយឡែកខ្សែរថភ្លើង Port Island Line នៃទីក្រុង Kobe ប្រទេសជប៉ុន គឺជាខ្សែរថភ្លើងដំបូងគេដែលបានប្រើប្រព័ន្ធ AGT ក្នុងទ្រង់ទ្រាយធំ ដែលចាប់ផ្ដើមដំណើរការនៅឆ្នាំ ១៩៨១។ វាតភ្ជាប់ស្ថានីយរថភ្លើងធំរបស់ Kobe គឺស្ថានីយ Sannomiya ជាមួយនឹងតំបន់ចំណតកប៉ាល់ និងព្រលានយន្តហោះ Kobe។ ប្រព័ន្ធស្រដៀងគ្នាក៏ត្រូវបានដំឡើងនៅតំបន់ដទៃទៀតក្នុងប្រទេសជប៉ុនជាបន្តបន្ទាប់ផងដែរ។
គួរដឹងថាបច្ចុប្បន្ននេះ រថភ្លើង AGT ដែលមានល្បឿនលឿនជាងគេបំផុតគឺផលិតឡើងដោយក្រុមហ៊ុន Mitsubishi Heavy Industries របស់ជប៉ុន ដែលរត់បានដល់ល្បឿន ១២០ គ.ម/ម៉ លឿនជាងរថភ្លើង AGT ធម្មតាដល់ទៅពីរដង។
ដោយឡែករថភ្លើងលើអាកាសថ្មីបំផុតនៅកម្ពុជា អាចនឹងរត់ក្នុងល្បឿនចន្លោះពី ៣៥ ទៅ ៤០គីឡូ ក្នុងមួយម៉ោង។ នេះបើតាម លោក វ៉ា ស៊ឹមសូរិយា អ្នកនាំពាក្យនៃក្រសួងក្រសួងសាធារណការបានបញ្ជាក់៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
