គ្រូប្រដាល់ម្នាក់ថា ឈ្មោះរបស់លោក គេស្គាល់ច្រើនដោយសារ សុខ ធី

2018-02-02 02:18:40
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សាន់ សាយយ៉ាន់ គ្រូប្រដាល់មកពីខេត្តបន្ទាយមានជ័យថា កេរ្តិ៍ឈ្មោះហាក់រើបឡើងវិញមួយរយៈចុងក្រោយនេះ គឺដោយសារកីឡាករ សុខ ធី ឬ កាកា បានឡើងប្រកួតតាមសង្វៀននានាមិនថានៅក្នុងប្រទេស ដូចជានៅក្រៅប្រទេសឡើយ។

លោក សាន់ សាយយ៉ាន់

សាន់ សាយយ៉ាន់ បានឲ្យដឹងថា នៅពេលបានកូនសិស្សដូចជា សុខ ធី សុខ រិទ្ធ ឡើងប្រកួតតាមបណ្ដាសង្វៀនក្នុងស្រុកដូចបច្ចុប្បន្ននេះ អ្នកនិយមប្រដាល់បានស្គាល់លោកជាគ្រូផងដែរ។ សម្រាប់អ្នកប្រកួតជំនាន់លោកឡើងសង្វៀន ឬអ្នកទស្សនាប្រដាល់អំឡុងកាលនោះ ខ្លះថាលោកស្លាប់ទៅហើយ ប៉ុន្តែឥលូវនេះគេគ្រប់គ្នាបានដឹងថាលោកនៅរស់រានមានជីវិតទេ។

កីឡាករ សុខ ធី ពេលឈ្នះជុំដំបូងនៅបាយ័ន

កីឡាករ សុខ រិទ្ធ ពេលប្រកួតកន្លងទៅ

គ្រូប្រដាល់ខាងលើបន្ថែមថា សប្បាយរីករាយជាខ្លាំងនៅពេលមានសិស្សប្រកួតល្អ និងមានកេរ្តិ៍ឈ្មោះដូចនេះ ហើយនៅមានកីឡាករល្អៗច្រើននាក់ទៀតតែចាប់គូមិនត្រូវណាមួយក្លឹបរបស់លោកនៅឆ្ងាយផង។ បើបានកូនសិស្សឡើងប្រកួតច្រើនទៅកេរ្តិ៍ឈ្មោះក្លឹបក៏ល្បី និងមានជីវភាពរស់នៅសមរម្យបានបន្តិចដែរ។

កីឡាករ សុខ រិទ្ធ

សាន់ សាយយ៉ាន់ ជាគ្រូប្រដាល់របស់កីឡាករ សុខ ធី សុខ រិទ្ធ នៅឯខេត្តបន្ទាយមានជ័យ។ ឥលូវនេះកូនសិស្សរបស់លោក គឺ សុខ ធី កំពុងប្រកួតដណ្ដើមខ្សែក្រវាត់ទម្ងន់ ៥៧គីឡូក្រាមរបស់សង្វៀនបាយ័ន ហើយគ្រូប្រដាល់រូបនេះតែងមកភ្នំពេញឲ្យទឹកកូនសិស្សផងដែរ សប្ដាហ៍នេះដល់ពេលកូនសិស្សរបស់លោកឡើងប្រកួតទៀតហើយ៕

អត្ថបទ៖ នួន ស៊ីណា