និស្សិតហុងកុងជាច្រើននាក់តវ៉ាមិនចង់ឲ្យសាលាដាក់បញ្ចូលមុខវិជ្ជាភាសាចិនកុកងឺសម្រាប់ការប្រលងចេញរបស់ពួកគេ
- 2018-02-04 07:32:41
- ចំនួនមតិ 0 | ចំនួនចែករំលែក 0
និស្សិតហុងកុងជាច្រើននាក់តវ៉ាមិនចង់ឲ្យសាលាដាក់បញ្ចូលមុខវិជ្ជាភាសាចិនកុកងឺសម្រាប់ការប្រលងចេញរបស់ពួកគេ
ចន្លោះមិនឃើញ
និស្សិតហុងកុង២នាក់ ត្រូវបានគម្រាមសម្លាប់ តាមរយៈសារផ្ញើចូលគណនី facebookបន្ទាប់ពីពួកគេតវ៉ាអស់ជាច្រើនសប្តាហ៍ មិនពេញចិត្តរឿងសាលាបញ្ចូលមុខវិជ្ជាថ្នាក់ភាសាចិនកុកងឺ ដែលពួកគេដាច់ខាតត្រូវប្រលងឲ្យជាប់ដើម្បីបញ្ចប់ថ្នាក់បរិញ្ញាប័ត្រ។ នេះបើតាមការចុះផ្សាយរបស់សារព័ត៌មាន The South China Morning Post ដែលមានមូលដ្ឋាននៅទីក្រុងហុងកុងទើបបានចុះផ្សាយ។
និស្សិតឆ្នាំទី៥ផ្នែកឱសថ លោក Andrew Chan Lok-Hang និង ប្រធានសហជីពនិស្សិតលោក Lau Tsz-kei ជានិស្សិតហុងកុង២នាក់ក្នុងចំណោមនិស្សិតជាង៣០នាក់ នៃសាកលវិទ្យាល័យ Hong Kong Baptist University ផ្តើមការតវ៉ាតាំងពីថ្ងៃទី១៧ ខែមករា ព្រោះមិនពេញចិត្តគោលការណ៍សាលាដែលបញ្ចូលមុខវិជ្ជាភាសាចិនកុកងឺចាំបាច់ត្រូវតែរៀន ខណៈដែលខាងសាកលវិទ្យាល័យក៏បានសម្រេចផ្អាកមិនឲ្យគេ២នាក់ចូលរៀនរយៈពេល១សប្តាហ៍។ ប្រភពខាងលើបន្ត។
ហុងកុងដែលនៅក្រោមអាណានិគមអង់គ្លេស១៥៥ឆ្នាំ រហូតមកដល់ឆ្នាំ១៩៩៧ ហាក់មានទំនោរទៅតាមការរស់នៅតាមបែបបច្ចឹមលោក ម្ល៉ោះហើយរដ្ឋាភិបាលប៉េកាំងបានយល់ព្រមអនុវត្ត "One Country, Two Systems” ដែលមានន័យថាចិនកុម្មុយនីស្ត អនុញ្ញាតឲ្យទីក្រុងហុងកុងមានគោលនយោបាយតាមបែបលិទ្ធិប្រជាធិបតេយ្យដែលពួកគេចង់បាន។ ការនេះក៏ប្រហែលជា ធ្វើឲ្យនិស្សិតហុងកុងមួយចំនួនដែលនិយាយភាសាចិនកាតាំង មិនចង់រៀនភាសាចិនផងដែរ ខណៈនិស្សិតហុងកុងនៅសាកលវិទ្យាល័យខាងលើប្រមាណ៧០% ធ្លាក់មុខវិជ្ជាចិនកុកងឺដើម្បីប្រលងបញ្ចប់បរិញ្ញាប័ត្ររបស់ពួកគេ។
និស្សិតពេទ្យខាងលើ ដែល profile របស់គេលេចធ្លោខ្លាំងនៅក្នុងការតវ៉ា បាននិយាយថា មានសាររាប់រយផ្ញើមកកាន់ facebook របស់គេដើម្បីគម្រាមសម្លាប់។ Chan ត្រូវបង្ខំចិត្តពន្យាពេលក្នុងការចុះកម្មសិក្សារបស់ខ្លួននៅមន្ទីរពេទ្យក្វាងចូវ ក្នុងខេត្តក្វាងតុង ដែលមានព្រំប្រទល់ជាប់នឹងហុងកុង។ និស្សិតពេទ្យឆ្នាំទី៥ខាងលើ បច្ចុប្បន្នក៏បានចេញពីផ្ទះ និង កំពុងរស់នៅខាងក្រៅជាមួយមិត្តភក្តិ ព្រោះដើម្បីសុវត្ថិភាពក្រុមគ្រួសាររបស់គេ។ ប្រភពខាងលើបន្ថែម។
"វាជាអ្វីដែលត្រឹមត្រូវ ដូច្នេះខ្ញុំនឹងបន្តប្រយុទ្ធទៀត" Chan បាននិយាយ៕