គ្រូបង្វឹក Pahang ថា វឌ្ឍនាកា លេងមិនល្អសោះ ២ប្រកួតមកនេះ មិនដឹងហេតុអ្វី

2018-02-08 07:40:09
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Dollah Salleh គ្រូបង្វឹកក្រុម Pahang FA បានបញ្ជាក់ថាខ្សែប្រយុទ្ធលេខ១១កម្ពុជា លេងមិនល្អដូចមុនសោះ ក្នុងការបង្ហាញខ្លួន២ប្រកួតនៅលីគកំពូលម៉ាឡេស៊ីនេះ។

វឌ្ឍនាកា ជាកីឡាករវ័យក្មេងឆ្នើមម្នាក់របស់កម្ពុជា ដែលទទួលបានការគាំទ្រច្រើនពីសំណាក់អ្នកគាំទ្រ។ កីឡាករវ័យ២៤ឆ្នាំរូបនេះ ត្រូវបានក្លឹបនៅលីគកំពូលជប៉ុនខ្ចីជើង១រដូវកាលកាល មុនពេលផ្ទេរទៅលេងនៅ Pahang FA នៅរដូវកាលនេះ ដោយទទួលបានប្រាក់តម្លៃខ្លួនខ្ពស់ជាង១ម៉ឺនដុល្លារអាមេរិកក្នុង១ខែ។

ក្រោយពីបង្ហាញខ្លួនបាន២ប្រកួតជាផ្លូវការឱ្យក្លឹបនៅម៉ាឡេស៊ីរួចមក លោក Dollah ដែលជាគ្រូបង្វឹកបាននិយាយចំពោះទម្រង់លេងរបស់យុវជនថ្នាលស្វាយរៀងនេះថា៖ “គាត់ជាកីឡាករល្អ គាត់ធ្លាប់លេងបានយ៉ាងល្អពីមុនមក... ពេលនេះទម្រង់លេងរបស់គាត់ហាក់ដូចជាមិនដូចមុនសោះ២ប្រកួតកន្លងមកនេះ។ ខ្ញុំសង្ឃឹមថាគាត់នឹងលេងល្អវិញនៅប្រកួតបន្ទាប់... ខ្ញុំមិនដឹងថាកើតអ្វីទើបគាត់លេងមិនល្អអីចឹងសោះ”។

វឌ្ឍនាកា លេង២ប្រកួតមកនេះបានជាប់ជម្រើស១១នាក់ដំបូងរហូត ប៉ុន្តែការលេងហាក់ដូចជាមិនទាន់យល់ចិត្តគ្នាជាមួយសមាជិកក្រុមនោះទេ។ កីឡាករដែលធ្លាប់តែញាក់ដាច់ខ្សែការពារ ស៊ុតបញ្ចូលទីម្នាក់នេះ មិនរកបាន១គ្រាប់នៅឡើយទេ ឱ្យក្លឹបថ្មីរបស់ខ្លួនក្នុងលីគកំពូលម៉ាឡេស៊ី៕

ប្រភព៖ Fox Sports Asia ប្រែសម្រួល៖ មុន្នីរម្យ