មិនទាន់ដល់ ១៤កុម្ភៈផង Selena និង Justin នៅផ្អែមល្ហែមជាមួយគ្នាបាត់ទៅហើយ

2018-02-13 03:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីជាមិនទាន់ដល់ថ្ងៃបុណ្យនៃសេចក្ដីស្រឡាញ់ក៏ដោយ ប៉ុន្តែតារាចម្រៀង Selena Gomez និងJustin Bieber បានចំណាយពេលយ៉ាងផ្អែមល្ហែមជាមួយគ្នាបាត់ទៅហើយ។

បើតាមវិបសាយ E! News បានឲ្យដឹងថា គូស្នេហ៍តារាមួយគូនេះបានធ្វើដំណើរទៅឆ្នេរ Laguna ក្នុងរដ្ឋ California ហើយបានស្នាក់នៅក្នុងសណ្ឋាគារ Montage ជាមួយគ្នា ពេញមួយសប្ដាហ៍។

តាមប្រភពមួយបានប្រាប់វិបសាយនេះថា៖ "Justin និង Selena បានឲ្យអ្នកបើកឡានជូនពួកគេទៅឆ្នេរ Laguna កាលពីរសៀលថ្ងៃសៅរ៍។ Justin ធ្លាប់បានទៅសណ្ឋាគារMontage ជាច្រើនលើកពីមុនមក ហើយលោកតែងតែចូលចិត្តទៅកន្លែងនេះជានិច្ចរាល់ពេលដែលលោកចង់ចំណាយពេលជាលក្ខណៈឯកជន"។

នៅពេលដែលពួកគេទៅដល់ ប្រភពមួយបានប្រាប់ថាគូស្នេហ៍មួយគូនេះបាន "បណ្ដើរគ្នាលេងនៅលើផ្លូវពីមុខ resort ដែលមើលទៅឃើញសមុទ្រ។ ដោយមេឃរៀងស្រឡះនិងមានពពកច្រើន ដូច្នេះហើយពួកគេមិនមានចំណាយពេលនៅក្រៅយូរនោះទេ"។

ប្រភពនោះក៏បានបន្ថែមទៀតថា៖ "Justin បានបង្ហាញ Selena ពីទិដ្ឋភាពដ៏ស្រស់ស្អាតជុំវិញនោះ"។

បើតាមម្ចាស់គណនី Twitter ម្នាក់ឈ្មោះ Chris លោកក៏បានថតជាប់តារា២រូបនេះដោយចៃដន្យដែរនៅពេលដែលលោកថតរូបលេងនៅមុខសណ្ឋាគារ។

walked past justin beiber and selena gomez at the beach pic.twitter.com/TBj1ajXTdA
— cb (@xxCB_) February 11, 2018

បើតាមប្រភពពី TMZវិញ ក៏បានឲ្យដឹងដែរថា៖ "ពួកគេទាំង២បានស្លៀកពាក់ខោអាវធម្មតាអង្គុយនៅជិតអាងហែលទឹក។ ពួកគេផឹកទឹក ជជែកគ្នាលេង។ ប៉ុន្តែដោយសារតែមានមនុស្សចាប់អារម្មណ៍ច្រើន ពួកគេក៏សម្រេចចិត្តចេញទៅតំបន់ spa ដែលស្ងប់ស្ងាត់អាចឲ្យពួកគេចំណាយពេលផ្ទាល់ខ្លួនបាន"។

តារាចម្រៀង Selena Gomez អាចនឹងចំណាយពេលក្នុងថ្ងៃ១៤ កុម្ភៈនៅទីក្រុង ញ៉ូយ៉ក ដោយត្រូវចូលរួមកម្មវិធី Coach for Fashion Week។ ទោះបីជាមិនបានចំណាយពេលជាមួយគ្នាក្នុងថ្ងៃពិសេសនេះក្ដី ក៏គូស្នេហ៍តារាមួយគូនេះ បានឆ្លៀតចំណាយពេលជាមួយគ្នាមុនថ្ងៃបុណ្យនៃសេចក្ដីស្រឡាញ់នេះដែរ៕

ចុចអាន៖

ប្រភព៖ TMZ | Eonline ប្រែសម្រួល៖ អន សុភក្ត្រា