មេ​ YouTube ប្រាប់មូលហេតុ​​មិន​បណ្ដេញ Logan Paul ចេញ​ពី​បណ្ដាញ​ខ្លួន​

  • 2018-02-13 07:33:26
  • ចំនួនមតិ

ចន្លោះមិនឃើញ

​បណ្ដាញ​ YouTube បាន​​ដាក់​ទោស​ Logan Paul ដោយ​មិន​ឲ្យ​រក​លុយ​តាម​រយៈ​វីដេអូ​, ដក​ឈ្មោះ​ចេញ​ពី​​កម្មវិធី​ Google Preferred និង​ផ្អាក​គម្រោង​ការ​បង្កើត​វីដេអូ​ Original ជា​បណ្ដោះ​អាសន្ន​ថែម​ទៀត​ផង។ យ៉ាងណាក្ដី​នេះ​មិន​មាន​ Logan ​នឹង​ត្រូវ​ YouTube​ ដក​ចេញ​​ពី​បណ្ដាញ​នោះ​ទេ។

ក្នុង​បទ​សម្ភាសន៍​នៅ​​សន្និសីទ​ Code Media ប្រចាំ​ឆ្នាំ​ Susan Wojcicki នាយក​ប្រតិបត្តិ​ YouTube ​និយាយ​ថា​ Logan នឹង​​មិន​ត្រូវ​ Ban (ហាម​ឃាត់) ពី​បណ្ដាញ​វីដេអូ​នេះ​ ក្នុង​ពេល​ឆាប់ៗ​នោះ​ទេ។ អ្នក​ស្រី​បក​ស្រាយ​ថា ៖ "​គាត់​ (Logan) មិន​​ទាន់​បាន​​ធ្វើ​អ្វី​ខុស​​ដែល​​ត្រូវ​រង​ការ​ពិន័យ​ពី​ច្បាប់​ Three Strikes របស់ YouTube នៅ​ឡើយ​ទេ។ យើង​មិន​អាច​ដក​អ្វី​ចេញ​​បាន​ស្រេច​ចិត្ត​នោះ​ទេ ​លុះ​ត្រា​ពួក​គេ​បាន​ល្មើស​ច្បាប់ YouTube​”។

អ្នក​ស្រី​ Susan និយាយ​អំពី​​ច្បាប់​ Three Strikes របស់​ YouTube ​ដែល​អាច​ឲ្យ​បណ្ដាញ​វីដេអូ​នេះ​​លុប​ចោល​គណនី​របស់​អ្នក​ផលិត​វីដេអូ​ណា​មួយ​បាន​ ប្រសិន​បើ​គណនី​នោះ​ល្មើស​ច្បាប់​ចំនួន​ ៣ ដង​ ក្នុង​រយៈពេល​ ៣ ខែ។ តាម​សេចក្ដី​ណែនាំ​របស់​ YouTube បង្ហាញ​ថា​គណនី​មួយ​​បាន​ល្មើស​ច្បាប់​នៅ​ពេល​វីដេអូ​របស់​ពួក​គេ​​មាន​ផ្ទុក​នូវ​មាតិកា​​អាស​អាភាស, អំពើ​ហិង្សា, គ្រោះ​ថ្នាក់, ជេរ​ប្រមាថ, គំរាមកំហែង, ការ​រំខាន (Spam), ផ្ដល់​ទិន្នន័យ​មិន​ត្រឹម​ត្រូវ និង ការ​បោក​ប្រាស់។

Logan Paul កើត​មាន​បញ្ហា​ចាប់​តាំង​ពី​បាន​បង្ហោះ​វីដេអូ​បង្ហាញ​ពី​មនុស្ស​ចង​ក​នៅ​ប្រទេស​ជប៉ុន។ ស្រប​ពេល​ដែល​បាន​ចេញ​មុខ​សុំទោស​ តារា​ YouTube រូប​នេះ​ក៏​បាន​​វីដេអូ​ឆក់​សាក​សព​កណ្ដុរ និង​បាន​​បញ្ចេញ​សារ​ដែល​និយាយ​ថា​នឹង​ចូល​​រួម​ក្នុង​ Challenge ដ៏​គ្រោះ​ថ្នាក់​ឈ្មោះ​ Tide Pods Challenge ទៀត​ផង។ ទង្វើ​ទាំង​នេះ​មិន​បាន​ជួយ​អ្វី​ ប៉ុន្តែ​ធ្វើ​​មតិ​រិះគន់​លើ​ Logan Paul រួម​ទាំង​ YouTube កើត​មាន​កាន់​តែ​ច្រើន។ ​​​​​​​​

នាយក​ប្រតិបត្តិ​ YouTube ​សង្កត់​ធ្ងន់​ថា​​នឹង​​​មិន​ Ban គណនី​ Logan Paul ដោយ​សារ​​ការ​រិះគន់​ពី​អ្នក​ប្រើ​ប្រាស់​នោះ​ទេ ព្រោះ​ថា​បណ្ដាញ​របស់​ខ្លួន​មាន​ច្បាប់​ផ្ទាល់​ខ្លួន​មួយ​ដើម្បី​អនុវត្តន៍​លើ​វីដេអូ​រាប់​លាន៕​​​ ​​​​​


ប្រភព៖ engadget ប្រែ​សម្រួល៖ សុខហេង