សំណួរមួយសោះ ធ្វើឲ្យ Mourinho ទប់អារម្មណ៍មិនបាន ហើយសុំឱបអ្នកសារព័ត៌មាន

2018-02-22 11:15:08
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លឹបបិសាចក្រហម លោក Jose Mourinho ក្នុងថ្ងៃនេះបានឱបអ្នកសារព័ត៌មាន BT Sport ម្នាក់ បន្ទាប់ពីលោកត្រូវបានអ្នកសារព័ត៌មាននោះសួរថា៖ "តើលោកគិតយ៉ាងណា ចំពោះការលេងរបស់កីឡាករ Scott McTominay ពេលប៉ះ Sevilla?”

ក្រោយត្រូវបានសួរសំណួរមួយនេះ លោក Mourinho មិនបានឆ្លើយតបនឹងសំណួរភ្លាមៗនោះទេ។ លោកបែរជាសួរបកទៅវិញថា៖ "តើខ្ញុំអាចសុំអ្នកឱបមួយបានទេ?” ។ បន្ទាប់ពីសួររួច លោកអ្នកចាត់ការព័រទុយហ្គាល់ក៏ធ្វើការឱបអ្នកសារព័ត៌មាននោះ។ រួចទើប លោកបាននិយាយថា៖ នេះទើបជាសំណួរ។ នៅក្នុងសន្និសីទសារព័ត៌មានថ្ងៃមុន គេសួរខ្ញុំតែពីរឿង Paul Pogba។ បើតាមគំនិតខ្ញុំ សំណួរគួរតែបែរមកផ្ដោតលើកីឡាករ McTominay។

បន្ទាប់ពីនិយាយបែបនេះ លោកក៏ចាប់ផ្ដើមឆ្លើយសំណួរពីខាងដើមរបស់អ្នកសារព័ត៌មាន៖ "ខ្ញុំគិតថា McTominay លេងបានយ៉ាងល្អ។ គេធ្វើការដាក់សម្ពាធទៅលើខ្សែបម្រើ Banega (កីឡាករ Sevilla) បានយ៉ាងល្អ ដើម្បីកុំឲ្យកីឡាកររូបនេះក្រឡុកពេក។ និយាយទៅ គេលេងបានល្អណាស់ក្នុងប្រកួតនេះ"។

តាំងពីលោក Mourinho និងខ្សែបម្រើ Pogba ជជែកគ្នាតឹងសរសៃកក្នុងអំឡុងប្រកួតប៉ះ Tottenhem Hotspur កាលពីដើមខែមក កីឡាករបារាំងមិនត្រូវបានអ្នកចាត់ការព័រទុយហ្គាល់ដាក់ឲ្យចូលលេងតាំងពីដើមតង់ជាច្រើនប្រកួត។ ការណ៍នេះ ធ្វើឲ្យទំនាក់ទំនងរវាងលោក Mourinho និង Pogba កំពុងជាប្រធានបទក្ដៅដែលអ្នកសារព័ត៌មានជាច្រើនកំពុងតាមប្រមាញ់។ តួយ៉ាង ក្នុងសន្និសីទសារព័ត៌មានចុងក្រោយមុនប៉ះ Sevilla សំណួរដែលសួរទៅកាន់អ្នកចាត់ការក្លឹបបិសាចក្រហម គឺភាគច្រើនទាក់ទងនឹង Pogba តែម្ដង។

ខាងក្រោមជាវីដេអូលោក Mourinho អោបអ្នកសារព័ត៌មាន (នាទី ០ៈ៥៨-១ៈ០៥)៕