ពិព័រណ៍វិទ្យាសាស្ត្រសិស្សនៅសៀមរាប ឆ្នាំនេះរៀបចំធំជាងមុន អ្នកចូលរួមក៏ច្រើនជាងមុន
- 2018-02-24 09:56:10
- ចំនួនមតិ 0 | ចំនួនចែករំលែក 0
ពិព័រណ៍វិទ្យាសាស្ត្រសិស្សនៅសៀមរាប ឆ្នាំនេះរៀបចំធំជាងមុន អ្នកចូលរួមក៏ច្រើនជាងមុន
ចន្លោះមិនឃើញ
ម៉ោងជាង ៨ ព្រឹក នៅបរិវេណវិទ្យាល័យហ៊ុនសែន វត្តស្វាយខេត្តសៀមរាប មានមនុស្សយ៉ាងកកកុញ ដែលមកទស្សនាពិព័រណ៍បច្ចេកវិទ្យា វិស្វកម្ម និងវិទ្យាសាស្ត្រ (Steam Fair)។
ឆ្នាំនេះជាឆ្នាំទីពីរដែលសាលាស្ថិតនៅក្នុងក្រុងសៀមរាបមួយនេះ បានរៀបចំពិព័រណ៍នេះឡើងដើម្បីបង្ហាញស្នាដៃកើតឡើងពីគំនិតច្នៃប្រឌិតរបស់សិស្សកំពុងសិក្សា និងជាការចូលរួមបំផុសការសិក្សាមុខជំនាញផ្នែកវិទ្យាសាស្ត្រនិងវិស្វកម្មរបស់សិស្សនៅតាមសាលានានា។
លោក ភិន សុវណ្ណារិទ្ធ នាយកវិទ្យាល័យហ៊ុន សែន វត្តស្វាយបានលើកឡើងថា នៅខេត្តសៀមរាប ទើបតែមានសាលាហ៊ុន សែនវត្តស្វាយ ដែលបានរៀបចំពិព័រណ៍ផ្ដោតលើការសិក្សាមុខវិទ្យាផ្នែកវិទ្យាសាស្ត្រនិងវិស្វកម្ម ដែលមានការចូលរួមបង្ហាញស្នាដៃពីសិស្សានុសិស្សគ្រប់កម្រិតចាប់ពីថ្នាក់ទី ៧ ដល់ទី ១២។
ឆ្នាំនេះការរៀបចំធំជាងឆ្នាំមុន ដោយមានការចូលរួមច្រើនទាំងអ្នកទស្សនានិងស្នាដៃដែលយកមកបង្ហាញ។
លោកបញ្ជាក់ថា ការដំណើរការពិព័រណ៍ទាំងស្រុង ជាគំនិតកើតឡើងដោយក្រុមសិស្ស ដោយសាលាគ្រាន់តែជួយសម្រួលទីតាំងនិងការងារមួយចំនួនទៀតប៉ុណ្ណោះ។
"វាជាគំនិតដ៏អស្ចារ្យដែលពួកកូនសិស្សក្មេងៗបានស្រុះដៃគ្នារៀបចំ ដែលធ្វើឲ្យកម្មវិធីអាចដំណើរការនិងទទួលបានការគាំទ្រពីគ្រប់មជ្ឈដ្ឋាន"។
ប៉ិត សិលា អ្នកដឹកនាំរៀបចំពិព័រណ៍បានឲ្យដឹងថា ការរៀបចំឆ្នាំនេះ ក៏មានការចូលរួមពីសាលាមួយចំនួនទៀតនៅក្នុងខេត្ត ដែលធ្វើឲ្យកម្មវិធីកាន់តែទទួលការចាប់អារម្មណ៍ច្រើនថែមទៀត។
"មានការចូលរួមយ៉ាងសកម្ម ដោយក្រុមសិស្សបានបង្ហាញស្នាដៃបច្ចេកវិទ្យានិងវិទ្យាសាស្ត្របានមកពីការសិក្សា និងការស្រាវជ្រាវ"។
ក្នុងកម្មវិធី មានបង្ហាញសម្ភារៈធ្វើដោយដៃ ការលើកយកទ្រឹស្ដីមេរៀនក្នុងសៀវភៅ យកមកអនុវត្តស្តែងៗដូចជាមេរៀនផ្នែកវិទ្យាសាស្ត្រ បច្ចេកវិទ្យា វិស្វកម្ម សិល្បៈនិងគណិតវិទ្យា។ ក្រៅពីនេះ ក៏មានការដាក់បង្ហាញសម្ភារៈបែបច្នៃប្រឌិតរបស់ក្រុមវិទ្យាសាស្ត្រ និងរបស់សិស្សានុសិស្សដែលរៀនពីថ្នាក់ទី ៧ ដល់ថ្នាក់ទី ១២។
បើតាមលោកនាយកសាលានៅឆ្នាំក្រោយ សាលានឹងរៀបចំបន្ទប់សម្រាប់សិស្សផ្នែកវិទ្យាសាស្រ្ត ដោយសារកន្លងទៅសាលាខ្វះខាតកន្លែងសម្រាប់សិស្សស្រាវជ្រាវអនុវត្ត។
លោកបន្តថា នៅឆ្នាំក្រោយៗសាលាក៏នៅតែបន្តគាំទ្រការរៀបចំពិព័រណ៍នេះ ដែលជាផ្នែកមួយចូលរួមចំណែក ពង្រីកធនធានមនុស្សផ្នែកវិទ្យាសាស្រ្តសម្រាប់យកទៅអភិវឌ្ឍប្រទេសជាតិនៅថ្ងៃអនាគត៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
